Read kumam Jolebi 16 Bible Online

Jolebi 16 - kumam bible

Jolebi 16

¹Kakame awobe ka Aaron are oko to kede pi oudo gin kioto noko Rwot,

²Rwot oko waco ne Musa be, “Wace omini Aaron kur ebed dodonyo kabedo kacil esawa moroni kenekene, i yi isenge i nyim kom me kisa kame tie i wi Sanduku me Isikan, piento kanono en kame ango aneeno iye i edou. Aso ka li, ebino to.

³En ebino donyo i kabedo kacil ka ekelo twon etobait bala giayala me kwanyo dub, kede emerekek pi bedo giayala awanga.

⁴“Di pwodi likame en eoto kabedo kacil, en kong ebino bol, di do eko ngapo igoen me ngasaseredoti: esati abor aliamaliam, ipalen me yie, ausi ibatalal me pier kede egoe kame odwadwalo i wic.

⁵“En ebino gamo kibut jo me Isirael ikoroi are pi bedo giayala me kwanyo dub, kede emerekek acel pi bedo giayala awanga.

⁶Aaron bino mino giayala me twon pi kwanyo dub mege kede dub me jo me ode.

⁷Di do en eko bino tero diegi are nogo di eko keto gi i nyim Rwot, i nyim ekeko me Eema me Ariamakin kede Rwot.

⁸Di en eko bino uco alulu pi diegi are nogo, kidi me alulu acel bino cungo pi diel kame bino bedo me ka Rwot, do ocelu mere bino cungo pi diel kame bino bedo me ka Asasel.[1]

⁹Aaron bino tero diel kame alulu omako pi bedo me ka Rwot di eko mine bala giayala me kwanyo dub;

¹⁰do diel kame alulu oko mako pi bedo me ka Asasel kobino mine di ekuo but Rwot di oko riame eoto i wi tim but Asasel, tetekeny eter tenge dub me jo.

¹¹“Ka Aaron ongolo twon bala giayala me kwanyo dub mege kede dub me jo me ode,

¹²en ebino kwanyo ki alutari tago me dunyo odok angwe kur, kame itonge me mac opong iye, eko juko odok angwe kur kame kodonyo cing are, di eko tero gi i yi isenge.

¹³En eko bino keto odok angwe kur nono i mac i nyim Rwot, di yiro mere ko umo kom me kisa kame tie i wi Sanduku me Isikan, tetekeny kur en enen kom nono di eko to.

¹⁴En ebino tero remo mogo me twon nono di eko kikiro en kede lwete i nyim kom me kisa di bobo eko kikiro remo ace tien kanyaare i nyim Sanduku me Isikan.

¹⁵Di do en eko bino ngolo diel kame tie giayala me kwanyo dub me jo, eko tero remo mere Kabedo Kacil Kalamo, di eko kikiro remo nono i nyim kom me kisa kede i nyim Sanduku me Isikan, bala kame oudo etimo kede remo me twon.

¹⁶Iepone noni en ebino lonyo Kabedo Kacil Kalamo ki pwokere me jo me Isirael kede ki dub gin dedede. En miero etim kamanono ne Eema me ariamakin kede Rwot, piento en etie i diere me kimere gin, kabedo kame gin kipwoko.

¹⁷Likame tie ngatamoro kame bino bedo tie i Eema cako esawa kame Aaron donyo kede iye pi lonyo Kabedo Kacil Kalamo tuno en wok ooko. Kame en etieko timo pwola me lonyere mere, kede me jo me ode, kede me jo dedede me Isirael,

¹⁸en ebino do donyo ooko i alutari me wango giayala di eko lonye. En ebino tero remo mogo me twon kede me diel di eko keto i iswongen dedede me alutari.

¹⁹En ebino kikiro remo mogo kede lwete tien kanyaare i wi alutari nono, di eko lonye ki dub me jo me Isirael di eko doko gikacil.

²⁰“Kame Aaron otieko lonyo Kabedo Kacil Kalamo, kede kabedo apat me Eema me ariamakin kede Rwot dedede, kede alutari, en eko bino do kelo diel akuo i nyim Rwot, diel kame alulu oyero ne Asasel.

²¹En ebino dokakino cinge are dedede i wi diel akuo nono, di eko tuco gikareco dedede me jo me Isirael, jemo gi, kede dub gi; en ebino keto gi i wi diel nono di eko cwane eoto tenge i wi tim di dano kame koyero en kame tere.

²²Diel nono bino yeno dub gin dedede etero tenge kabedo kame jo li iye; di dano nono ko bino weko diel nono i wi tim kunono.

²³“Di do Aaron ko bino donyo bobo i Eema, di eko gonyo igoen me ngasaseredoti kame oudo en engapo di eoto Kabedo Kacil Kalamo; en eko bino weko gi kunono.

²⁴En ebino bol kede pii i kabedo kacil, di eko ngapo igoen mege amake; di do eko donyo ooko eko mino giayala awanga meren kede giayala awanga me jo, pi kwanyo dub mege kede dub me jo.

²⁵En ebino wango i wi alutari kakamio me le kame komio bala giayala me kwanyo dub.

²⁶Icuo kame oudo oko tero diel ne Asasel i wi tim bino lwoko igoen mege di eko bol kede pii, en amio eko dok but jo i kimere.

²⁷Twon kede diel kame oudo kotimo kede pwola me kwanyo dub, kame remo gi oudo kotero Kabedo Kacil Kalamo pi kwanyo dub, kobino tero gi tenge me kimere di oko wango gi; lau me kom gi, ringo gi kiton amontena kobino wango dedede.

²⁸Ngat kame wango gi bino lwoko igoen me kome di eko bol kede pii, en amio eko dok but jo i kimere.

²⁹“Man en iswil kame ibinunu lubo pi kare lung: i ceng me tomon i duwe me kanyaare, ibinunu kanyo kec, doko likame ibinunu timo tic moro i ceng nono, wun jo me Isirael kiton jokumbor kame bedo kede wu.

³⁰Pien ceng noni en kame kobino lonyo wu kede ki dub wu dedede, tetekeny ibedunu jo kolonyere i nyim Rwot.

³¹En ebedo ceng me wei atwal atwala bala ceng Sabato, doko wun miero ikanyunu kec iye. Manoni en iswil kame poore ilubunu pi kare lung me anyim.

³²Ngatel me Josaseredoti kame kowiro di oko kwero pi lunyo wang papa mere poore tim pwola me kwanyo dub. En ebino ngapo igoen me ngasaseredoti

³³di eko lonyo Kabedo Kacil Kalamo, kede adulion apat me Eema, alutari, josaseredoti, kede jo dedede.

³⁴Manoni en iswil kame wun ibinunu lubo pi kare lung me anyim. Ibinunu timo pwola noni tien acel buli mwaka pi lonyo jo me Isirael ki dub gi dedede.” Aso, Musa oko timo bala kame oudo Rwot ociko ne.