Read kumam Isaya 66 Bible Online

Isaya 66 - kumam bible

Isaya 66

¹ Rwot waco be, “Malo obedo kakame ango apugo kiye, doko wi lobo obedo abanya me teno tiena. Ot kacal kamene en kame wun ikarununu gero nango? Doko kabedo kacal kamene en kame ango aromo wei iye?

²Gi nogi dedede ango en kame acweo. Pi mano, gin dedede kibedo mega. Do jo kame ango cunya yom i kom gi, gin jo kame mwolere kede kame swilaro, jo kame lwora di kitimo gikame ango awaco negi.

³“Jo timo bala kame cuny gi mito. Kibut gin, apokapoka moro li ka gin kineko twon bala giayala arabo kineko dano bala giayala; arabo kimio giayala me atin oromo amoto kiminaro ngut ogwok; arabo kimio giayala me alos amoto kimio giayala me remo me epege; arabo kimio giayala me odok angwe kur amoto kilego but caljwogi. Gin kitieko yero timo gikame cuny gi mito, doko cuny gi yom i kom tim gi me kwer nogo.

⁴Ango da abino yero timo ne gin can, di ako bino timo negi gikame gin kitie lworo nono; pien kakame ango alwongere kede, likame bin tie ngat kame oko gamo doga; kakame ango ayamo kede gin likame kiko winyo; do gin kiko timo gikarac i wanga, di kiko yero timo gikame oudo cunya dagi.”

⁵Winyunu kop kame Rwot tie waco, wun jo kame ilworenu doko itimunu gikame en ewaco. En ewaco be, “Jo wu mogo cuny gi kec i komu, doko kidagi wu pira. Gin kinyero wu di kiwaco be, ‘Ber Rwot nyut twer mere adwong, tetekeny wan onen ilel wu.’ Do gin kikom gi en kame lewic bino mako gi!

⁶Winyunu! Woo tie i bomba, dwan tie wok ki tempulo! Dwan Rwot inonono. En etie culo kwor i kom jokwor mege!

⁷“Bomba na kacil cal bala dako kame ngole nywal abongo winyo aramo me nywal.

⁸Ngai kotieko winyo arabo neno gikame cal kamanono? Benyo tie ateker moro kame kotieko nywalo i ceng acel kenekene? Sion cal bala dako konywalo idwe mege oyotoyot kakame en ecako ramere kede me nywal.

⁹Iparunu be ango abino mino jo na wok ki auris di likame oko nywalo gi? Ango ngat kame amio jo nywal, benyo benyo kame ango bobo acego kede yic?” Rwot en owaco.

¹⁰Lelunu karacel kede Yerusalem; bedunu kede yomcuny pire, wun jo dedede kame imarenu! Nataman lelunu karacel kede en, wun jo dedede kame oudo ibedunu koko pire!

¹¹En ebino gwoko wu di eko kweno cunyu, bala kame atin doto kede tuno ka toto mere di cunye ko kwei. Ibinunu bedo i deyo mere me aura, ikounu bedo kede yomcuny.

¹²Rwot waco be, “Ango abino kelo ne wu mulem bala ecilet kame mol, kede abar me atekerin bala ecilet kame opong di eko lamar. Ibinunu bedo cal bala atin kame toto mere gwoke di etinge i kore, doko elelepo en i tiene.

¹³Bala kame toto me atin kweo kede cuny atin mere, kamanono ada abino kweno cunyu. Ibinunu udo kweicuny i Yerusalem.

¹⁴Ibinunu neno manoni di cunyu ko bino bedo yom; komu bino bedo yot bala lum alibaliba. Di do ikounu bino ngeno be twer ka Rwot tie kede jotic mege, do wangcunye tie i kom jokwor mege.”

¹⁵Rwot oyaro bino kede mac kede cabalan mege bala apipiru. En ebino bino kede gero atek di eko mino jo kame en cunye wang i kom gi alola i mac kame liel birbir.

¹⁶Rwot bino mino jo dedede me wi lobo, jo kame kop bino lono, alola me mac kede epima. Jo kame Rwot bino neko bino bedo tot.

¹⁷Rwot waco be, “Jo kame lonyere pi ot i poti woro rubangan, jo kame camo ringo me ipegei, kede gimogo me kwer, kede iyoono, kobino muducaro gi karacel.

¹⁸Ango angeo tice gi kede gikame gin kiparo. Ango atie bino pi coko atekerin dedede kede jo me leb dedede. Gin kibino bino di kiko neno deyo na,

¹⁹doko ango abino cibo gianena i diere gi. Jo mogo kikom gi kame bino dong kuo, ango abino oro gi but atekerin kede i lobere kame tie kakame bocoboco, lobere kalikame pwodi owinyo kop i koma, doko pwodi likame kineno deyo na. Ango abino oro gi i piny me Sipein, Libiya kede Lidia, gin pinye me jogwei emal, kede i piny me Tubal kede Guris, di gin kiko tuco kop me deyo na kunono.

²⁰Gin kibino kelo imiegu wu dedede kidwoko gi ki lobere dedede bala giamia buta. Gin kibino kelo gi Yerusalem i moru na kacil di kiwanano asigiran, pundan, kede aguraguran, jo ace di tie i wi cabalan. Ebino bedo cal bala kame jo me Isirael kelo kede giayala gi me alos i Tempulo di kiketo gi i gimak acil.

²¹Ango abino mino jo mogo kikom gi bedo josaseredoti kede Jolebi.

²²“Bala kame malo kanyen kede lobo kanyen kame ango abino timo bino bedo tie kede nakanaka, kamanono da ikwae wu kede nyingu bino bedo tie nakanaka.

²³Cako i Ebaga me Por Duwe tuno i Ebaga me Por Duwe, kede i Sabato tuno i Sabato, jo dedede bino bino i nyima wora.” Rwot en owaco.

²⁴“Gin kibino donyo ooko di kiko neno liele me jo oto, jo kame oudo ojemo na. Kudilinge kame camo gi likame bino to, doko mac kame wango gi likame kobino neko. Neno liele gi bino bedo rac twatwal but jo dedede.”