Read kumam Jolebi 17 Bible Online

Jolebi 17 - kumam bible

Jolebi 17

¹Rwot oko waco ne Musa pi

²waco ne Aaron kede awobe mege karacel kede jo me Isirael dedede kaman: Man en gikame Rwot otieko ciko.

³Ka dano moro me Isirael ongolo diang arabo oromo amoto diel bala giamia but Rwot i tenge me kimere,

⁴akaka kele i ekeko me Eema me ariamakin kede Rwot pi mine bala giayala i nyim taberenakol ka Rwot, icuo nono bino bedo kede raco me onyo remo; udo en etieko onyo remo doko miero riame tenge kibut jo me Isirael.

⁵Iswil noni tie tetekeny jo me Isirael kel ne Rwot giayala me leini gi kame lem gin kiyalo i obar. Gin nataman do kibino kelo gi i nyim ekeko me Eema, but ngasaseredoti, di kiko neko gi bala giayala me nywak.

⁶Ngasaseredoti bino kikiro remo i kom alutari kame tie i nyim ekeko me Eema, di eko wango kakamio kame dunyo ngwece amit but Rwot.

⁷Jo me Isirael likame miero bobo mi giayala gi moro but jwogi acal bala diegi, kame oudo omio gi kibedo jo kalikame genere buta. Manoni en iswil kame gin poore kilubi pi kare lung me anyim.

⁸Dano moroni me Isirael arabo ngakumbor moro kame bedo kede gin, kame mio giayala awanga arabo giayala moroni,

⁹di likame en eko kele i ekeko me Eema pi yale buta, kobino riame tenge kibut jo me Isirael.

¹⁰Ka dano moro me Isirael arabo ngakumbor moro kame bedo kede gin oko camo remo, ango abino dagi dano nono di ako riame tenge kibut jo mege.

¹¹Pien kuo me giakuo tie i remo; doko ango atieko mino wun remo pi wun timo kede pwola i wi alutari me kwanyo dub wu; remo en kame kwanyo dub piento en ebedo kuo.

¹²Pi mano, ango atieko waco ne jo me Isirael be likame tie ngatamoro kikom gin kame bino camo remo, akadi ngakumbor kame bedo kede gi.

¹³Ka dano moro me Isirael arabo ngakumbor kame bedo kede gin oko ot dwaro le arabo winyo moro kame ocamo, en ebino onyo remo mere piny di eko ume kede lobo,

¹⁴pien kuo me gi akuo dedede tie i remo. Manono en komio ango awaco ne jo me Isirael be gin likame kibino camo remo me giakuo moroni; ngat kame bino camo remo, kobino riame tenge kibut jo.

¹⁵Ngatamoroni, dano me Isirael arabo ngakumbor, kame camo ringo me le oto amoto ringo me le kame leini me obar oneko, en ebino lwoko igoen mege di eko bol kede pii, di eko dong kuro tuno otieno en amio eko doko cil.

¹⁶Do ka en likame eko lwoko igoen mege kede eko bol, raco mere bino bedo i wie.