Read kumam Yeremia 27 Bible Online

Yeremia 27 - kumam bible

Yeremia 27

¹I agege me apugan ka Abaka Esedekia wot ka Yosia bala abaka me Yuda, Rwot oko waco na

²pi timo ayoko me yen kame kotwetweo kede dele di ako kete i nguta.

³En eko waco na pi cwano kop ne abakai me Edom, Moab, Amon, Taya kede ne abaka me Sidon, di acwao jocungo negi kame oudo obino Yerusalem pi neno abaka Esedekia me Yuda, pi tero negi kop nono.

⁴Rwot me jo yi, Rubanga me Isirael oko waco na pi ciko negi ot waco ne jodongo gi gikame en ewaco be,

⁵“Ango kede twer na adwong kede teko na en kame acweo lobo, kede jo kede leini kame tie iye; doko da ango atwero mine but ngat kame cunya opwoyo.

⁶Nan ango atieko mino lobere nogi dedede i cing ngatic na Abaka Nebukadunesa me Babilon, ango atieko mine kiton leini me obar da pi timo ne tic.

⁷Atekerin dedede bino tic nen; doko da kibino tic ne wode kiton ne akware, tuno i kare kame ajakanut mere bino poto kede. Di do atekerin atot kede abakai me aura ko bino tero jo me ajakanut mere kidoko ipasoi.

⁸“Do ka ateker moro arabo ajakanut moro oko dagi tic ne Nebukadunesa abaka me Babilon, arabo ka edagi jalere i cing abaka me Babilon noni bala twon kame rwako ngute i ayoko, ango abino mino ateker nono alola i yore me yi, kec kede tuwo, tuno di amio Nebukadunesa omuducaro en atwal atwala.

⁹Pi manono, kur iyeunu winyo kope me inabin wu, kede me jo kame ngingico gimoro di kiko sidiko waco kope me anyim, arabo jo kame gonyo lek, arabo kame penyo tipere me jo oto amoto jwogi pi ngeno gikame bino timere. Gin kitie waco ne wu be kur iyeunu jalere i cing abaka me Babilon.

¹⁰Gin kitie ngalo wu, doko manono bino mino jokwor mako wu di kiko tero wu tenge kakabor kede lobo wu. Ango abino riamo wu tenge, di oko bino muducaro wu.

¹¹Do ka ateker moroni oyei jalere i cing Abaka Nebukadunesa di eko donyo tic ne, ango abino weko ateker nono dong bedo i lobo mere, pi pure kede bedo iye; ango Rwot en awaco.”

¹²Ango ako waco ne Esedekia abaka me Yuda kop nono be, “Jalere i cing abaka me Babilon, di iko tic nen kede jo mege di iko bino kuo.

¹³Pinyo kamio in kede jo ni ipoorenu to to me epima, to me kec, kede to me aumpuli? Pien manoni en gikame Rwot owaco be bino timere ne ateker moroni kalikame bino jalere i cing abaka me Babilon.

¹⁴Kur iwiny kop kame inabin tie waco ni be kur ijalere i cing abaka me Babilon, gin kitie waco ni kop me abe.

¹⁵Rwot owaco be en likame ecwao gi, do kenekene gin kitie ngalo wu i nyinge. Pi manono en ebino riamo wu tenge di oko bino neko wu, wun karacel kede inabin atie waco ne wu kope me abe nogo.”

¹⁶Di ako waco ne josaseredoti kede ne jo be Rwot owaco be, “Kur iwinyunu kope me inabin wu kame tie waco be kobino dwoko ki Babilon oyotoyot jamini kame kotio kede i tempulo, pien gin kitie ngalo wu.

¹⁷Kur iwinyunu kop gi; jalerenu i cing abaka me Babilon di ikounu bino kuo! Pinyo kamio miero bomba noni dok ameje?

¹⁸Ka ateteni gin kibedo inabin, kede ka gin kitie kede kope nango, ber kong kikwai Rwot tetekeny jamini anonok kodong i tempulo kede i paco me abaka kur ter gi Babilon.”

¹⁹Kakame Abaka Nebukadunesa omako kede Abaka Yekoyakin me Yuda, wot ka Yekoyakim, karacel kede jotel ace me Yuda di eko tero gi Babilon, en bin eko weko ipirin are me nyonyo buronsi, epipa adwong me pii, icegeren me cibo kalayan kede jamini ace apat me tempulo kede me paco me abaka.

²¹Do Rwot me jo yi, Rubanga me Isirael waco be, “Jamini kodong i tempulo kede i paco me abaka,

²²kobino tero gida Babilon di kiko dong kunono tuno i ceng kame ango abino keto kede tam na i kom gi, di do ango ako bino kelo gi di ako dwoko gi kanoni.”