Read kumam Isaya 8 Bible Online

Isaya 8 - kumam bible

Isaya 8

¹Di Rwot oko waco na be, “Isaya, kwany gi ibatalal me iwandik iko wandiko iye kede inyukutan kame jo dedede karuno somo be, ‘Maker salal kas bas’,[4]

²iko udo na jo are agenere kame bino bedo ijurak na, ngasaseredoti Uria kede Sakaria wot ka Yeberekia.”

³Ingei kare moro, ango ako ribere kede dako na koudo obedo anabi, en eko yac di eko nywalo atin awobi. Rwot oko waco na be, “Cak nyinge ‘Maker Salal Kas Bas’.

⁴Pien di pwodi atin nono likame ongeo lwongere be, ‘Papa’ kede be ‘Toto’, udo abaka me Asiria otieko tero abar me Damasiko kede jamini kame eyako ki Samaria.”

⁵Rwot oko bobo yamo keda.

⁶En ewaco na be, “Jogi otieko dagi pii amol mot me Siloa, di kiko lunyo bedo kede twon lworo but Resin kede wot ka Remalia;

⁷pi manono, ango Rwot abino kelo negi abaka me Asiria kede isirikalen mege dedede pi suro Yuda. Gin kibino bino bala pii me ariram kobelo ecilet me Eupurate di eko donyo mol ki ngete kago.

⁸Isirikalen jokwor bino umo Yuda bala alele kame tuno i ngut dano.” Do Rubanga tie kede wa! En ebino yararo bwome di eko gwoko lobo wa.

⁹Cokerenu karacel, wun jo me atekerin me kumbor, do ikounu bedo kede lworo; winyunu wun pinye dedede me kakaboco; iikerenu yi do ikounu kara bedo kede lworo; ebo, iikerenu do kara ikounu bedo kede lworo!

¹⁰Iikunu tam karacel, do likame kibino cobere; yamunu kope, do kope nogo likame bino cungo, pien Rubanga tie kede wa.

¹¹Rwot oko kwenyaro ango kede twer mere adwong pi weko lubo tim kame jo oudo tie kede. En ewaco be,

¹²“Kur ilwong be iik me mung, gi dedede kame jogi lwongo be obedo iik me mung, doko da kur ibed kede lworo i kom gi dedede kame gin kitie kede lworo iye.

¹³Do ango Rwot me jo yi ango abedo ngat kacil, ango en kame ipoore lworo.

¹⁴Ango abino doko bala kabedo kacil, kede kidi kame getaro jo; abino doko bala kidi kame getaro jo me Isirael kede jo me Yuda, kede owic kame bino mako jo me Yerusalem.

¹⁵Jo atot bino agetar; kibino popoto di kiko tuturun; kobino mako gi kede owic di oko tero gi.”

¹⁶Wun josiao na ipoorenu daro kede gwoko kope kame Rubanga otieko mina.

¹⁷Rwot otieko pwono ne jo mege me Isirael, do ango abino gene kamanono.

¹⁸Rwot me jo yi, ngat kame bedo i wi moru me Sion otieko keta, ango kede idwe kame emia, pi bedo bala anen akuo but jo me Isirael.

¹⁹Do jo bino waco ne wu be, “Penyunu kope kibut jwogi kede tipere adwilao kede agato; mam ateker moroni poore penyo kop kibut rubangan gi kede kibut jo oto, pi jo akuo,

²⁰pi udo kope kede pwony kibut gi?” Ateteni jo kame yamo kamanoni likame bino kuo tuno neno lero.

²¹Jo bino ririmo lobo noni di kitie kede cwercuny alit kede kec; kec bino mino cuny gi wang di kiko donyo lamo abaka gi kede rubangan gi. Gin kibino tingo wang gi malo i edou,

²²kede kibino ngino piny i wi lobo, do kibino neno peko kede colpiny kenekene, colpiny akelo cwercuny, kame kobino piko gi iye.