Read kumam Yeremia 24 Bible Online

Yeremia 24 - kumam bible

Yeremia 24

¹Rwot oko nyuto na ibukito are me anyakini me epigi di koketo gi i nyim tempulo mere. (Manoni oudo obedo ingei kare kame Abaka Nebukadunesa me Babilon omako kede ki Yerusalem Abaka Yekoyakin me Yuda, en wot ka Yekoyakim, karacel kede jotic adongo me Yuda, jopac kede jotet di eko tero gi Babilon.)

²Ebukit acel oudo tie kede anyakini abeco me epigi, anyakini kogeo cek me agege; do ebukit ocelu oudo tie kede anyakini areco me epigi, oudo kireco likame kitwero camere.

³Di Rwot oko penya be, “Yeremia itie neno nyo?” Ango ako dwoko be, “Atie neno anyakini me epigi. Anyakini abeco mege, beco adikinicel, do areco mege reco adikinicel, likame kitwero camere da.”

⁴Di Rwot oko waco na be,

⁵“Ango Rwot Rubanga me Isirael awaco kaman: jo me Yuda kame bin ango acwao tenge ki kan ot Babilon, abino tero gi bala anyakini me epigi abeco nogi.

⁶Ango abino ciko wanga i kom gi pi gwoko gi, di ako bino dwoko gi i lobo noni. Ango abino gero gi do weko turo gi piny; abino pito gi bala yat do weko puto gi.

⁷Ango abino mino gi cuny me mito ngeno be ango en Rwot; gin kiko bino bedo jo na di ango ako bedo Rubanga gi, pien gin kibino dwogo buta kede cuny gi dedede.

⁸“Ango Rwot awaco be, do Abaka Esedekia me Yuda, jotic mege adongo, kede jo me Yerusalem kodong i lobo noni, kede jo kame bedo i lobo me Misiri, abino tero gi bala anyakini me epigi nogi areco reco kalikame kitwero camere kede.

⁹Abino keto can i kom gi di kiko doko gikame neno kelo ne jo lworo, gikarac but atekerin dedede me wi lobo. Gin kibino doko gi me lewic, agole me ayama, gi me acae, kede kobino tic kede nying gi me ilam i kabedo dedede kame ango abino riamo gi iye.

¹⁰Abino cwano negi yi, kec kede aumpuli, tuno di gin dedede kitieko amuducar i lobo kame ango amio gi kede joakwari gi.”