Read kumam Jolebi 8 Bible Online

Jolebi 8 - kumam bible

Jolebi 8

¹Rwot oko waco ne Musa be,

²“Teri Aaron kede awobe mege i ekeko me Eema me ariamakin keda. Ter gi kede igoen me josaseredoti, mo me wir, twon kame poore bedo giayala me kwanyo dub, romini are acuo, kede ebukit kopong me mugati kame kotimo abongo arup.

³Di do iko lwongo jo dedede cokere kunono.”

⁴Musa oko timo gikame Rwot ociko ne. Kakame jo dedede otieko cokere kede i ekeko me Eema me ariamakin kede Rwot,

⁵Musa oko waco ne jo kocokere be, “Gikame nataman ango abino timo en gikame Rwot ociko be timi.”

⁶Musa oko mino Aaron kede awobe mege ooto anyim, di eko mino gi kibol.

⁷En eko ngapo ne Aaron esati kede ekanso di eko tweno piere kede ausi kibatalal. Di eko keto epod i kome di eko lide i piere kede rakoba atie iye kame kokedo kiber.

⁸En eko ngapo ne isau me kor di eko keto iye Urim kede Tumim.

⁹Eko dodolo egoe i wi Aaron di eko dupo i kom egoe nono i tetu nyime gimoro ameny kame kotimo kede saabu, manono en gianyuta be en etieko mire but Rwot, di elubo kite kame Rwot ocike kede.

¹⁰Di Musa oko kwanyo mo me wir di eko kikiro en i wi taberenakol kede gi dedede kame oudo tie iye, iepone noni en ekwero gi but Rwot.

¹¹Eko kwanyo mo mogo di eko kikiro en tien kanyaare i kom alutari kede jame me tic kame oudo tie iye, kede i kom kalaya kede gicibe, pi kwero gi but Rwot.

¹²Di eko onyo mo me wir i wi Aaron pi kwere doko ngasaseredoti.

¹³Alubo mere, Musa oko mino awobe ka Aaron ooto anyim di eko ngapo negi isatin kede ausin abatal i pier gi, kede igoen kame kododolo i wic, bala kame oudo Rwot ociko ne.

¹⁴Di Musa oko kelo twon kobedo giayala me kwanyo dub, di Aaron kede awobe mege oko cibo cing gi i wie.

¹⁵Oko neke di Musa oko kwanyo remo mogo, eko rwako iye lwete di eko kikiro en i iswonge me isondana me alutari, pi kwere but Rwot. Di do eko onyo remo apat kodong piny i dud alutari pi kwere but Rwot kede pi lonye.

¹⁶En eko waro kakamio me amontena dedede, lak emany, kede engalur are kede mo koumo gi, di eko wango gin dedede i wi alutari.

¹⁷Di eko kwanyo kakodong me twon, kame ribo lau mere, ringo kede we mere, di eko ot wango gi tenge me kimere, bala kame Rwot oudo ociko.

¹⁸Alubo mere Musa oko kelo emerekek me giayala awanga, di Aaron kede awobe mege oko cibo cing gi i wie.

¹⁹Oko neke di Musa oko kikiro remo mere i kom alutari i bad ongwon dedede.

²⁰Di en eko ngongolo oromo nono i adulion, eko lwoko amontena mere kede tiene di do eko wango kom oromo nono dedede i wi alutari, bala kame oudo Rwot ociko.

²²Di bobo Musa oko kelo emerekek me are, en oromo me kwero josaseredoti. Aaron kede awobe mege oko cibo cing gi i wi oromo nono,

²³di oko neke. Musa oko kwanyo remo mere di eko keto i yit Aaron me bad tetu cam, kede i lwete adwong me cinge tetu cam, kede i lwete adwong me tiene tetu cam.

²⁴Kakame awobe ka Aaron otieko ot kede anyim, Musa oko keto remo mogo i yit gi tetu cam, kede i lwet gi adongo me cing gi tetu cam, kede i lwet gi adongo me tien gi tetu cam. Di do Musa oko kikiro remo kodong i kom alutari i bad dedede.

²⁵En eko kwanyo kakamio, yibe kobedo mo ibatalal, kakamio dedede me amontena, lak emany, kede engalur are kede mo i kom gi, kede amuro tetu cam.

²⁶Di eko kwanyo ki ebukit me mugati kame kotedo abongo arup gigi: mugati acel kame kotimo kede mo, kede mugati acel aperepere di eko keto gi i kom kakamio kede i kom amuro me tetu cam.

²⁷En eko keto magonogi dedede i cing Aaron kede awobe mege di ekiarao gi but Rwot.

²⁸Musa oko kwanyo gi nogo ki cing gi di eko wango gi i wi alutari bala giayala awanga but Rwot. Manoni oudo obedo giayala me kwero josaseredoti, giayala awanga kame ngwece mere yomo cuny Rwot.

²⁹Musa oko kwanyo kapumito di eko kiarao en pi mine but Rwot; manoni oudo obedo iner ka Musa i kom oromo me kwero josaseredoti, bala kame oudo Rwot ociko ne.

³⁰Di do Musa oko kwanyo mo moro me awira kede remo kame oudo tie i alutari di eko kikiro gi i kom Aaron kede i kom igoen mege, kede da i kom awobe mege kede i kom igoen gi. Iepone noni en ekwero but Rwot Aaron kede igoen mege, kede awobe mege da kede igoen gi.

³¹Musa oko waco ne Aaron kede awobe mege be, “Terunu ringo no i ekeko me Eema me ariamakin kede Rwot, di ikounu tede ki kuno, ikounu came kede mugati atie i ebukit me giayala me kwero josaseredoti, bala kame Rwot otieko ciko.

³²Ipoorenu wango ringo kede mugati dedede kame icamunu oko dong.

³³Likame ibinunu yai tenge ki ekeko me Eema me ariamakin kede Rwot pi ceng kanyaare, tuno di pwola me kwero wu pi bedo josaseredoti otiek, pien ebino tero ceng kanyaare pi kwero wu.

³⁴Rwot ociko be poore timo gikame wan tin otimo noni pi kwanyo dub wu.

³⁵Ibinunu dong bedo i ekeko me Eema me riamo iwor kede iceng pi ceng kanyaare, di itimunu gikame Rwot ociko, ka li ibinunu to; manoni en gikame Rwot ociko na.”

³⁶Aaron kede awobe mege oko timo gi dedede kame Rwot ociko di ewaco kibut Musa.