Read kumam Yeremia 29 Bible Online

Yeremia 29 - kumam bible

Yeremia 29

¹Ango bin ako wandiko baluwa ki Yerusalem di ako cwano but joadongo, josaseredoti, inabin, kede but jo dedede kame oudo pwodi odong kikom jo kame bin Nebukadunesa otero Babilon, di ekwanyo gi ki Yerusalem bala mabus.

²Ango bin awandiko baluwa noni i cen di Abaka Yekonia, toto mere, jotic me paco me abaka, jotel me Yuda kede me Yerusalem, jodiru me tice apapat, kede jotet oudo kotieko kwanyo kotero ki Yerusalem bala mabus.

³Bin ango ako cwano baluwa noni kede Elasa wot ka Sapan kede Gemaria wot ka Kilikia, jo kame oudo Abaka Esedekia me Yuda ooro Babilon but Abaka Nebukadunesa me Babilon. Baluwa nono oudo somere kaman:

⁴“Rwot me jo yi, Rubanga me jo me Isirael waco ne jo dedede kame en eyei be kwany gi bala mabus ki Yerusalem di oko tero gi Babilon be,

⁵‘Gerunu ude di ikounu bedo iye. Pitunu cam i poti di ikounu camo gikame ipurunu.

⁶Nyomerenu di ikounu nywalo idwe; nyomunu ne awobe wu mon, doko miunu nyom anyira wu, tetekeny gida kinywal idwe. Miero wel wu meede do kur edok piny.

⁷Timunu tic pi bero me bomba kame ango amio kotero wu iye bala mabus, doko legunu buta pire, pien bero mere en bero wuda.

⁸Pien ango Rwot me jo yi, Rubanga me jo me Isirael, awaco be kur imiunu inabin kame tie kede wu ngalu, arabo jo kame waco be gin kikaruno tuco kop me anyim. Kur iyeunu winyo kop me lek kame gin kileko.

⁹Gin kitie waco ne wu kope me abe i nyinga. Ango likame acwao gi. Ango Rwot en awaco.’

¹⁰“Rwot waco be, ‘Ka mwakini ot kanyaare me apugan me Babilon otiek, ango abino paro piru di ako cobo cikere na me dwoko wu paco.

¹¹Pien ateteni ango angeo iik kame atieko timo piru, iik me mino wu mulem do weko me kelo ne wu peko, iik me mino wu bedo kede gen aber me kuo me anyim.

¹²Di do wun ikounu bino koko buta. Ibinunu kwana di ango ako winyo kwac wu.

¹³Ibinunu mona di ikounu wuda; ka imoanu kede cunyu lung,

¹⁴ibinunu wuda, doko abino dwoko ne wu mulem wu. Abino coko wu ki pinye dedede kede ki kabedere dedede kame asarakino wu iye, di ako dwoko wu kabedo kame oudo akwanyo wu kiye di ako tero wu bedo bala mabus obukui.’

¹⁵“Pien wun iwacunu be, ‘Rwot otieko mino wan inabin i Babilon,’

¹⁶manono omio Rwot owaco kop i kom abaka kame bedo i wi kom me ajakanut ka Daudi, kede i kom jo dedede kame bedo i bomba noni, gin en joawade wu kalikame bin kotero bala mabus kede wun be,

¹⁷‘Ango ayaro kelo negi yi, kec kede aumpuli, di ako mino gi kidoko cal bala anyakini me epigi kotop, kalikame dano karuno camo.

¹⁸Abino tuparo cwano negi yi, kec, kede aumpuli, di ako mino gin kibedo jo kame atekerin me wi lobo lung neno di kiko bedo kede lworo pi gi kotimere negi. Atekerin dedede kame ango asarakino gi but gi bino yisiro gi di kicao gi, doko kibino tic kede nying gi me lamo jo.

¹⁹Manoni bino timere negi pien gin kidagi lubo kop na kame abedo cwano kede inabin jotic na tien kede tien but gi pi waco negi, do gin kidagi winyo.

²⁰Do nataman wun jo dedede kame oudo ango akwanyo wu ki Yerusalem di ako cwano wu bala mabus Babilon, winyunu kop kame ango Rwot atie waco.’

²¹“Rwot me jo yi, Rubanga me jo me Isirael, otieko waco kop i kom Akab wot ka Kolaya kede Esedekia wot ka Maseya, jo kame tie waco kop me abe i nyinge. En ewaco be en eyaro mino gi i cing Abaka Nebukadunesa me Babilon di en eko neko gi di wun inenunu.

²²Jo dedede me Yuda kame tie Babilon bala mabus bino tic kede nying gi me lamo jo be, ‘Akwao Rwot tim ni bala Esedekia kede Akab, jo kame abaka me Babilon obulo kede mac di kikuo.’

²³Manoni bino timere negi pien gin kitimo tim me mingo twatwal i Isirael; gin kitimo adote kede mon me jo icegun, doko kitieko yamo kope me abe i nying Rwot di en likame ewaco negi. Rwot ngeo gikame gin kitieko timo, doko en ebino bedo mujura iye. Manono Rwot en owaco.”

²⁴Rwot oko waco na pi waco ne Semaya me Nekelam be

²⁵Rwot me jo yi, Rubanga me Isirael owaco be, “In icwao baluwa i nyingi but jo dedede me Yerusalem, kede but ngasaseredoti Sepania wot ka Maseya, kede but josaseredoti dedede di iwaco be

²⁶Rwot kikome otieko keti pi bedo ngasaseredoti akaka Yekoyada, tetekeny in bala ngatic kame lo ot ka Rwot inen be jo kame wi gi dubere di kiko cuko be gin inabin komako gi di oko tweno gi kede irikoi, kede di oko tweno lilim i ngut gi.

²⁷Aso, kara do nyo komio in likame iko timo ne Yeremia wot ka Anatot kamanono, ngat kame tie cuko tatamo ne wu kop bala enabi?

²⁸Pien ateteni etieko cwano ne wan kop i Babilon di ewaco be wan oyaro tieko kare kalac kan; poore oger ude di oko donyo bedo iye, opur poti di oko camo cam kame wok kiye.”

²⁹Ngasaseredoti Sepania oko somo na baluwa noni.

³⁰Di Rwot oko waco na be

³¹acwai kop but jo dedede kame tie Babilon bala mabus di awaco negi be Rwot owaco kop i kom Semaya wot ka Nekelam be, “Pien Semaya otieko waco ne wun kop, bed bala ango oudo likame aore, di eko mino wun iketunu gen wu i kom kop me abe,

³²ango ayaro mine alola en karacel kede ikwae mege. Likame tie dano mere moro kame tie i kom jogi kame bino dong kuo, doko likame en ebino neno jamini abeco kame ango abino timo ne jo na, piento en etieko waco kope kame kelo jemo buta. Ango Rwot en awaco.”