Read kumam Isaya 9 Bible Online

Isaya 9 - kumam bible

Isaya 9

¹Colo doko likame bino bedo tie ne jo kame oudo tie i can alit. I kare kokato en oudo ekelo acae i lobo me Sebulun kede Naputali, do i kare me anyim en ebino kelo deyo i adul noni, cako ki nam me Mediterania dok tetu kide tuno i lobo kame tie loka tetuca me ecilet me Yorodan, akadi da paka tuno Galilaya kakame jokumbor bedo iye.

²Jo kame oudo bedo i colo otieko neno twon lero. Jo kame oudo bedo i lobo acol cucucuc lero otieko caro gi.

³Rwot in itieko nyano ateker ni, imio gi yomcuny. Gin kilelo i nyimi bala kame jo lelo kede i kare me kac, arabo bala kame jo lelo kede kame kitie popoko gikame kiyako.

⁴Pien in itieko tuturo ayoko kame oudo tie negi bala yec, kede lilim kame oudo kobungo kede epepet gi. Itieko bwono ateker kame oudo tero jo ni kirac, bala kame oudo bin ibwono kede isirikalen me Midian.

⁵Amukai me isirikalen kame nyonyono piny burut burut, kede igoen gi kame remo opwoko kobino uco gi i mac.

⁶Konywalo ne wa atin, komio wa atin awobi! En ebino bedo ngapug wa! Kobino lwonge be, “Ngamini tam me Aura, Rubanga Won Twer, Papa kame bedo Nakanaka, Ngapug akelo Mulem.”

⁷Akarinikin mere me pug bino meede ameda dongo; anapakin me nakanaka bino bedo tie i ajakanut mere. En ebino lunyo kom me ajakanut ka Daudi, di eko mino ajakanut nono cungo di etek i yore me pug kede ateni kede i yore kopoore, cako nataman i kare noni tuno i kare me ajikini. Mit kame Rwot me jo yi tie kede pi timo kamanoni bino mino ecobere.

⁸Rwot otieko ngolo kop ne jo me Isirael, gin ikwae ka Yakobo.

⁹Jo dedede me Isirael, jo dedede kame bedo i bomba me Samaria bino ngeno gikame en etimo noni. Nan gin kitie kede ewaka kede tingere di kiwaco be,

¹⁰“Ude kame kogero kede matapali otieko popoto, do wan obino lunyo wang gi kede ude kame kogero kede kide kame kopao. Kotieko totongo ipirin me yen cukamori, do obino lunyo kargi kede ipirin me yen seda.”

¹¹Rwot otieko supo jokwor gi pi suro gi.

¹²Siria i bad tetu kide kede Pilistia i bad tetu tim otieko ngamo dog gi pi mwonyo Isirael. Do akadi bed kamanono da, gero ka Rwot pwodi likame ojik, en pwodi erieo bade kamanono pi bitaro gi.

¹³Jo me Isirael likame olokere dok but Rwot me jo yi arabo mone, en ngat komio gi alola.

¹⁴I ceng acel kenekene Rwot bino mino jotel kede jo me Isirael alola; en ebino ngolo wie kede yibe tenge.

¹⁵Joadongo kede jo kame koworo obedo wie; inabin kame pwonyo kop me abe obedo yibe.

¹⁶Pien jo kame telo jo nogi orwenyo gi di jo oko dong di wi gi ototolun.

¹⁷Manono en komio Rwot likame lelo i kom idwe gi, doko da likame ebino bedo kede kisa i kom idwe kic kede apuserun gi. Pien ngat acelacel do likame paro pi Rubanga, doko gin dedede kidoko jotim tim areco; buli dog dano acelacel yamo kop me mingo. Pi magonogi dedede, gero ka Rwot likame otiek, do en pwodi erieo bade kamanono pi mino alola.

¹⁸Gikareco me jo cal bala mac kame wango okuto kede ocokocok; en egamaro abum di eko wange di yiro mere swiridido malo.

¹⁹Pi kite kame Rwot me jo yi tie kede lilo, alola mere liel bala mac i lobo noni lung; jo odoko gikame liel i mac. Likame ngatamoro bino koono ngawote.

²⁰Jo lokere tuni ngaungau kede cam, do kec pwodi neko gi kamanono; kilokere tetuca da ngaungau kamanono, do likame kiko yeng. Kicamo kiton idwe gi.

²¹Jo me ekeko ka Manase osurere kede jo me ekeko ka Epuraimu, di kiko ribere suro Yuda. Pi magonogi dedede gero ka Rwot likame pwodi otiek, en pwodi erieo bade pi mino jo alola.