Read kumam Jolebi 18 Bible Online

Jolebi 18 - kumam bible

Jolebi 18

¹Rwot oko waco ne Musa pi

²waco ne jo me Isirael be, “Ango en Rwot Rubanga wu.

³Wun likame ibinunu lubo tim me jo me Misiri, piny kame oudo wun ibedunu iye, doko likame ibinunu lubo tim me jo me lobo me Kanan, lobo kame ango atie tero wu iye. Wun likame ibinunu lubo itok gin.

⁴Wun miero ilubunu iswilia nango di ikounu timo gikame ango aciko ne wu. Ango en Rwot Rubanga wu.

⁵Miero ilubunu cik kede iswilia nango; ngat kame lubo gi bino kuo. Ango en Rwot.

⁶“Likame ngatamoro kikomu poore ot but dano kame obedo wad gi kiyapiyapi pi buto kede bala dako kede icuo. Ango en Rwot.

⁷Kur ibut kede toto ni di iko kelo ne papa ni lewic. En ebedo toto ni; in likame ibino buto kede.

⁸Kur ibut kede dako ka papa ni. Manono kelo ne papa ni lewic.

⁹Kur ibut kede amini; amini kame papa wu acel arabo amini kame toto wu acel, kame onywalo i paco acel kedi arabo konywale tenge.

¹⁰Likame ipoore buto kede nyar ka wodi arabo nyar ka nyari; manono kelo ni lewic.

¹¹Likame ipoore buto kede amini kame toto ni kede mere obedo mon nyek; eda ebedo amini.

¹²Likame ipoore buto kede awa ni, amin me papa ni; en wad kiyapiyapi kede papa ni.

¹³Likame ipoore buto kede awa ni, amin me toto ni; en ebedo wad kiyapiyapi kede toto ni.

¹⁴Likame ipoore buto kede dako ka omin me papa ni; eda ebedo toto ni.

¹⁵Likame ibino buto kede dako ka wodi; en ebedo dako ka wodi; in likame ibino buto kede.

¹⁶In likame ibino buto kede dako ka omini; manono kelo ne omini lewic.

¹⁷Likame ibino buto kede nyar dako kame in itieko buto kede, arabo nyar ka wode, arabo nyar ka nyare; gin kibedo joawade mege. Manono obedo gikarac twatwal.

¹⁸Likame ibino nyomo amin me dako ni di pwodi dako ni tie kuo.

¹⁹“Likame ipoore buto kede dako di etie kede tuwo me duwe, pien udo etie kede pwokere.

²⁰Likame ipoore buto kede dako ka dano apat; manono bino mino imunaun.

²¹Likame ibino mino atin ni moro pi bedo giayala but rubanga Molek, pien manono bino kelo acae i nyinga ango Rubanga wu. Ango en Rwot.

²²Likame ibino buto kede icuo wadu bala dako. Manono obedo gikame rac twatwal.

²³Likame ibino buto kede le moro di iko munaun kede, akadi dako moro da likame bino mino le moro buto kede; manono obedo tim arac twatwal.

²⁴“Kur imunaununu kede tim nogo, pien tim nogo en kame atekerin kame ango atie riamo tenge ki lobo kame wun itienu ot iye oudo omunaun kede.

²⁵Tim gin nogo oudo oko munao lobo; ango ako mino lobo alola pi dub gin, di ango ako riamo gi ki lobo nono.

²⁶Do wun ibinunu lubo iswilia kede cik na di likame ikounu timo tim areco kame cal kamagonogo, wun jo me Isirael arabo jokumbor kame bedo kede wu,

²⁷pien jo kame oudo bedo i lobo nono di pwodi wun likame idonyunu iye bin otimo tim areco nogo dedede di gin kiko mino lobo omunaun.

²⁸Ka wun itimunu tim kame munao lobo nono, ango abino riamo wu tenge ki lobo nono bala kame oudo ariamo kede jo kame oudo bedo i lobo nono di pwodi wun.

²⁹Ngatamoroni kame bino timo tim moro kikom tim areco nogi, kobino riame kibut jo me Isirael.

³⁰“Aso, poore igwokunu gikame ango aciko ne wu di likame ikounu timo tim areco nogi, kame oudo jo kame bedo i lobo nono di pwodi wun otimo, doko kur imunaununu kede tim nogo. Ango en Rwot Rubanga wu.”