Read kumam Yeremia 23 Bible Online

Yeremia 23 - kumam bible

Yeremia 23

¹Rwot waco be, “Kitie i can jotel kame muducaro jo na kede kame sarakino gi. Gin kical bala jokwat kame tie sarakino kede muducaro romini na!”

²Pi manono, Rwot Rubanga me Isirael tie waco kop i kom jotel, gin jokwat kame poore gwoko jo mege kaman: “Wun likame inenunu be igwokunu romini na; wun isarakinunu gi di ikounu riamo gi tenge. Pi manono, ango abino neno be aketo can i komu pi gikareco kame itimunu.

³Di do ango kikoma ako coko donge me romini na ki lobere kame ango asarakino gi iye, di ako dwoko gi i anok gi, di gin kiko bino nywal di kiko nyai.

⁴Ango abino keto negi jokwat kame bino gwoko gi di likame bobo kiko bedo kede lworo amoto mielkom; doko da likame tie moro kame bino rwenyo; ango Rwot en awaco.”

⁵Rwot waco be, “Ateteni kare bino tuno kame ango abino yero kede dano kopoore kobedo akwar Daudi pi bedo abaka; en ebino pug kede rieko, di etimo gikame tie kakare kede me ateni i lobo mere.

⁶I kare mere me pug, Yuda bino bedo abongo peko moro, doko da Isirael bino bedo kede anapakin. En kobino lwonge be ‘Rwot Timo ne wa Gikame opoore’.

⁷“Ateteni kare bino tuno kame jo likame bobo bino lairo kede i nyinga, di kiwaco be Rubanga akuo kokwanyo jo me Isirael ki Misiri.

⁸Do kibino lairo i nyinga, di kiwaco be Rubanga akuo kokwanyo jo me Isirael ki lobo atie tetu malo, kede ki lobere dedede kakame ango oudo ariamo gi iye. Di do gin kiko bino bedo i lobo gi amako gi.”

⁹Cunya onyote, cogere na dedede tie miel amiela; adoko do cal bala dano omer, bala dano kame bwini obwono wie, pi Rwot, pi kope mege kacil.

¹⁰Pien lobo noni opong kede jo kame woro rubangan apat; ekite me kuo gi reco, doko da likame kitio kede twer gi i yore kopoore. Lobo tie tururo pien Rwot olame, lum me obar da otuo.

¹¹Rwot waco be, “Inabin kiton josaseredoti likame nyuto wor buta; ango atieko neno gikarac kame gin kitimo kiton i tempulo da.

¹²Pi manono, yongayo gi bino bedo negi bala yote apwot di piny oyuikino, kame kobino riamo gi kilubo di kiko popoto. Pien ango abino keto can i kom gi i kare kame abino mino gi kede alola; ango Rwot en awaco.

¹³Ango atieko neno gimoro aneno rac but inabin me Samaria: gin kimurao i nying Baal di kiko rwenyo jo na me Isirael.

¹⁴Do atieko neno gikame rac kalamo but inabin me Yerusalem: gin kitimo adote, doko kiyamo kope me abe; gin kikonyo jo meede ameda kede tim areco, manono omio likame tie dano moro aweko timo gikarac. Kibuta, inabin nogo dedede otieko doko reco bala jo me Sodoma, jo kame bedo Yerusalem do cal bala jo me Gomora.

¹⁵“Pi manono, ango Rwot me jo yi atie yamo kop i kom inabin nogo kaman: ango abino mino gi kicamo yat akec kede ako mino gi kimato pii atie kede poison iye; pien inabin me Yerusalem otieko mino jo dedede me lobo noni oweko bedo kede wor buta.”

¹⁶Rwot me jo yi waco ne jo me Yerusalem be, “Kur iyeunu winyo kope kame inabin tie waco ne wu, gin kitie waco ne wu kope me nono. Gin kiwaco kope kame gin kitamo kede wi gi ken gi, do weko kope kame ango awaco.

¹⁷Nakanaka gin kiwaco ne jo kame dagi kop na be gi dedede bino bedo negi kiber. Doko da kiwaco ne joepali kame lubo tam me epali atie i cuny gi be likame tie can moro kame bino poto negi.”

¹⁸Ango ako waco be, “Do ngai kibut inabin nogi otieko bedo i kansulo ka Rwot, pi winyo kede niang kop mere? Ngai kibut gi otieko ciko yite i kop mere tetekeny ekaruno tatamo en?

¹⁹Gero ka Rwot cal bala twon yamo; yamo agwai me kot kame bino buko i wi jo areco.

²⁰Gero mere likame bino jik, tuno di etieko timo kede cobo gikame tie i tam mere. Ibinunu niang manoni kiber di kare otieko kato.”

²¹Rwot waco be, “Ango likame acwao inabin nogi, do gin kiringini aringin butu. Ango likame awaco negi kop moro, do gin pwodi kibino yamo ne wu kop i nyinga.

²²Do ka koto oudo gin kitieko bedo i kansulo nango, koto oudo kitatamo kope na ne jo na, di koto kiko loko gi tenge ki yote areco me kuo gi, kede ki tice gi areco.”

²³Rwot waco be, “Mam ango abedo Rwot kame tie i kabedo dedede do weko i kabedo acel kenekene?

²⁴Ngai kame twero pwono nango i kabedo kalikame ango atwero nene kiye? Mam ango atie i kabedo dedede me i malo kede i wi lobo?

²⁵Ango angeo gikame inabin kame waco kope me abe i nyinga tie waco, di kisidiko be, ‘Aleko, Rubanga omia aleko kop mere!’

²⁶Ebino bedo kamanoni pi kare arom kamene? Gin kitamo be kibino meede sarakino kope me abe nogi, kope kame wok ki tam gin ken gi pi kare arom kamene?

²⁷Gin kiparo be lek kame gin kiwaco ken gi ken gi bino mino wi jo na wil i koma, bala kame wi joakwari gi owil kede i koma di kiko donyo woro Baal.

²⁸Poore enabi koleko wac be manono obedo lek aleka, do enabi kowinyo kop nango poore ebed dano agenere i tatamo kop nono. Likame kotwero poro nyige me kal kede cucung; ango Rwot en awaco.

²⁹Mam kop nango cal bala mac, kede bala enyondo kame bebelo lela di eko ngingido en?

³⁰Nenunu, pi manono, ango likame cunya yom i kom inabin kame winyo kop kibut jowot gi di kiko donyo tatamo ne jo di kiwaco be kope nango igonogo.

³¹Doko da likame cunya yom i kom inabin kame yamo kope gin do di kiko loko be, ‘Rwot en owaco.’

³²Ango Rwot atie waco be, ango likame cunya yom i kom jo kame tatamo ne jo lek me abe, di kiko rwenyo jo na kede kope gi me abe nogo kede ewaka gi, do di udo likame ango acwao gi arabo aciko negi be kioti; pi manono, likame tie bero moro kame gin kitwero timo ne jo.”

³³Rwot oko waco na be, “Yeremia, kame ngatamoro kikom jo na, arabo enabi moro, arabo ngasaseredoti moro openyi be, ‘Kop nyo kame Rwot omio wa bala yec?’ In ibino waco ne be, ‘Wun en ibedunu yec but Rwot, doko da en ebino uco wu.’

³⁴Ka enabi moro, arabo ngasaseredoti arabo ngatamoro owaco kop kame waco be, ‘Yec kame Rwot omio wa,’ ango abino mino gi alola kede jo me miere gi.

³⁵Akaka manono, ngat acelacel bino yamo ne ngawote amoto ne omin mere be, ‘Rwot odwoko benyo? Rwot owaco benyo?’

³⁶Aso, likame gin doko kipoore meede kede yamo kop kame waco be ‘yec kame Rwot omio wa’, pien kop kame dano acelacel waco en kame tie yec bute; pi manono jo totolo kope na, ango Rubanga akuo, Rwot me jo yi, en Rubanga gi.

³⁷Pi manono, ka dano ooto but enabi, en etwero penye be, ‘Rwot odwoko benyo? Rwot owaco benyo?’

³⁸Do ka gin kiko waco kop kame waco be ‘yec kame Rwot omio wa’, do di ango atieko waco be kur kiwac kamanono,

³⁹pi manono, ango abino kwanyo gi di ako uco gi kakabor keda, gin karacel kede bomba kame ango amio gi kede joakwari gi.

⁴⁰Ango ako bino kelo i wi gi lewic kame bedo nakanaka, kalikame wi dano moro bino wil iye.”