Read kumam Yeremia 30 Bible Online

Yeremia 30 - kumam bible

Yeremia 30

¹Rwot Rubanga me jo me Isirael

²owaco na be, “Wandiko i itabu kope dedede kame ango atieko waco ni,

³pien ateteni kare bino tuno kame ango abino dwoko kede winyo ka jo na me Isirael kede Yuda. Ango abino dwoko gi i lobo kame bin ango amio but joakwari gi, di gin bobo kiko bino donyo bedo iye bala mergi.”

⁴Magi en kope kame Rwot owaco i kom jo me Isirael kede Yuda.

⁵En ewaco be, “Ango atieko winyo dwan jo kame tie kede mielkom atek, manono obedo koko me jo kame lworo omako, likame koko me jo kame tie kede mulem.

⁶Kong ipenyere keni di iko paro! Benyo, icuo karuno yac di eko nywalo atin? Pinyo do komio ango atie neno cuo dedede tie mako pier gi bala mon kame tie ramere me nywal? Pinyo komio nyim jo dedede likame nyuto yomcuny?

⁷Ceng me neno can tie bino. Likame tie ceng moro ace kame kokaruno poro kede. En ebino bedo ceng kame ikwae ka Yakobo bino neno kede can, do kobino lako gi ki can nono.”

⁸Rwot me jo yi waco be, “I ceng nono, ango abino tuturo ayoko kame kotweo i ngut gi, di ako cocoto irikoi kame kotweo gi kede, di likame bobo ngakumbor moro ko bino mino gi kibedo ipasoi.

⁹Do gin kibino timo tic ne Rwot Rubanga gi kede ne akwar Daudi, ngat kame ango abino keto pi bedo abaka gi.” En ewaco be,

¹⁰“Do wun jo na, kur ibedunu kede lworo moro; doko kur cuny wu poti, Okwe wun jo na me Isirael. Ango ayaro lako wun kede idwe wu ki lobo kame tie kakabor nono, lobo kame itienu iye mabus. Wun ibinunu dwogo paco di ikounu bedo mot kede anapakin, doko likame tie ngatamoro kame bino mino wu lworo.

¹¹Ango atie kede wu doko abino lako wu. Ango abino muducaro atekerin dedede kame ango asasaro wu i diere gi, do ango likame abino muducaro wun. Ango abino mino wu alola kame poore kede wu, likame abino weko wu aweka abongo mino wu alola moro. Ango Rwot en awaco.”

¹²Rwot waco ne jo mege be, “Awanon wun likame cango, apore wu rac twatwal.

¹³Likame tie ngatamoro kame pido piru, yat me muketo apore wu likame tie, apore wu likame romo cango.

¹⁴Jo dedede kame maro wu wi gi do otieko wil kede wu; gin likame do kiparo piru. Ango atieko mino wu lito bala ngakwor, amio wu alola abongo kisa bala ngakwor, pien dub wu dwong twatwal, doko gikareco wu tot adikinicel.

¹⁵Pinyo kame mio wun ikokunu pi awanon kame ango aketo i komu? Aramo wun likame cango. Ango amio wun alola nogi pien dub wun dwong twatwal doko gikareco wu tot adikinicel.

¹⁶Do jo dedede kame muducaro wu kobino muducaro gida, doko jokwor wu dedede kobino tero i piny apat bala mabus. Jo kame yako wu kobino yako gida, doko jo dedede kame mao jamini wu ango abino mino komao jamini gida.

¹⁷Ango abino dwoko ne wu yotkom wu; abino cango aporeso me komu, bed bala jokwor wu waco be, ‘Kotieko riamo Sion obar, likame tie ngatamoro kame paro pire.’ Ango Rwot en awaco.”

¹⁸Rwot waco be, “Ango ayaro dwoko winyo me ikwae ka Yakobo, di ako bedo kede kisa i paco acelacel; kobino bobo gero bomba kakame bin ecungo iye, di oko dwoko paco me abaka kakame bin etie iye kikokome.

¹⁹Jo kame bedo kunono bino wero wer me pwono Rubanga; gin kibino wer di kilelemo kede kilel. Ango abino mino gin kidoko tot, doko wel gi likame bino dok piny; abino mino jo woro gi, doko jo likame bino bedo kede acae i kom gi.

²⁰Idwe gi bino bedo i kuo angoce me kare kasek, doko gin kibino bedo ekodet me jo kame wora; ango abino mino alola but jo dedede kame tero gi kirac.

²¹Ngapug gin bino bedo dano me ateker gi; ngatel gi bino wok ki diere gin. Ango abino mine ebedo iyapiyapi keda, di en eko bino bino buta; pien ngai kame cunye nwang kame karuno bino buta? Gin kibino bedo jo nango, di ada ako bedo Rubanga gin. Ango Rwot en awaco.”

²³Nenunu, lilo ka Rwot cal bala yamo abuko me kot, yamo ager kame bino beo i wi jo areco. Lilo ka Rwot likame bino jik tuno di etieko timo gikame en emoko tam mere pi timo. I kare me anyim jo mege bino niang i kom kop noni kiber.