Read kumam Yeremia 20 Bible Online

Yeremia 20 - kumam bible

Yeremia 20

¹Ngasaseredoti Pasikur wot ka Imer, ngat koudo obedo ngadwong me tempulo oko winyo di ango ayamo kope amako alola koyaro poto Yerusalem.

²Pasikur oko mino kobunga di oko ridakino tiena kede alorito i Erute ka Benjamin, katie malo me tempulo.

³Oru mere odiko ingei Pasikur gonya ki alorito, ango ako waco ne be, “Likame Rwot lwongo nyingi be Pasikur, do nying kame en emi en ‘Lworo ki bad dedede.’

⁴Rwot kikome owaco be, ‘Ango abino mino ikelo lworo i komi keni kede but jowoti, doko da jokwor gi bino neko gi di in itie neno. Abino mino jo dedede me Yuda i cing abaka me Babilon, di en eko bino neko gi kede epima.

⁵Ango abino mino abar me bomba noni, ud mege dedede kede jamini mege apirgi tek, kede jamini apirgi tek me abakai me Yuda i cing jokwor gi. Gin kibino mano jamini nogi di kiko tero gi Babilon.

⁶Do in Pasikur kede jo me turi dedede, kobino mako wu di oko tero wu Babilon bala mabus. Ibinunu to di oko yiko wu kunono, karacel kede jowoti kame oudo ibedo murao negi kope me abe.’ ”

⁷Rwot, in ingala, ango ako yei ngalere. In itek kalamo ango, doko da itieko bwona. Ango atieko doko gikame jo nyero piny yuluyul; jo dedede do nywara anywara.

⁸Kame atie yamo, miero ayam kop kede dwan amalo di aredo be, “Tim me gero kede muducaro!” Ceng dedede jo tie nyera di kicaa pi rabo kop nin.

⁹Ka ango awaco be, “Likame bobo ango abino tamo pi Rwot, arabo meede yamo kop i nyinge,” manono ko mino kope ni liel i cunya kede i cogere na bala mac. Atamo be koto agenge kur ewoki, do likame ako twero.

¹⁰Awinyo di jo atot weweo be, “Lworo tie kabedo dedede! Pi manono opidenu!” Akadi jowota kiyapiyapi keda tie daro neno epone kame ango abino getar kede. Gin kiwaco be, “Cengemogo kobino ngale di do wan oko bwone di oko culo kwor i kome.”

¹¹Do Rwot in itie i bad nango bala ngayi atek kame jo lworo, manono bino mino jo kame tie tidilo ango iik gi poto. Lewic bino mako gi adikinicel, pien iik gi likame bino cobere. Likame wi jo bino wil kede lewic komako gi.

¹²Do Rwot me jo yi, in itamo jo kopoore, in ineno cuny gi kede tam gi; miango anen kite kame in iculo kede kwor i kom jokwor na, pien ango atieko jalo kope na dedede i cingi.

¹³Werunu but Rwot; pakunu Rwot! Piento en elako jocan ki cing jo kame timo tim areco.

¹⁴Ilam mak ceng kame konywala iye! Kur ceng kame toto na onywala iye bed kede winyo!

¹⁵Ilam mak ngat kame bin otero rwonge aber but papa na di ewaco ne be, “Konywalo ni atin awobi,” di papa na oko bedo kede yomcuny adwong.

¹⁶Poore icuo nono bed cal bala bomban kame Rwot omuducaro abongo kisa. Poore dano nono winy koko me lito odiko di eko winyo agwara me yi i dier iceng,

¹⁷piento en edagi bin nekango di pwodi atie i yi toto na. Manono oudo koto omio toto na obedo ates na, di yie oko bedo dwong nakanaka.

¹⁸Pinyo kara komio ango awok ki yi toto na? Benyo, pi timo tic atek kede bedo kede cwercuny, kede pi bedo kede lewic i kare dedede me kuo na?