Read kumam Jolebi 20 Bible Online

Jolebi 20 - kumam bible

Jolebi 20

¹Rwot oko waco ne Musa

²pi waco ne jo me Isirael be, “Ngatamoroni kikom wu arabo ngakumbor moro kame bedo kede wu, kame bino mino atin mere moro but rubanga Molek kobino neke. Jo dedede poore didipo en kede kide tuno en to.

³Ango kikoma abino lokere dage, di ako riame tenge kibut jo na, piento en eko mino atin mere but rubanga Molek, di eko munao kabedo na kacil, doko eko pwoko nyinga kacil.

⁴Do ka jo likame oko paro gimoro i kom gikame dano nono oko timo, di likame kiko neke,

⁵ango kikoma abino lokere dage kede jo me ode dedede, karacel kede jo kame lubo tim mere nono me weka di kiko lokere woro rubanga Molek. Ango abino riame tenge kibut jo na.

⁶“Ka ngatamoro oko lokere ot penyo tam kibut imuroko lango kede jojwogi, di eko weka, ango abino lokere dage di ako riame kibut jo na.

⁷Pi mano, kwererenu ikounu bedo jokacil, pien ango en Rwot Rubanga wu.

⁸Gwokunu iswilia na di ikounu lubo gi. Ango en Rwot ngat kame mio ibedunu jokacil.

⁹“Ngatamoroni kame lamo papa mere arabo toto mere kobino neke; remo mere dong i wie.

¹⁰“Ka icuo moro oko timo adote kede dako ka ngat apat, icuo nono kede dako nono kobino neko gin dedede.

¹¹Icuo kame buto kede dako ka papa mere kelo ne papa mere lewic; gin jo are nogo kobino neko gi; remo gi dong i wi gi.

¹²Ka icuo moro obuto kede dako ka wode, gin jo are nogo kobino neko gi, pien udo gin kitimo gikarac kalamo; remo gi dong i wi gi.

¹³Ka icuo obuto kede icuo wad gi bala dako, udo gin jo are nogo kitimo gikarac twatwal; kobino neko gin jo are nogo; remo gi dong i wi gi.

¹⁴Ka icuo moro onyomo dako moro ribo kede toto me dako nono, gin jo adek nogo kobino wango gi pako to pi gi me lewic kame gin kiko timo, tetekeny gi me lewic kacal kamanono kur bed tie i diere wu.

¹⁵Ka dano oko buto kede le, kobino neke karacel kede le nono.

¹⁶Ka dako moro oko ot but le moro pi buto kede, ibinunu neko dako nono karacel kede le nono da; remo gi dong i wi gi.

¹⁷“Ka icuo moro oko nyomo amin mere kame papa gi acel arabo toto gi acel di eko buto kede, manono tie gi me lewic. Kobino riamo gi tenge kikom jo. En etieko buto kede amin mere, poore mie alola.

¹⁸Ka icuo moro obuto kede dako di dako nono tie kede tuwo duwe, gin jo are nogo kobino riamo gi tenge kibut jo, pien udo gin kituro iswil di kiko doko jo kopwokere.

¹⁹“Ka icuo moroni obuto kede waa mere, manono udo ebuto kede wad gi kiyapiyapi; gin jo are nogo miero kiud alola pi dub gi.

²⁰Ka icuo moro oko buto kede dako ka omin me papa mere, manono udo en ekelo ne omin me papa mere lewic; kobino mino gin alola pi dub gi; gin kibino kei idwe.

²¹Ka icuo moro oko nyomo dako ka omin mere, manono obedo tim me emuna, doko udo emio omin mere lewic; gin kibino kei idwe.

²²“Wun ibinunu gwoko iswilia na kede cik na dedede, di ikounu lubo gi, tetekeny kur ango ariamu tenge ki lobo kame atie tero wu iye.

²³Likame ibinunu lubo gikame jo abedo kunono timo, jo kame ango atie riamo tenge tetekeny wun idonyunu i lobo nono. Pien tim gin nogo en omio cunya oko dagi gi.

²⁴Do ango atieko waco ne wu be lobo gin bino doko meru, ango abino mine butu, lobo alac di mio. Ango en Rwot Rubanga wu; ango atieko poko wu kibut jo me atekerin apat.

²⁵Pi mano, wun ibinunu poko leini me kwer kede leini kalikame obedo me kwer, winy me kwer kede kalikame obedo me kwer; likame ibinunu pwokere kede camo leini arabo winy, amoto gimoro aliao alia i piny, kame ango atieko poko ne wu pi bedo gi me kwer.

²⁶Wun ibinunu bedo mega, jokacil, pien ango Rwot abedo ngat kacil. Ango atieko poko wu kibut atekerin apat pi wun bedo mega.

²⁷“Icuo arabo dako kobedo emuron arabo amuron lango amoto ngajwok kobino neke; kobino didipo en kede kide paka to, remo mere dong i wie.”