Read kumam Yeremia 10 Bible Online

Yeremia 10 - kumam bible

Yeremia 10

¹Wun jo me Isirael, winyunu kop kame Rwot tie waco ne wu.

²En ewaco be, “Kur ipwonyerenu lubo ekite kuo me atekerin apat; kur ibedunu kede lworo pi gianena mogo atimere i malo, bed bala atekerin apat tie kede lworo i kom gi nogo.

³Tim kame gin kitie kede amako edini gi kony mere li. Kitongo yat ki abum di kiko reto, ngapai cal ko pane kede gipac;

⁴jo di do ko tubuso en kede siliba kede saabu. Di oko gure kede sumalin piny tetekeny kur epoti.

⁵Caljwogi gi nono cal acala kede cal mogo kame jo cicibo i poti pi riamo winy; likame kitwero yamo; kotingo gi atinga pien likame kitwero ot. Kur ilworunu gi, pien likame kitwero timo ne wu gimoro arac, doko da likame tie gimoro aber kame kitwero timo ne wu.”

⁶Okwe Rwot, likame tie ngatamoro kame cal bala in, in idwong twatwal, doko nyingi tie kede twer adwong twatwal.

⁷Ngai kalikame poore mini wor, Okwe Abaka me atekerin dedede? In ipoore me jo mini wor. Likame tie ngatamoro kame cal bala in kikom jo ariek me atekerin dedede, amoto kikom abakai gi dedede.

⁸Gin dedede kiming, doko likame wi gi tio. Likame tie gimoro kame caljwogi twero pwonyo gi, piento en ebedo yat ayata.

⁹Komwono i kom caljwogi gi siliba kame kokelo ki Tarusi, kede saabu kame kokelo ki Upas; gin kibedo tic me jopai cal kede jotet. Kongapo negi igoen ebululu ebululu kede akwar, igoen kame jo atie kede diru me kuno igoen kede cing gi en ocweo.

¹⁰Do Rwot, in en ibedo Rubanga me ateni; in en Rubanga akuo, kede abaka kame pugo nakanaka. Ka in idoko ger, wi lobo lung yangere; atekerin likame sobolo kanyakino lilo nin.

¹¹(Wun jo miero iwacenu negi be rubangan kalikame ocweo malo kede lobo kobino muducaro gi ki wi lobo.)

¹²Rwot en otimo lobo kede twer mere; en esipo piny kede rieko mere, eyararo malo kede niang mere.

¹³Ka en ewaco dwane, pii atie malo kururo; en ekelo idoun ki ajikini me wi lobo. Emio kot meny di eko cwano yamo ki kakame ekano gi iye.

¹⁴Do jo dedede ming, doko kili kede ngec; jo kame timo caljwogi lewic mako gi; pien rubangan kobedo cal kame gin kicweo obedo gi me abe, doko da likame kikuo.

¹⁵Kony gi li, kibedo gikame kopoore bedo kede acae i kom gi; kibino amuducar i kare kame Rwot bino kelo kede alola i kom gi.

¹⁶Rubanga ka Yakobo likame cal bala gin; en ebedo ngat kocweo gi dedede di eko yero ateker me Isirael pi bedo jo mege amake; nyinge en Rwot me jo yi.

¹⁷Wun jo atie Yerusalem, kotieko lukaro wu! Miero icokunu jame wu.

¹⁸Pien Rwot owaco be, “Nan ango atie lwomo tenge bala aporocet jo kame bedo i lobo noni. Abino keto can alit i kom gi di kiko bilo da.”

¹⁹Yerusalem oko kok be, “Atie tin i can benyo pi awanon na! Apore na rac twatwal. Do di oudo ango atamo be ebedo gimoro atitidi kame atwero kanyakino!

²⁰Kotieko dudubo eema na; kococoto aunoi na dedede me twetweo en. Idwe na dedede otieko yai kibuta likame doko kitie. Likame tie ngatamoro abino yararo eema na bobo, kede lieliero isukan mege me isengena.”

²¹Ango ako dwoko be, “Jotel wa ming; gin likame kipenyo tam kibut Rwot. Manono en komio kop ocere negi di oko sarakino jo kame tie i cing gi.

²²Winyunu woo! Winyunu, etie bino! Manono obedo mor me tien gikame tie wok ki lobo atie tetu malo; ebino mino bomban me Yuda doko amejeko, kabuto me ikween.”

²³Okwe Rwot, ango angeo be likame dano twero kuo en kene iepone kame mitere; likame en kene etwero lubo yongayo apoore me aluba.

²⁴Riei jo ni, Okwe Rwot, do kur do ikangasaro, doko da kur itime kede gero pien manono bino mino imuducaro wa atwal atwala.

²⁵Bwot gero ni i kom atekerin kalikame paro piri, kede i kom jo kalikame wori. Pien gin kineko ikwae ka Yakobo; gin kimuducaro gi atwal atwala di kiko mino lobo gi odoko ameje.