Read kumam Yeremia 11 Bible Online

Yeremia 11 - kumam bible

Yeremia 11

¹Rwot oko waco na be,

²“Winy kope amako isikan noni, di iko waco ne jo me Yuda kede Yerusalem.

³Wace gi be ango, Rwot Rubanga me Isirael, abino keto ilam i kom dano moroni kalikame lubo cikere me isikan noni.

⁴En ebedo isikan kame bin ango atimo kede joakwari gi i kare kame akwanyo gi kede ki Misiri, lobo kame oudo cal negi bala epipa kodop me twako nyonyo. Oudo ango awaco negi pi winyo kop na di kiko timo gi dedede kame ango aciko negi. Awaco negi be kame gin kilubo kop na, gin kibino bedo jo na di ango ako bedo Rubanga gi.

⁵Manono koto ko mino ango acobo kwongere na kame atimo but joakwari gi, me mino gi lobo amio di lac, bala kame nataman kitie iye.” Ango ako dwoko be, “Ebo, Rwot.”

⁶Di Rwot oko waco na be, “Oti i bomban me Yuda kede i yote me Yerusalem di iko waco ne jo pi winyo kope me isikan noni di kiko lubo gi.

⁷Pien cako i kare kame ango akwanyo kede joakwari wu ki lobo me Misiri tuno tin, ango abedo kwenyaro jo nakanaka pi lubo kope na.

⁸Do gin likame kiko lubo kop na arabo ciko yit gi iye. Gin kiko lunyo timo gikame cuny gi mito pi epali kede tam areco kame kitie kede. Kite kame oudo ango aciko gi kede pi gwoko isikan noni di gin kiko dagi, omio ango ako kelo i kom gi alola kame oudo amoko i isikan noni.”

⁹Di Rwot oko waco na be, “Jo me Yuda kede jo me Yerusalem oribere jemo na.

¹⁰Gin kidok bobo i tim areco me joakwari gi me kare kasek, jo kame bin odagi winyo kop na; jo me Isirael kede jo me Yuda oturo isikan kame bin ango atimo kede joakwari gi.

¹¹Pi manono, nataman ango Rwot atie kwenyaro gi be, ateteni ango abino kelo can i kom gi kalikame kibino bwot kiye. Akadi bed bala kikok buta, do ango likame abino winyo koko gi.

¹²Di do jo abedo i bomban me Yuda kede jo kame bedo Yerusalem ko bino ot but rubangan kame lem gin kibedo mino giayala di kiko kok but gi pi koto konyo gi. Do rubangan nogo likame bino konyo gi.

¹³Pien rubangan kame gin kiworo odoko tot rom aroma kede bomban wu, Okwe wun jo me Yuda; doko da jo me Yerusalem ogero alutarin atot rom aroma kede yote me dier bomba gi, me woro gimoro me lewic, en Baal.

¹⁴Yeremia, kur ileg negi. Kur ikok buta arabo ileg buta pirgi, pien likame ango abino yei winyo kop gi ka kikok buta i esawa me peko.

¹⁵“Jo kame ango amaro otimo gikame rac twatwal omio likame kitie kede twero me bedo i tempulo na. Benyo, gin kiparo be cikere gi kede giayala gi me leini twero gengo can kame poore poto negi? Benyo, manono twero mino kibedo kede yomcuny?

¹⁶Ango oudo bin awaco negi be, ‘Wun icalunu bala yat olibeti alibaliba, atie kede anyakini acil.’ Do nan ango abino cwinyo yat nono kede twon idoran di ajange mege ko bino wang dopodop.

¹⁷“Ango Rwot me jo yi en kame apito Yuda kede Yerusalem bala pito yat. Do nan atie waco negi kop me kelo can i kom gi pi raco kame gin kitimo; gin kimio giayala but Baal di kiko wango cunya.”

¹⁸Rwot omia angeo tim areco kame jo oudo tie iiko i koma.

¹⁹Do ango gira oudo acal bala atin oromo amwol kame kotie tero ot neko. Ango gira oudo likame angeo be ango en kame oudo kitie poro kop i koma kakame kiwaco kede be, “Otongunu yat di pwodi kome yot; onekenu tetekeny kur bobo ngatamoro twer yutuno nyinge.”

²⁰Ango ako waco be, “Okwe Rwot me jo yi, ngat kame ngolo kop i ateni, ngat kame tamo cuny jo kede par gi, akwao icul kwor i kom gi di ango aneno, pien ango atieko jalo kope na dedede i cingi.”

²¹Jo me Anatot oudo mito neka, gin kiwaco na be, “Kur itimo imurai kan i nying Rwot, aso ka li, wan obino neki.”

²²Pi manono Rwot me jo yi oko waco be, “Ango abino mino gi alola; awobe gi kobino neko kede epima; idwe gi anyira kede awobe kec en kame bino neko.

²³Likame tie ngatamoro kibut gi kame bino dong. Pien ango abino kelo can i kom jo me Anatot i mwaka kame ango atieko moko me mino gi alola.”