Read kumam Yeremia 16 Bible Online

Yeremia 16 - kumam bible

Yeremia 16

¹Rwot oko waco na be,

²“Kur inyom dako, doko da kur inywal idwe i kabedo noni.

³Ango atie waco ni gikame bino timere i kom idwe kame konywalo kanoni, kede i kom jonywal gi kaman.

⁴Gin kibino to tuwo areco. Likame kobino koko gi, doko da likame kobino yiko gi. Kom gi bino rade piny kago atatai bala woyo. Kobino neko mogo i yi, kede mogo bino to kec; kom gi bino bedo cam me winy kede me leini me obar.

⁵“Kur idonyi i ot kame jo tie tururo iye pi dano oto, akadi ot kakame koko tie iye; kur ikok pi ngatamoro. Ango atieko kwanyo mulem na, amara na, kede cuny na me kisa kibut jogi.

⁶Jo me ruom amalo kede me ruom apiny gin dedede kibino to i lobo noni; likame kobino yiko gi, doko likame tie ngatamoro kame bino koko gi. Likame tie ngatamoro kame bino teteo kome amoto lielo wie pi nyuto iturur.

⁷Likame tie ngatamoro kame bino nywako cam kede ngat atie i koko, pi kweno cunye pi dano mere oto. Likame tie ngat kame bino kweno cuny dano nono akadi di papa mere amoto toto mere en oto.

⁸“Kur ioti i ot kame jo tie camo iye ebaga. Kur ibed piny iko donyo cam kede amata kede gi.

⁹Gikame ango Rwot me jo yi, Rubanga me Isirael awaco iye en ine be: ango abino jiko icelakin me yomcuny kede kilel me ibagai me nyom atie kanoni; jo me kanoni bino neno kede wang gi. Abino jiko dwan eteran kede dwan ateran.

¹⁰“Ka in iwaco ne jo kope nogi dedede, gin kibino penyi be, ‘Pinyo komio Rwot owaco kope me can adongodongo nogi dedede i kom wa? Raco wa nyo? Dub nyo kame otimo but Rwot Rubanga wa?’

¹¹In ibino dwoko negi be Rwot owaco be, ‘Etie kamanono pien joakwari wu olokere tenge kibuta di kiko donyo woro rubangan ace di kitio negi. Gin kiweka di kiko dagi lubo iswilia na.

¹²Do wun ikounu do timo gikarac kalamo joakwari wu; ngat acelacel kibutu odoko ngaepali di eko donyo lubo mit areco atie i cunye. Likame doko ilubunu kop na.

¹³Pi manono, ango abino kwito wu tenge ki lobo noni di ikounu ot poto i lobo kame wun akadi joakwari wu likame ingeunu, di do ikounu donyo woro rubangan apat ki kuno iwor kede iceng; likame abino bedo kede cuny me kisa i komu.’ ”

¹⁴Rwot waco be, “Ateteni kare bino tuno kame jo likame bobo bino lairo kede i nyinga, di kiwaco be Rubanga akuo kokwanyo jo me Isirael ki Misiri.

¹⁵Do kibino lairo i nyinga, di kiwaco be Rubanga akuo kokwanyo jo ki lobo atie tetu malo, kede ki lobere dedede kakame ango oudo ariamo gi iye. Pien ango abino dwoko gi i lobo gi amako gi, lobo kame ango bin amio joakwari gi, ango Rwot en awaco.”

¹⁶Rwot waco be, “Ango atie lwongo jo kame bino mako jogi bala ciko aporogo; doko abino lwongo jodwar atot kame bino dwaro gi bala dwaro le i wi mori dedede, kede i wi imukuran kede i aridata me lela.

¹⁷Pien wangango tie neno ekite me kuo gi; likame tie moro kopwono kibuta, dub gi tie kakaler i wanga.

¹⁸Abino mino gi cul tien are pi raco kede dub gi, pien gin kimunao lobo nango i yore me pongo iye caljwogi, gi kalikame kuo, gikame cunyango dagi neno.”

¹⁹Okwe Rwot, in en imia teko, doko in en igwoka, in en karingo na i esawa me peko. In en kame atekerin dedede bino bino buti wok ki ajikini me lobo di kiwaco be, “Joakwari wa oudo tie kede rubangan me abe kenekene, gimogo akony gi li, doko da kili kede bero moro.

²⁰Benyo, dano adana twero timo rubangan pirgi? Ka kitwero timo, udo magonogo likame obedo rubangan!”

²¹Rwot waco be, “Pi manono, ateteni ango abino pwonyo gi, abino mino atekerin ngeo twer kede teko na kicel atwal; gin kibino ngeno be ango en Rwot.”