Read kumam Jolebi 10 Bible Online

Jolebi 10 - kumam bible

Jolebi 10

¹Nadab kede Abiku, awobe ka Aaron, ngat acelacel oko kwanyo tago mere me wango odok angwe kur, kiko keto itonge me mac i yi gi kede odok angwe kur; gin kiko dunyo gi but Rwot do di likame Rwot ociko gi be kitim kamanono.

²Rwot oko cwano mac di oko wango gi, di kiko to i nyim Rwot.

³Di Musa oko waco ne Aaron be, “Manoni en dwong me gikame Rwot oudo owaco kakame ewaco kede be, ‘Jo kame timo na tic poore bedo kede wor buta bala ngat kacil; jo dedede bino mina deyo.’ ” Do Aaron oko ling alinga.

⁴Musa oko lwongo Misael kede Elisapan, gin awobe ka Usiel, omin me papa me Aaron di eko waco negi be, “Bianu kan itingunu kom imiegu wu tenge ki nyim kabedo kacil di ikounu tero gi tenge me kimere kuno.”

⁵Gin kiko ot, di kiko diedielo gi kede isatin kame oudo kingapo kitero gi tenge me kimere, bala kame oudo Musa owaco negi.

⁶Musa oko waco ne Aaron kede awobe mege ace kodong, Eleasar kede Itamar be, “Kur idagunu kuro wi wu, doko da kur iyeyecunu igoen wu pi nyuto iturur, ka itimunu kamanono ibinunu to, doko da lilo ka Rwot bino poto i kom jo dedede. Do jo apat me Isirael twero koko jo are nogi kame Rwot ocwao mac oko wango.

⁷Kur iyaunu tenge ki ekeko me Eema kacil, ka itimunu kamanono ibinunu to, pien mo me wir ka Rwot tie i komu.” Gin kiko timo gikame Musa owaco negi.

⁸Rwot oko waco ne Aaron be,

⁹“In kede awobe ni likame ipoorenu donyo i yi Eema me ariamakin keda ingei mato bwini arabo kongo moro ace; ka itimunu kamanono, ibinunu to. Iswil noni mako kiton ikwae ni me kare lung me anyim.

¹⁰Miero ingeunu poko gikacil me ka Rubanga kede gikame jo tio kede, gi me kwer kede gi kalikame kwer.

¹¹Miero ipwonyunu jo me Isirael iswilia dedede kame ango amio wu kibut Musa.”

¹²Musa oko waco ne Aaron kede awobe mege are kodong, Eleasar kede Itamar be, “Kwanyunu giayala me alos kodong kikom giayala awanga but Rwot, ikounu came i nget alutari abongo keto iye arup, piento en ebedo gikacil twatwal.

¹³Ibinunu came i kabedo kacil, piento en ebedo iner ni kede awobe ni ki kom giayala awanga but Rwot. Manoni en gikame Rwot ociko na.

¹⁴Do wun karacel kede awobe kiton anyira wu itwerunu camo i kabedo kalikame opwokere giamia me kapumito kede amuro kame kokiarao, pien komoko magonogi pi bedo iner wun kede idwe wu ki kom giayala me nywak kame jo me Isirael yalo.

¹⁵Gin kibino kelo amuro kede kapumito i esawa kame kotie wango kede kakamio bala giayala but Rwot, di oko kiarao gi i nyim Rwot bala giamia; magonogi bino bedo iner wun karacel kede idwe wu i kare dedede, bala kame Rwot otieko ciko.”

¹⁶Di Musa oko penyo pi diel koudo poore bedo giayala me kwanyo dub, en eko udo be oudo kotieko wange. Manoni oko mine edoko ger ne Eleasar kede Itamar, awobe ka Aaron kodong mege, di eko penyo gi be,

¹⁷“Pinyo komio likame icamunu giayala me kwanyo dub i kabedo kacil? En ebedo gikacil twatwal, kame Rwot omio butu pi kwanyo raco me jo, pi culo dub kawang gi i nyim Rwot.

¹⁸Pi kite kalikame kotero kede remo mere i yi kabedo kacil, oudo koto wun icamunu giayala nono i kuno, bala kame ango aciko ne wu.”

¹⁹Aaron oko dwoko ne Musa be, “Neningo, i ceng me tin jo okelo giayala gi me kwanyo dub but Rwot, do di jamini areco oko timere nango! Iparo be cuny Rwot oudo oyaro bedo yom i koma ka koto oudo ango acamo giayala me kwanyo dub?”

²⁰Musa oko yeng kede kop kame Aaron owaco.