Read kumam Yeremia 2 Bible Online

Yeremia 2 - kumam bible

Yeremia 2

¹Rwot oko waco na pi

²ot rabo ne jo me Yerusalem kop noni tetekeny gin kiwinyi. Rwot owaco be, “Ango ayutuno epone kame oudo imire kede buta i kare ni me eponga, amara kame oudo itie kede buta bala ateran; in oudo ibedo luba i wi tim, i lobo kalikame ocuwo iye kodi.

³Isirael, in oudo ibedo mera kikoma, kibuta in oudo ical bala cam acako cek i poti. Jo dedede kame oudo timo ni raco oudo bedo kede raco, ango oudo acwao negi can; ango Rwot en awaco.”

⁴Okwe winyunu kop ka Rwot, wun ikwae ka Yakobo, wun jo dedede me ateker me Isirael.

⁵Rwot owaco be, “Raco nyo kame bin joakwari wu oudo i koma en komio kiko lokere tenge kibuta? Gin kiko donyo woro gimogo akony gi li di gida kiko doko jo kame kony gi li.

⁶Gin likame kipenyo wi gi kakame ango Rwot ngat kokwanyo gi ki lobo me Misiri atie iye, ango ngat kame oudo atelo gi ki wi tim: itela koling di opong kede buge, lobo kotuo di opong kede peko, kakame ngatamoro likame beo iye, kakame ngatamoro likame bedo iye.

⁷Ango akelo wu i lobo amio, tetekeny iyomunu cunyu kede jamini dedede abeco kame wok kiye. Do kakame wun idonyunu kede iye, wun ikounu munao lobo na, wun imiunu gira odoko gikame neno rac.

⁸Josaseredoti likame openyere be, ‘Rwot tie tuai?’ Gin jo kame kitie kede niang atut i kom iswil likame kiko ngena. Jotel ojemo na; inabin otimo imurai i nying Baal, di kiko donyo woro gikame kony gi li.” Pi manono Rwot waco be,

⁹“Pi manono, ango Rwot amedo bobo pido wu, atie pido wu kiton ikwae wu.

¹⁰Kong otunu i cula me Sipuro di ikounu neno, cwaunu ngatamoro Kedar di en eko ngingico kiber; di ikounu neno ka gikame cal kamanoni otieko timere karamoro.

¹¹Likame tie ateker moro kotieko loco rubanga gi, bed bala likame gin kibedo rubangan me ateni. Do jo na otieko loco ango Rubanga kame gin kitieko neno deyo mere, kede gimoro akony mere li.

¹²In malo, mi kop noni nek komi, mie ebed ni gi me aura, mie eony koyo i komi, Rwot en owaco;

¹³pien jo na otieko timo jamini areco are: gin kitieko weka, ango ngat kame abedo negi bala atan me pii amio kuo, di gin kiko lunyo kukunyo ataneko gi, ataneko kame buge gi obabarun, manono mio pii likame cungo i yi gi.” Rwot waco be,

¹⁴“Benyo, Isirael obedo epasoit? Benyo, en ebedo ngatic kame konywalo anywala i paco? Do pinyo kara doko komio en edoko bala le me adwara but jokwor mege?

¹⁵Gin kidorano ne bala inguon, gin kidorano kitek twatwal. Gin kidudubo lobo mere odoko gikame kony mere li; kituturo bomban mege odoko amejeko abongo jo iye.

¹⁶Medo i wi manono, jo me Mempi kede Tapankes bino bebelo wie.

¹⁷Isirael, mam in en ikelo can noni i komi keni pi kite kame iweka kede, ango Rwot Rubanga ni, kakame ango abedo telo wu kede i yongayo?

¹⁸Iparo be nyo aber kame ibino udo kame ioto Misiri, pi mato pii me ecilet me Nail? Arabo iparo be nyo aber kame ibino udo kame ioto Asiria, pi mato pii me ecilet me Eupurate?

¹⁹Dub ni en abino bitaro in, lokere ni tenge kibuta en abino ronkino in. Ngei kiber be ebedo gikame rac doko ekelo lito pi in weko ango Rwot Rubanga ni; in likame itie kede wor buta. Ango Rwot Rubanga me jo yi en awaco.”

²⁰Rwot waco be, “Isirael, bin sek in ituro ayoko nin, doko di iko coto auno ki tieni, di iko waco be likame ibino tic nango. I wi imukuran aboco, i dud yen oduko in itimo malaya i yore me woro rubangan ace.

²¹Do di oudo ango amio wu ibedunu bala olok aber kame koyero di oko pito, nyige abeco adikinicel en kame kopito. Epone mene kame bobo idwogunu kede piny di ikounu doko bala olok akony mere li?

²²Akadi bed bala ilwokere kede sabuni moro me aura, akadi di ikuao sabuni tin benyo, do ango pwodi abino neno raco ni. Ango Rwot Rubanga en awaco.

²³Epone mene kame in itwero waco kede be in likame imunaun, be likame in itieko woro Baal? Nen kong dub kame in itimo i aditot; nen gikame itimo. In ical bala atin aguragura kame taco di eringo i bad dedede;

²⁴ical bala punda me obar adako kotieko nao bedo i wi tim, en eunyo kame etie mito icuo! Ngai kame karuno gengo mit mere me icuo? Cuo kame mite kur lol kom gi di kiko udo olo me riamere kede; gin kibino ude i kare kame etie mito kede icuo.

²⁵Isirael, gwokere kur amuka ni dude camere, doko da kur imi dwani tui orio pi wire mono rubangan ace. Do in iwaco be, ‘Mano kop me nono, ango gira amaro rubangan me kumbor, doko abino lubo gi.’ ”

²⁶Rwot waco be, “Bala kame lewic mako kede ngakuwo ka komake, kamanono da lewic bino mako wun jo me Isirael. Lewic bino mako abakai, jotic adongo, josaseredoti kede inabin wu.

²⁷Lewic bino mako wun dedede, wun jo kame iwacunu be yat kame kosipo obedo papa wu, kede be engaro kame kopao obedo toto wu. Manoni bino timere pien wun ilokunu nango ngei wu akaka loko nango nyimu. Do ka peko opoto ne wu, wun ikounu kwana pi lako wu.

²⁸“Do rubangan kame oudo itimunu piru tie tuai? Ka itienu i peko ber gin kibin kikonyu ka kitwero! Okwe Yuda, in itie kede rubangan atot rom kede bomban kame itie kede.

²⁹Ingungur nyo en kame itie kede i koma? In ijemo nango. Ango Rwot en awaco.

³⁰Ango abungi pi rieni, do manono likame okonyo; in idagi yei kop nango me rieni. In ineneko inabin ni bala engu kowor.

³¹Wun jo me Isirael me i kare noni, winyunu kop kame ango Rwot atie waco ne wu. Benyo, ango abedo ne wu bala wi tim arabo bala lobo acol cucucuc kopong kede peko? Kara pinyo doko komio wun jo na iwacunu be ibinunu timo bala kame cunyu mito, be likame bobo ibinunu dwogo buta?

³²Benyo, wi nyako twero wil kede mwolere mege, arabo wi ateran twero wil kede egoe mere me nyom? Do jo nango wi gi otieko wil kede ango pi mwakini kalikame marere.

³³Wun itienu kede diru me mono ipalon. Akadi mon areco da itiekunu pwonyo gi i kuo wu nono.

³⁴Doko da lak igoen wu opwokere kede remo me jocan ali kede raco moro, kame wun inekunu; likame inekunu gi be pien gin jokuwo kame iudunu di tie turo ude wu. “Do akadi bed bala magonogi dedede otimere,

³⁵wun iwacunu be iliunu kede raco moro, kede be ango Rwot atieko weko bedo kede gero butu.

³⁶Pinyo komio kara wun iwirenu tuni kede tuca but rubangan apat abongo bedo kede tam? Jo me Misiri bino mino lewic mako wu bala kame jo me Asiria omio wu kede lewic.

³⁷Wun ibinunu dwogo ki kuno di lewic opong i wi wu. Ango Rwot atieko dagi jo kame wun iketunu gen wu i kom gi; likame tie gimoro aber kame ibinunu udo kibut gi.”