Read kumam Yeremia 3 Bible Online

Yeremia 3 - kumam bible

Yeremia 3

¹Rwot waco be, “Ka icuo oriamo dako mere di dako nono oko ot nyomere kede icuo ace, iparo be cware me agege bobo dwoko dako nono? Tim noni munao lobo atwal atwala. Do in Isirael itieko timo malaya kede cuo atot, iparo be itwero bobo dwogo buta? Ango Rwot en awaco.

²Ngoloro ber malo i wi imukuran iko neno! Tuai kalikame itimo iye malaya ni kede rubangan ace? In ibedo i nget yote daro ipalon ni, bala kame Muarabu pwono kede pi kuro jo atie ot ki wi tim. In imunao lobo noni kede tim ni me malaya.

³Manono en komio ango Rwot agengo kot, kot me oro amoto me iporo do likame cwei; do in pwodi wangi tek ateka bala me malaya, kom likame lewic maki da.

⁴“Nan itie waco na di wangi tek be, ‘In en papa na, in oudo imara di pwodi atitidi.

⁵Likame ibino ngoi keda nakanaka; likame ibino bedo ger keda kare dedede.’ Epone noni en kame in iyamo kede, do in itieko timo gikareco dedede bala kame itwero.”

⁶I kare kame Abaka Yosia oudo pugo kede, Rwot oko waco na be, “Mam ineno gikame Isirael, dako acar no otimo? En etieko ot i wi imukuran dedede aboco, i dud yen dedede oduko, di eko timo malaya mere iye.

⁷Ango oudo ako tamo be, ingei en tieko timo tim mere nono, ebino dwogo buta. Do en likame eko dwogo buta; Yuda, amin mere kalikame genere oneno gi nogo dedede.

⁸Yuda oneno be, pi tim me adote ka Isirael, dako acar nono, ango ako pokere kede di ako riame. Do Yuda da, amin me Isirael kalikame genere, likame oko bedo kede lworo; eda eko gire ot timo malaya.

⁹Kite kame en eko tero kede tim mere me malaya nono bala gi me tukotuko, omio en eko munao lobo nono dedede; en etimo adote mere i yore me woro ingaroi kede yen kame kopao.

¹⁰Bed bala magonogi dedede otimere, Yuda, amin me Isirael kalikame genere, likame oko dwogo buta kede cunye lung, en ecukere acuka. Ango Rwot en awaco.”

¹¹Rwot oko waco na be, bed bala Isirael oudo oweke, do Isirael ber oko nyutere bala dako abeber kalamo amin mere kalikame genere, en Yuda.

¹²En ewaco na pi ot waco ne Isirael be, “Dwog buta, in Isirael dako kalikame genere, ango Rwot en awaco. Ango likame abino bedo kede gero buti, pien ango atie kede cuny me kisa, ango Rwot en awaco. Likame ango abino dong bedo ger nakanaka.

¹³Kenekene in yei raco ni, be in ijemo ne Rwot Rubanga ni, di iko ot gabo amara ni but rubangan me jokumbor i dud yen oduko, di iko dagi winyo dwana, ango Rwot en awaco.

¹⁴“Dwogunu buta, Okwe wun idwe kalikame genere, ango Rwot en awaco. Pien ango abedo ngadwong wu. Abino kwanyo kikomu ngat acel ki buli bomba, kede jo are ki buli ekeko me anywali, di ako dwoko wu i Moru me Sion.

¹⁵“Ango abino mino wu jotel kame cunya oyero; gin kibino telo wu kede rieko kede ngec.

¹⁶Kame itiekunu nywal di ikounu nyai i lobo nono, likame bobo ebino mitere ne wu pi yamo kop i kom Sanduku me Isikan. Manono likame doko bino bedo i tamu amoto wun yutuno en; likame ebino bedo bala gikame li ne wu, doko da likame ibinunu paro pi timo ace.

¹⁷I kare nono, kobino lwongo Yerusalem be ‘Kakame Rwot Pugo kiye’, di atekerin dedede ko bino donyo cokere wora i kunono. Likame doko gin kibino bedo kede ngut gi lubo tam areco atie i cuny gi.

¹⁸I kare nono, wun jo me Yuda ibinunu ribebere kede jo me Isirael, di ikounu bino yai karacel ki lobo atie tetu malo, ikounu dwogo i lobo kame ango amio joakwari wu pi bedo mergi atwal.”

¹⁹Rwot waco be, “Isirael, kite kame oudo cunya mito kede mini ruom amalo kikom idwe na, di ako mini lobo kame yomo cunyi, en lobo aber kalamo lobere me atekerin dedede! Oudo ango amito be ilwonga be, ‘Papa na’, di likame iko lokere tenge kibuta.

²⁰Do akaka manono, bala kame dako acar weko kede cware, ida likame ibedo ngat kame genere buta. Manoni ango Rwot en awaco.”

²¹Dwan jo bino winyere wok ki wi imukuran aboco, mano en dwan jo me Isirael atie koko di kikwao kisa, pien gin kiparao lubo yote areco; gin kimio wi gi owil kede Rwot Rubanga gi.

²²Okwe wun idwe kalikame genere, dwogunu but Rwot Rubanga wu, en ebino cango yote wu areco me bedo jo kalikame genere. Wun iwacunu be, “Neningo, wan ige odwogo but Rwot, piento en ebedo Rwot Rubanga wa.

²³Tim me woro rubangan i wi imukuran obedo keto gen i kom gimoro kalikame tio, ebedo icelakin kame kony mere li. Ateteni Rwot en Rubanga wa, en kame etwero lako Isirael.

²⁴“Do cako tino wan, woro rubanga me lewic Baal otiekaro gikame joakwari wa ocane pi udo; emio wa okei romini, diegi kede doke, kiton idwe awobe kede anyira.

²⁵Nan wan opoore buto piny kede lewic, di lewic nono ko umo wa; pien wan kede joakwari wa obedo dubo but Rwot Rubanga wa; likame wan olubo cik mege.”