Read kumam Jolebi 2 Bible Online

Jolebi 2 - kumam bible

Jolebi 2

¹Ka ngatamoro mito yalo Rwot kede alos, miero kong eriege eko doko alos kame konungo. Di do en eko onyo iye mo me olibeti, di eko keto iye odok angwe kur,

²di eko tere but josaseredoti awobe ka Aaron. Ngasaseredoti atie timo tic bino juko alos pong cinge di mo kede odok angwe kur tie iye, di en eko wange i wi alutari di yiro mere ko duny. Dul atitidi nono nyuto be akadi kodong da kotieko yalo but Rwot. Ngwece me giayala awanga nono yomo cuny Rwot.

³Alos ace kodong bino bedo me ka Aaron kede awobe mege, gin josaseredoti; manono obedo dul kacil twatwal pien kokwanye ki kom giayala awanga but Rwot.

⁴Ka dano moro tie mino giayala me mugati kame kotedo, miero time abongo arup. Kitwero bedo mugati apek kame kotimo kede alos kame konyalo kede mo me olibeti, arabo kitwero bedo perepere di kowiro mo i kom gi.

⁵Ka giayala kame dano tie mino obedo mugati kame kotedo kede itatany, miero time kede alos kame konungo di oko nyale kede mo, abongo arup iye.

⁶Poore enyonyoto en di eko onyo iye mo ka etie tere bala giayala.

⁷Ka giayala obedo mugati kame kotedo kede sepula, miero time kede alos kame konyongo kede mo.

⁸Dano bino tero manoni bala giayala but Rwot di eko mine but ngasaseredoti, di ngasaseredoti ko tere i alutari.

⁹Ngasaseredoti bino kwanyo dul atitidi me giayala nono, di en eko wange i alutari di yiro mere ko duny. Dul atitidi nono nyuto be akadi kodong da kotieko yalo but Rwot. Ngwece me giayala awanga nono yomo cuny Rwot.

¹⁰Dul kodong me giayala bino bedo me ka Aaron kede awobe mege, gin josaseredoti; manono obedo dul kacil twatwal pien kokwanye ki kom giayala awanga but Rwot.

¹¹Giayala dedede me alos kame kotie tero i nyim Rwot poore bedo abongo arup; pien likame ipoore keto arup amoto mokic i kom giayala awanga but Rwot.

¹²Itwero da mino gi but Rwot bala giamia me kodi ageo cek, do likame ipoore wango gi i wi alutari pi mino ngwece gi yomo cuny Rwot.

¹³Miero iket munyo i kom giayala ni dedede me alos, pien munyo cungo pi isikan wu kede Rubanga; miero iket munyo i giayala ni dedede.

¹⁴Ka itie mino giayala me alos bala kodi ogeo cek i poto, miero iteri alos kame kocelo i mac di oko riege di egwai.

¹⁵Ipoore onyo iye mo me olibeti di iko keto iye odok angwe kur; manono obedo giayala me alos.

¹⁶Ngasaseredoti bino kwanyo dul atitidi me alos kame koriego di gwai nono, karacel kede mo kede odok angwe kur, di eko wange di yiro mere ko duny. Manono obedo giayala awanga but Rwot.