Read kumam Jolebi 13 Bible Online

Jolebi 13 - kumam bible

Jolebi 13

¹Rwot oko mino Musa kede Aaron iswilia gi:

²Ka ngatamoro tie kede gimoro koluro i kome, arabo giakwoti, arabo karamoro akokolo, di gi nono twero nyai di eko doko tuwo arac me delkom, poore tere but ngasaseredoti moro kikom Aaron kede awobe mege.

³Ngasaseredoti bino ngico tuwo kame tie i kome nono; ka eko udo be yer me kakame tuwo nono omako odoko tar, doko di ecamo delkome paka donyo i yie, en ebino ngeno be manono obedo tuwo arac me delkom; ingei ngingico en, ngasaseredoti bino tuco kakaler be dano nono obedo dano kopwokere.

⁴Do ka buge nogo tar do di likame kingodo delkome, doko da di yer me kanono likame odoko tar, ngasaseredoti bino kong cego dano nono i ot pi ceng kanyaare.

⁵Di ngasaseredoti ko bino ngingico en i ceng me kanyaare; ka en eko neno be tuwo nono pwodi tie kede cal mere nono, di likame enyai, ngasaseredoti bino medo bobo cege i ot pi ceng kanyaare.

⁶Di ngasaseredoti ko bino bobo ngingico en i ceng me kanyaare; ka en eko udo be tuwo nono odok cen likame enyai i delkome, en ebino tuco kakaler be dano nono obedo dano kame li kede pwokere, pien udo manono obedo tuwo me buge kenekene. Di do dano nono ko bino lwoko igoen mege di eko bedo dano kame li kede pwokere.

⁷Do ka tuwo nono oko bobo cere i cen ngei ngasaseredoti waco kakaler be dano nono obedo ngat kame li kede pwokere, en miero bobo edok but ngasaseredoti ot ngingico en.

⁸Ngasaseredoti bino ngingico en; ka en eko udo be tuwo nono onyai i delkome, ngasaseredoti bino waco kakaler be dano nono obedo ngat kopwokere; manono udo obedo tuwo arac me delkom.

⁹Ka dano moro tie kede tuwo arac i delkome, kopoore tere but ngasaseredoti,

¹⁰di en eko ngingico en. Ka buge atatar di wang gi lit tie i kome, di kiloko yer me kakame kitie iye odoko tar,

¹¹manono udo obedo tuwo arac me delkom. Ngasaseredoti bino tuco kakaler be dano nono obedo ngat kopwokere; likame ngasaseredoti bino cege i ot, piento en ebedo dano kopwokere.

¹²Do ka tuwo nono osarakin i kome dedede yai ki tiene tuno i wie,

¹³ngasaseredoti bino ngingico en bobo. Ka en eko udo be tuwo nono oromo kome lung, en ebino tuco kakaler be dano nono likame opwokere, pien udo kome lung odoko tar pi roc.

¹⁴Do ka buge atie i kome wang gi obalacar, dano nono bino bedo ngat kopwokere.

¹⁵Ngasaseredoti bino ngingico en; ka en eko udo buge mege wang gi obalacar, en ebino waco kakaler be dano nono obedo ngat kopwokere. Buge awang gi obalacar obedo tuwo arac me delkom; ngat atie kede gi udo en ebedo dano kopwokere.

¹⁶Do ka wang buge odoko tar, en ebino dok but ngasaseredoti,

¹⁷di en eko bino ngingico en. Ka en eko udo be wang buge nogo odoko tar kitie cango, ngasaseredoti bino waco kakaler be dano nono obedo ngat kame li kede pwokere.

¹⁸Ka dano moro tie kede karamoro i kome me giakwoti kocango,

¹⁹di bobo gimoro atar oko luro kanono, arabo gimoro akwakwar di tatar oko lukere kanono, dano nono bino ot but ngasaseredoti.

²⁰Ngasaseredoti bino ngingico en; ka eko udo be kanono ongodaun, doko yer mege odoko tar, ngasaseredoti bino tuco kakaler be dano nono obedo ngat kopwokere; manono obedo tuwo arac me delkom kocakare kede giakwoti.

²¹Do ka ngasaseredoti ongingico en di eko udo yer me kanono likame odoko tar, doko da likame engodaun do etie tuo, ngasaseredoti bino cege i ot pi ceng kanyaare.

²²Ka kanono oko medo camere, ngasaseredoti bino tuco kakaler be dano nono obedo ngat kopwokere; manono obedo tuwo arac me delkom.

²³Do ka kanono likame oko medo camere, di eko dong adonga di etie apore kocango me giakwoti, ngasaseredoti bino waco kakaler be dano nono obedo ngat kame li kede pwokere.

²⁴Ka mac owango dano moro, bur me mac nono oko doko tar arabo kwakwar di etatar,

²⁵ngasaseredoti bino ngingico dano nono. Ka yer me kanono odoko tar di kanono ongodaun, manono udo tuwo me delkom en ocakere kanono; ngasaseredoti bino tuco kakaler be dano nono obedo ngat kopwokere.

²⁶Do ka ngasaseredoti ongingico kanono di eko udo be yer mege likame odoko tar, doko da likame engodaun do etie cango, ngasaseredoti bino cege i ot pi ceng kanyaare.

²⁷Ngasaseredoti ko bino ngingico en i ceng me kanyaare; ka eko udo kanono tie medo nyai, en ebino tuco kakaler be dano nono obedo dano kopwokere. Manono udo obedo tuwo arac me delkom.

²⁸Do ka apore nono odong kamanono likame enyai, doko da di wange tie cango, manono udo obedo gi okokolo pi mac; ngasaseredoti bino tuco kakaler be dano nono obedo ngat kame li kede pwokere, pien manono mac en omio okokolo.

²⁹Ka icuo amoto dako moro tie kede buge i wie amoto i tike,

³⁰ngasaseredoti bino ngingico buge nogo. Ka buge nogo ongodaun di yer me kakame kitie iye tie bisali bisali di kiner, manono udo obedo tuwo arac me delkom; ngasaseredoti bino tuco kakaler be dano nono obedo ngat kopwokere.

³¹Ka ngasaseredoti ongingico buge nogo di eko udo be kakame kitie iye likame ongodaun, do kenekene yer me kanono likame kom gi yot, en ebino cege i ot pi ceng kanyaare.

³²I ceng me kanyaare ngasaseredoti bino ngingico kakame buge nogo tie iye; ka eko udo buge nogo likame onyai, doko di kanono li kede yer abisali bisali, kede da di likame engodaun,

³³dano nono bino lielo wie dedede kwanyo kenekene kakame buge nogo tie iye. Di ngasaseredoti ko bino bobo cege i ot pi ceng kanyaare.

³⁴I ceng me kanyaare, ngasaseredoti bino ngingico kanono; ka eko udo buge nogo likame onyai, doko da kanono likame ongodaun, ngasaseredoti bino tuco kakaler be dano nono obedo ngat kame li kede pwokere. En ebino lwoko igoen mege di eko bedo dano kacil.

³⁵Do ka buge nogo oko nyai i cen mere ingei tuco kakaler be en dano kame li kede pwokere,

³⁶ngasaseredoti bino bobo medo ngingico en; ka eudo buge nogo bobo onyai, likame bobo en ebino paro ngino ka kanono tie kede yer abisali bisali; dano nono do udo tie dano kopwokere.

³⁷Do ka en eneno di eko udo be buge nogo likame onyai, doko yer me kanono kom gi yot, udo buge nogo ocango, ngasaseredoti bino tuco kakaler be dano nono obedo ngat kame li kede pwokere.

³⁸Ka icuo amoto dako moro tie kede gimogo kolukulukun di tar i kome,

³⁹ngasaseredoti bino ngingico en; ka eudo kagonogo tie kede tar acocol, manono udo gwenyu en komake; dano nono udo likame opwokere.

⁴⁰Ka icuo moro yer odore ki toke amoto ki nyime, udo bono en omake do likame udo epwokere.

⁴¹

⁴²Do ka buge mogo owok i bono nono akwakwar di tatar, manono udo obedo tuwo arac me delkom.

⁴³Ngasaseredoti bino ngingico en; ka buge atie i bono mere nono kwakwar di kitatar, di cal acala bala tuwo arac me delkom,

⁴⁴ngasaseredoti bino tuco kakaler be en ebedo dano kopwokere, pien udo etie kede tuwo arac me delkom i wie.

⁴⁵Dano atie kede tuwo arac me delkom poore ngapo igoen konyinyilun di eko weko wie di likame ekuro; doko da nakanaka epoore umo doge di elelemo be, “Ango apwokere, ango apwokere!”

⁴⁶En ebino dong di epwokere nakanaka tek di pwodi en etie kede tuwo nono, doko da epoore bedo tenge me kimere, epoore bedo kene.

⁴⁷Ka egoe opurao, bed bala en ebedo egoe kame kotimo kede yer me oromo arabo egoe moro aliamaliam;

⁴⁸ka dul moro opurao me egoe aliamaliam, amoto me egoe kame kotimo kede yer me oromo, amoto ka etimere i kom emukule arabo gimoro kenekene kame kotimo kede emukule,

⁴⁹ka eko doko lulum arabo kwakwar, manono udo obedo gikarac apurao, miero nyute but ngasaseredoti.

⁵⁰Ngasaseredoti bino ngingico gi nono di eko ber kane pi ceng kanyaare.

⁵¹I ceng me kanyaare en ebino doko medo ngingico en; ka eko udo kakopurao nono omedo nyai, udo egoe arabo gi nono otieko doko gikame opwokere.

⁵²Ngasaseredoti bino wange, pien udo etie kede gikarac atie nyai, kame poore wang kede mac.

⁵³Ka ngasaseredoti ongingico di eko udo be gikopurao nono likame omedo nyai i kom egoe arabo i kom gi nono,

⁵⁴en ebino mino kolwoke di oko ber doko kane pi ceng kanyaare.

⁵⁵I ceng me kanyaare en ebino doko ngingico en; ka eko udo be gikopurao nono likame oloko cal mere, akadi di likame emedo nyai, udo gi nono otieko doko gikame opwokere, kopoore wange i mac, bed bala gikopurao nono tie i yie amoto i ooko mere.

⁵⁶Do ka ngasaseredoti ongingico en bobo di eko udo be gikopurao i kom gi nono otieko kwanyere, en ebino nyilo tenge kakame oudo opurao nono.

⁵⁷Ka gikopurao nono oko bobo dwogo di eko cako nyai, won gi nono poore wange i mac.

⁵⁸Ka en elwoko gi nono di kanono oko rwenyo, en epoore lwoke bobo di eko bino bedo gimoro kame li kede pwokere.

⁵⁹Manoni en iswil amako gikame purao i kom egoe, bed bala ebedo egoe kame kotimo kede yer me oromo arabo egoe moro aliamaliam; ka dul moro opurao me egoe aliamaliam, amoto me egoe kame kotimo kede yer me oromo, arabo i kom gikame kotimo kede emukule moro ace; manoni en epone me moko ka edoko gikame opwokere amoto li.