Read kumam Yeremia 21 Bible Online

Yeremia 21 - kumam bible

Yeremia 21

¹Abaka Esedekia me Yuda oko cwano Pasikur wot ka Malakia kede ngasaseredoti Sepania wot ka Maseya buta kede kop kame waco be,

²“Okwe ber peny Rwot pirwa, pien Abaka Nebukadunesa me Babilon osuro wa; cengemogo Rwot bino timo ne wa gi me aura bala kame lem ebedo timo nakanaka, di eko mino Nebukadunesa dok cen.”

³Ango ako waco ne jo kame oudo kocwao buta

⁴pi ot waco ne Esedekia gikame Rwot, Rubanga me Isirael oudo owaco be, “Esedekia, jamini me yi atie i cingu, kame itienu tic kede gi me yi kede abaka me Babilon kede jo Kaludea, gin jo kame nan tie luko wu i ooko me apama me cel, jamini me yi nogo ango abino wiro wi gi neno tetu dier bomba, di ako bino coko gi karacel kunono.

⁵Ango kikoma abino yi kede wu kede teko na dedede, di atie kede twon gero, lilo kede wangcuny.

⁶Abino neko gi dedede atie i bomba, jo karacel kede leini; gin dedede aumpuli bino neko gi.

⁷Ingei manono, in Abaka Esedekia, kede jotic ni, karacel kede jo dedede kobwot ki yi, ki kec, kede ki aumpuli, abino mino wu i cing Abaka Nebukadunesa me Babilon, i cing jokwor wu, jo kame mito neko wu. Nebukadunesa bino neko wu, likame tie ngatamoro kame ebino weko, doko da likame ebino nyuto kisa amoto mwolo; ango Rwot en awaco.”

⁸Rwot oko waco na pi yamo ne jo be, “Nenunu, ango Rwot atie cibo i nyimu yote are: yongayo atero wu i kuo kede yongayo atero wu i to. Yerunu yongayo acel.

⁹Jo dedede kame bino dong i bomba kobino neko, arabo kibino to kec amoto tuo. Do jo kame bino donyo ooko di kiko rieno cing gi but jo me Babilon, gin jo kame nan tie suro bomba, likame kobino neko gi; kuo gi bino bwot.

¹⁰Ango atieko moko tam na pi timo ne bomba noni can do weko bero. Kobino mine i cing abaka me Babilon di en eko bino wange dopodop; ango Rwot en awaco.”

¹¹Rwot oko waco na pi waco kaman ne jo me ot ka abaka me Yuda, gin ikwae ka Daudi: “Winyunu gikame ango Rwot atie waco. Buli ceng acelacel nenunu be ingolunu kop kakare. Lakunu jo kame kotie timo negi kuwo ki cing jo kame timo negi adiadia. Aso ka li, gero na bino liel bala mac kalikame nekere pi raco kame itienu timo.

¹³Nenunu, ango likame cunya yom i komu, wun jo kame ibedunu malo me aditot, i wi lela kopetere. Wun iwacunu be likame tie ngatamoro kame twero bino suro wu amoto turo apama wu me cel.

¹⁴Do ango abino mino wu alola pi tice wu. Abino cwinyo mac i paco wu me abaka, di eko bino wango gi dedede atie i ngete; ango Rwot en awaco.”