Read kumam Yeremia 1 Bible Online

Yeremia 1 - kumam bible

Yeremia 1

¹Kope atie i yi itabu ni obedo kope ka Yeremia, wot ka Kilikia, ngat koudo obedo dano acel kikom josaseredoti kame oudo tie Anatot, i lobo me Benjamin.

²Rwot bin oyamo kede Yeremia i kare kame Abaka Yosia wot ka Amon en oudo tie abaka me Yuda, i mwaka me tomon kiwie adek me apugan mere.

³Rwot bobo bin oko medo yamo kede en di Abaka Yekoyakim wot ka Yosia en oudo tie ngapug me Yuda, kede da tuno i ajikini me mwakini tomon kiwie acel me apugan ka Abaka Esedekia wot ka Yosia. I duwe me kany me mwaka me ajikini me apugan ka Esedekia nono, bin oko mako jo me Yerusalem di oko tero gi obukui bala mabus.

⁴Rwot owaco na be,

⁵“Di pwodi oudo likame ango acwei i yi toto ni, oudo ango angei. Doko da di oudo pwodi likame konywali, oudo ango akweri pi timo tic na; oudo ayeri pi bedo enabi but atekerin.”

⁶Ango ako dwoko be, “Okwe, Rwot Rubanga! Ateteni ango likame atwero yamo kede jo, pien ango pwodi atitidi.”

⁷Do Rwot oko waco na be, “Kur iwac be pwodi in ititidi, do in oti but jo kame ango atie cwani but gi di iko waco negi gikame ango abino ciki pi waco.

⁸Kur ibed kede lworo but gi, do ango abino bedo tie kedi pi gwoki. Ango Rwot en awaco!”

⁹Di Rwot oko cwano cinge di eko mulo doga, di eko waco na be, “Nan ango atieko keto kope na i dogi.

¹⁰Tin ango atieko mini twer i kom atekerin kede ajakanuto, me puputo kede me tuturo piny, me dudubo kede me reto, me gero kede me pito bala yat.”

¹¹Rwot oko penya be, “Yeremia, itie neno nyo?” Ango ako dwoko be, “Atie neno ajange me yat alimon.”[1]

¹²Di Rwot oko waco be, “Ineno kiber, pien ango atie ngino pi neno be kop na ocobere kakare.”

¹³Rwot oko penya bobo tien me are be, “Itie neno nyo?” Ango ako dwoko ne be, “Atie neno agulu kame pii gugunyo iye atie i bad tetu malo, di doge tie lengere i bad tetu piny i lobo me Yuda.”

¹⁴Di Rwot oko waco na be, “Can alit bino wok ki bad tetu malo di eko poto i kom jo dedede kame bedo i lobo noni.

¹⁵Pien nan ango atie lwongo atekerin dedede kame tie tetu malo pi bino. Abakai gi ko bino cibo komini gi me pug i erute me Yerusalem kede lukaro apama kame kocele kede, kede da lukaro bomban ace me Yuda.

¹⁶Ango abino mino gi alola pi dub kame gin kitimo; pien gin kiweka, kidonyo mino rubangan ace giayala, doko da kidonyo timo caljwogi di kiworo gi.

¹⁷Do in Yeremia, iikere cuto me ot i wang tic; oti iwace gi kope dedede kame ango aciko ni pi waco. Kur nan imi cunyi poti pi gin, aso ka li ango abino mini ibedo kede lworo akalamo i nyim gi.

¹⁸Jo dedede me lobo noni bino motun i komi: abakai me Yuda, jopug mere, josaseredoti kede jo me piny bino cako yi i komi. Do ango tin atie mini idoko tek bala bomba kame kocelo kede apama, bala epir me nyonyo ayon, bala apama kame kotimo kede nyonyo buronsi. Gin likame kibino bwoni pien ango abino bedo tie kedi pi gwoki. Ango Rwot en awaco.”