Read kumam Jolebi 3 Bible Online

Jolebi 3 - kumam bible

Jolebi 3

¹Ka dano tie mino giayala me nywak, miero ebed diang kame li kede peko moro i kome.

²En ebino cibo cinge i wi diang nono di eko ngole i dog ekeko me Eema me ariamakin kede Rwot, di do awobe ka Aaron josaseredoti ko kikiro remo i kom alutari i bad dedede.

³Di do ngat nono ko mino giayala awanga me gigi but Rwot: mo kame umo amontena,

⁴engalur are kede mo kame umo gi, kede lak emany.

⁵Di awobe ka Aaron josaseredoti ko wango gi nogi i alutari karacel kede giayala awanga ace, di yiro gi ko duny. Ngwece me giayala awanga nono yomo cuny Rwot.

⁶Ka dano tie mino oromo amoto diel bala giayala me nywak, ekaruno bedo ekoroi amoto diel adako, do miero ebed abongo peko moro i kome.

⁷Ka dano tie mino oromo bala giayala mere, miero etere but Rwot

⁸di eko cibo cinge i wie, di eko ngole i nyim Eema me ariamakin kede Rwot. Di do awobe ka Aaron josaseredoti ko kikiro remo mere i kom alutari i bad dedede.

⁹Di do ngat nono ko mino giayala awanga me nywak but Rwot; ebino mino gigi: kakamio me giayala nono, yibe lung di kongole iyapi kede egura mere, mo kame umo amontena,

¹⁰engalur are kede mo kame umo gi, kede lak emany.

¹¹Di ngasaseredoti atie i wang tic ko wango gi nogi dedede i wi alutari bala giayala awanga but Rwot di yiro gi ko duny.

¹²Ka dano tie mino diel bala giayala mere, miero etere but Rwot

¹³di eko cibo cinge i wie, di eko ngole i nyim Eema me ariamakin kede Rwot. Di do awobe ka Aaron josaseredoti ko kikiro remo mere i kom alutari i bad dedede.

¹⁴Di do ngat nono ko mino giayala awanga me nywak but Rwot; ebino mino gigi: mo kame umo amontena,

¹⁵engalur are kede mo kame umo gi, kede lak emany.

¹⁶Di ngasaseredoti ko wango gi nogi i wi alutari bala giayala awanga but Rwot, di ngwece mere ko yomo cuny Rwot. Kakamio dedede bedo me ka Rwot.

¹⁷Ebino bedo iswil kame bedo nakanaka i kabedo dedede but ikwae kede ikwae be: likame jo me Isirael poore camo kakamio amoto remo.