Read kumam Jolebi 23 Bible Online

Jolebi 23 - kumam bible

Jolebi 23

¹Rwot oko mino Musa

²iswilia amako ibagai me edini, i kare kame jo me Isirael bino kede i cokere kacil kaman:

³Wun ibinunu timo tice wu pi ceng kanyape; do ceng me kanyaare obedo ceng Sabato, ceng me wei, doko en ceng me cokere kacil. Likame ibinunu timo tic moro iye; en ebedo Sabato ka Rwot i kakame wun ibedunu iye dedede.

⁴Magi en kare me ibagai nogo kame ango atieko moko, kare me cokere kacil, kame wun ibinunu tedo ibagai iye ka kituno.

⁵I duwe me agege i ceng me tomon kiwie ongwon, otieno di piny amumus, ibinunu camo Ebaga me Kalamo.

⁶I ceng me tomon kiwie kany me duwe nono, ibinunu cako camo Ebaga me Mugati kame Arup li iye; ibinunu camo mugati kame arup li iye pi ceng kanyaare.

⁷I ceng me agege mere ibinunu bedo i cokere kacil; likame ibinunu timo tice wu.

⁸Ibinunu mino giayala awanga but Rwot pi ceng kanyaare. I ceng me kanyaare mere ibinunu bedo i cokere kacil; likame ibinunu timo tice wu.

⁹Kame itununu i lobo kame ango atie mino wu di ikounu coko cam ki poti, ibinunu tero arita me cam kame geo cek i poti wu but ngasaseredoti.

¹¹Ngasaseredoti bino kiarao arita nono i nyima tetekeny ango ayei gamo wu. En ebino timo manono i ceng kame lubo ceng Sabato.

¹²I ceng kame kokiarao kede arita i nyima, ibinunu mino giayala awanga me oromo me mwaka acel, kalikame tie kede peko moro i kome.

¹³Ibinunu mino giayala me oromo nono karacel kede kilo are me alos kame konungo di oko rube kede mo, en giayala awanga kame ngwe kur buta. Ibinunu mine karacel kede bwini atie lita acel.

¹⁴Likame ibinunu camo kwon anyen, akadi alos anyige kame kocelo arabo anumu, tuno di itiekunu mino giayala noni buta. Manoni en iswil kame ibinunu lubo pi kare lung i kabedere dedede kame ibinunu bedo iye.

¹⁵Ibinunu maro sabitin kanyaare ingei ceng Sabato, cako i ceng kame wun ikelunu kede aritai pi mino buta.

¹⁶Ibinunu maro ceng tuno Sabato kanyaare tiek, di do i ceng kame lubo, ceng me ot kany mere, ikounu bino mina giayala me alos anyen.

¹⁷Jo me paco acelacel bino kelo mugati are bala giayala kame kokiarao i nyima. Mugati acelacel kobino timo kede alos kame konungo kilo are, di oketo iye arup, di oko bino mine buta bala anyakini kame geo cek.

¹⁸Ibinunu kelo karacel kede mugati nogo, idwe romini kanyaare me mwaka acelacel kame li kede peko moro i kom gi, twon etobait kede romini are acuo; kobino mino gi but ango Rwot bala giayala awanga, karacel kede giayala me alos kede me amata. Gin en giayala awanga kame ngwe kur buta ango Rwot.

¹⁹Ibinunu da bobo mino ekoroi acel bala giayala me kwanyo dub, kede imerekekin are me mwaka acelacel pi bedo giayala me nywak.

²⁰Ngasaseredoti bino kiarao romini nogo buta karacel kede mugati me anyakini kame geo cek, pi gin bedo giamia buta. Gin kitie gikacil kame komio buta pi josaseredoti.

²¹I ceng nono wun ibinunu bedo i cokere kacil; likame ibinunu timo tice wu. Manoni en iswil kame ibinunu lubo pi kare dedede i kabedere dedede kame ibedunu iye.

²²Kame icokunu cam wu ki poti, likame ibinunu kwanyo kiton cam me lak poti, arabo dok nyogao kwanyo cam kame oudo odong i poti. Ibinunu weko gi ne jocan kede jokumbor. Ango en Rwot Rubanga wu.

²³Ceng me agege i duwe me kanyaare bino bedo ceng me wei, ceng me cokere kacil kame kobino kuto iye agwara.

²⁵Likame ibinunu timo tice wu; ibinunu mino giayala awanga buta.

²⁶Ceng me tomon i duwe me kanyaare bino bedo ceng me kwanyo dub; ebino bedo ceng wu kacil me cokere. Ibinunu kanyo kec di ikounu mino giayala awanga buta.

²⁸Likame ibinunu timo tic moro i ceng nono lung, pien etie ceng me kwanyo dub wu.

²⁹Ngat kalikame bino kanyo kec tieko ceng nono lung, kobino riame tenge kibut jo me Isirael.

³⁰Doko ngat kame bino timo tic moro i ceng nono, ango abino neke.

³¹Likame ibinunu timo tic moro. Manoni en iswil kame ipoorenu lubo i kare dedede i kabedere dedede kame ibinunu bedo iye.

³²En ebino bedo ceng wu me wei, doko ibinunu kanyo kec iye, cako otieno me ceng me kanyangon tuno oru mere otieno bobo; wun ibinunu gwoko ceng nono bala Sabato wu.

³³Ebaga me Kimere bino cakere i ceng me tomon kiwie kany me duwe me kanyaare di eko tieko ceng kanyaare.

³⁵I ceng me agege mere, ibinunu bedo i cokere kacil; likame ibinunu timo tice wu.

³⁶Ibinunu bedo mino giayala awanga but Rwot pi ceng kanyaare. I ceng me kanyauni mere ibinunu bedo i cokere kacil di ikounu mino giayala awanga but Rwot. Manono en ceng me woro Rubanga; likame ibinunu timo tice wu.

³⁷(Mage en ibagai kame Rwot ociko, kame wun ibinunu tedo bala kare me cokere kacil, kame ibinunu mino iye Rwot giayala awanga, leini awanga, giayala me alos, giayala angola kede me amata, bala kame mitere buli ceng.

³⁸Ibagai nogi ibinunu tedo medo i kom ebaga me ceng Sabato kame wun itedunu buli sabiti, doko giayala nogi da ibinunu mino medo i kom giamia kame wun imiunu nakanaka but Rwot, giamia wu me cobo kwongere, kede giayala wu me bercuny.)

³⁹Kame do wun itiekunu coko cam ki poti wu, tedunu ebaga noni pi ceng kanyaare, cako i ceng me tomon kiwie kany me duwe me kanyaare. Ceng me agege kede ceng me kanyauni bino bedo ceng me wei.

⁴⁰I ceng me agege ibinunu ngwedo anyakini abeco ki yen wu, jange me otit kede jange me yen kame boke tot i kom gi, kede jange me yen kame turo i nget ecilet, di ikounu bedo kilel i nyim Rwot pi ceng kanyaare.

⁴¹Ibinunu tede bala ebaga me wora, pi ceng kanyaare i duwe me kanyaare buli mwaka. Ibinunu gwoko iswil noni pi kare lung me anyim.

⁴²Jo dedede me Isirael bino bedo i kimere pi ceng kanyaare,

⁴³tetekeny ikwae wu karuno ngeno be ango bin amio jo me Isirael obedo i kimere i kare kame akwanyo gi kede ki lobo me Misiri. Ango en Rwot Rubanga wu.

⁴⁴Musa oko waco ne jo me Isirael ibagai kame Rwot ociko kamanoni.