Read kumam Jolebi 15 Bible Online

Jolebi 15 - kumam bible

Jolebi 15

¹Rwot oko mino Musa kede Aaron iswilia

²amako jo me Isirael kaman: Ka icuo moro tut cwer ki kome me cuo, udo en edoko dano kopwokere,

³bed bala tut nono tie meede mol amoto ejiko mol.

⁴Kabuto dedede kame dano nono buto iye kede gi dedede kame en ebedo iye doko gikopwokere.

⁵Ngat kame mulo kabuto ka dano nono,

⁶arabo kame bedo i gikame en ebedo iye poore lwoko igoen mege di eko bol, di eko bino dong di en dano kopwokere tuno piny yuto.

⁷Ngat kame mulo dano kame tut mol ki kome poore lwoko igoen mege di eko bol, di eko bino dong di en dano kopwokere tuno piny yuto.

⁸Ka dano kame tut mol ki kome nono ongule i kom dano moro kame li kede pwokere, dano kame kongulo lau i kome nono poore lwoko igoen mege di eko bol, di eko bino dong di en dano kopwokere tuno piny yuto.

⁹Abeno kame dano atie kede tut amol obedo iye tie gikopwokere.

¹⁰Dano kame mulo gikame en ebedo iye bedo dano kopwokere tuno piny yuto, doko da dano kame yeo akodi gi nono poore lwoko igoen mege di eko bol, di eko bino dong di en dano kopwokere tuno piny yuto.

¹¹Jo dedede kame dano kame tut mol ki kome omulo di likame elwoko cinge poore lwoko igoen gi, di kiko bol, di kiko bino dong di gin jo kopwokere tuno piny yuto.

¹²Agulu kame dano kame tut mol ki kome omulo kopoore neko; do ka emulo gimoro kobedo yat kame kopao, kopoore lwoko gi nono.

¹³Ka icuo kame tut mol ki kome oko cango, en epoore maro ceng kanyaare pi lonyere mere, di eko lwoko igoen mege di eko bol kede pii me atan amol, di en eko bino doko dano kotieko lonyere.

¹⁴I ceng me kanyauni en ebino tero amam are arabo ilukei are but ngasaseredoti i ekeko me Eema me ariamakin kede Rwot.

¹⁵Ngasaseredoti bino yalo gi; acel bino bedo giayala me kwanyo dub kede ocelu ko bedo giayala awanga. Epone noni en kame ngasaseredoti bino timo kede pwola me lonyo icuo kame tut mol ne.

¹⁶Ka kwir me icuo oony, epoore lwoko kome dedede di eko dong di en dano kopwokere tuno piny yuto.

¹⁷Gi dedede kame kocweo kede egoe amoto lau me le, di kwir me icuo oko ony iye, kopoore lwoke kede pii di gi nono ko dong di etie gikopwokere tuno piny yuto.

¹⁸Ka icuo obuto kede dako di icuo oko onyo ne kwir, gin dedede kipoore bol di kiko dong jo kopwokere tuno piny yuto.

¹⁹Ka dako tie onyo remo me tuwo duwe, en ebino bedo dano kopwokere pi ceng kanyaare, doko da dano kame mule bino bedo ngat kopwokere tuno piny yuto.

²⁰Gi dedede kame en ebuto iye amoto ebedo iye i kare kame en etie kede tuwo duwe bino bedo gikopwokere.

²¹Ngat kame mulo kabuto mere poore lwoko igoen mege di eko bol, di eko dong di en dano kopwokere tuno piny yuto.

²²Ngat kame mulo kabuto ka dako nono, arabo gimoroni kame en ebedo iye poore lwoko igoen mege, di eko bol, di eko dong di en dano kopwokere tuno piny yuto.

²⁴Ka icuo moro oko buto kede dako nono i kare kame etie kede tuwo duwe, icuo nono bino doko dano kopwokere di eko dong di epwokere kamanono pi ceng kanyaare.

²⁵Ka dako obedo tie kede ony me remo do weko i kare me tuwo duwe, arabo ka remo omeede ony ne kalamo ceng mege me tuwo duwe, en ebino dong di en dano kopwokere i ceng dedede kame remo tie ony ne kede, bala kame etie kede i kare mere me tuwo duwe.

²⁶Kabuto moroni kame dako nono bino buto iye, arabo gimoroni kame en ebino bedo iye bino bedo gikopwokere, bala kame etie kede i kare mere me tuwo duwe.

²⁷Ngat kame bino mulo gi nogo bino doko dano kopwokere; en epoore lwoko igoen mege di eko bol, di eko bino dong di en dano kopwokere tuno piny yuto.

²⁸Ka ony me remo mere ocungo, en epoore kuro pi ceng kanyaare, di do en eko doko dano kame li kede pwokere.

²⁹I ceng me kanyauni dako nono bino tero amam are arabo ilukei are but ngasaseredoti i ekeko me Eema me ariamakin kede Rwot.

³⁰Ngasaseredoti bino yalo gi; acel bino bedo giayala me kwanyo dub kede ocelu ko bedo giayala awanga. Epone noni en kame ngasaseredoti bino timo kede pwola me lonyo dako kame tie kede pwokere pi ony me remo.

³¹Rwot oko waco ne Musa kede Aaron pi kwenyaro jo me Isirael pi kwanyo tenge pwokere kame kitie kede, tetekeny kur kimunao Eema me ariamakin kede en, kame tie i diere gi. Aso ka gin kiko munao en, kobino neko gi.

³²Magonogi obedo pwola kame mako icuo kame tut mol ki kome me cuo, arabo kame kwir mere me cuo oony,

³³dako kame tie kede tuwo duwe, arabo icuo kame buto kede dako kopwokere.