Read kumam Yeremia 31 Bible Online

Yeremia 31 - kumam bible

Yeremia 31

¹Rwot waco be, “Kare tie bino kame ango abino bedo Rubanga me jo me ikekon me Isirael dedede, doko gida kibino bedo jo na.

²Jo kame bin oko bwot ki lak epima, ango bin abedo kede kisa i kom gi i wi tim. I kare kame bin jo me Isirael paro kede pi udo wei,

³ango ako nyutere but gi ki kakabor. Jo me Isirael, amara nango butu likame lokere; pi mano, ango ameede bedo kede genere butu.

⁴Ango bobo abino gero ateker wu, Okwe wun jo na me Isirael kame amaro! Wun bobo ibinunu gono ayekeyeke ikounu miel di ilelunu.

⁵Ibinunu bobo pito olok i wi mori me Samaria, di jo kame pito olok nogo ko bino camo olok gi kame kipito.

⁶Pien kare tie bino kame jodar piny kobedo mori mori me Epuraimu bino lwongere kede be, ‘Bianu ootunu Sion but Rwot Rubanga wa.’ ”

⁷Rwot waco be, “Wer kede dwan amalo di ilelo pi jo me Isirael, lelemo kitek pien gin kibedo ateker adwong kalamo atekerin apat. Pak Rwot di iwaco be, ‘Rwot olako jo mege, donge me jo me Isirael.’

⁸Neningo, ango ayaro kwanyo gin ki lobo kame tie tetu malo di ako kelo gi, ayaro coko gin ki ajikini me piny. Imuduka kede ingwalasa bino dwogo kede gin, karacel kede mon koyac kede kame tie ramere me nywal. Jo kame bino dwogo bino bedo tot twatwal.

⁹Gin kibino dwogo di kikok akoka, kibino ilega di ango atie telo gi dwoko gi. Abino mino gi kibeo kakame ataneko me pii opong iye, di kilubo yongayo apwot kalikame tie gimoro kame getaro gi iye. Ango acal bala papa me jo me Isirael, doko jo Epuraimu cal bala woda kao.”

¹⁰Rwot waco be, “Okwe atekerin, winyunu kop na, di ikounu tatamo en i dog name kame tie kakabor. Wacunu be, ‘En ngat kame bin esasaro jo me Isirael, en nono da kame ebino coko gi, di eko gwoko gi bala kame ngakwai romini gwoko kede romini mege.’

¹¹Pien ango atieko lako jo me Isirael, alako gi ki cing ateker kame tek kalamo gin.

¹²Gin kibino bino di kiko wer i wi moru me Sion kede dwan amalo pi kilel, cuny gi bino bedo yom twatwal pi bero kame Rwot bino timo negi, cuny gi bino bedo yom pi engano, bwini, kede mo me olibeti, kede i kom romini kede doke. Kuo gi bino bedo ber bala poto kame pii oromo, likame bobo kibino bedo kede cwercuny moro.

¹³Di do anyira ko bino miel di kiko bedo kede yomcuny, awobe kede jo oti da bino bedo kede kilel. Ango abino kweno cuny gi di ako mino iturur gi lokere doko kilel, cwercuny gi di ako loko doko yomcuny.

¹⁴Abino mino josaseredoti cam abeco, abino mino jo na jamini atot kame romo gi. Ango Rwot en awaco.”

¹⁵Rwot waco be, “Dwan tie winyere i bomba me Rama, dwan me koko katek. Lakeri tie koko pi idwe mege; en edagi likame emito be kwei cunye, pien gin do kitieko doko li.”

¹⁶Rwot waco be, “Wek koko, wei pigewangi; pien kobino culi pi gikame in itimo ne idwe ni; gin kibino dwogo ki lobo me jokwor gi.

¹⁷Gen tie ni pi kare me anyim; idwe ni bino dwogo i piny gi. Ango Rwot en awaco.

¹⁸“Ateteni ango awinyo jo Epuraimu kok kede cwercuny di kiwaco be, ‘Wan oudo ocal bala atin twon kalikame pwodi opwonyo i pur, do in iko bitaro wa pi pwonyo wa, di wan oko pwonyere odoko jo abeco. Dwok wa; wek wa odwog buti, pien in en Rwot Rubanga wa.

¹⁹Ingei wan yai tenge kibuti, wan oko swilaro; i kare kame oniang kede, oko bapo kor wa. Lewic oudo omako wa twatwal doko kom wa oudo oto pi dub kame wan oudo otimo i kare me tino wa.’

²⁰“Mam Epuraimu obedo woda kame amaro? Mam en atina kame cunya yom i kome? I kare dedede kame ango ayamo kede kop i kome, ango pwodi ayutuno en. Cunya paro pire kitek; ateteni ango abino bedo kede kisa bute. Ango Rwot en awaco.

²¹“Sisipunu anen mogo kame nyuto yongayo; timunu apande kame cimo ne wu yongayo. Ketunu tamu mako yongayo adwong, yongayo kame bin ilubunu me ot kunono. Okwe dwogunu, wun jo na kame amaro me Isirael, dwogunu i bomban wu.

²²Ibinunu bedo parao tuno awene, Okwe wun jo na kalikame genere? Pien atieko timo gikame nyen i wi lobo: mon en kame bino gwoko cuo.”

²³Rwot me jo yi, Rubanga me jo me Isirael waco be, “I kare kame ango abino dwoko kede mulem me jo me Isirael, jo bobo bino donyo waco i Yuda kede i bomban mege be, ‘Okwao Rwot mi winyo buti, in kabedo mere kacil, moru kacil me Yerusalem.’

²⁴Jo kame bedo i Yuda kede bomban mege dedede bino bedo karacel, jopur kede jokwai romini.

²⁵Abino mino jo ool udo teko, doko abino mino jo kame kec obwono cam di gin kiko udo teko.

²⁶Manono bino mino jo waco be, ‘Ango ako cei ki wang nino di ako neno be nino na oudo obedo ber na twatwal.’

²⁷“Neningo, kare tie bino kame ango abino mino kede jo kede leini pong i lobo me Isirael kede Yuda.

²⁸Bala kame bin ango amio koputo gin kede di oko tuturo gi, amio koreto gi, komuducaro gi, doko kotimo negi tim areco, kamanono da ango abino gero gi, doko abino pito gi bala yat di gin kiko dongo.

²⁹Ka kare nono otuno jo likame bobo bino waco be, ‘Jonywal bin ocamo olok awac, di eko neko lak idwe gi.’

³⁰Do lak jo dedede kame camo olok awac bino to; jo dedede bino to pi dub kame gin kikom gi en kitimo.”

³¹ Rwot waco be, “Kare tie bino kame ango abino timo kede isikan kanyen kede jo me Isirael karacel kede jo me Yuda.

³²Likame ebino bedo cal bala isikan kame bin ango atimo kede joakwari gi i kare kame bin ango akwanyo gi kede ki lobo me Misiri. Bed bala oudo ango acal bala cwar gi, do gin likame kiko gwoko isikan nono.

³³Isikan kanyen kame ango abino timo kede jo me Isirael ka kare nono otuno bino bedo kaman: ango abino keto iswil na i tam gi, doko ako wandiko gi i cuny gi. Ango abino bedo Rubanga gi, di gida kiko bedo jo na.

³⁴Likame tie ngatamoro kame bobo bino pwonyo ngat ocelu, arabo kame bino waco ne ngat ocelu be, ‘Ida ngei Rwot,’ pien gin dedede kibino ngena, cako kibut jo me ruom apiny tuno but jo me ruom amalo. Ango abino sasiro gi ki gikareco gi di likame bobo ako yutuno dub gi. Ango Rwot en awaco.”

³⁵Rwot en kame mio ceng caro piny iceng, doko da en kame emio duwe kede acerin rieny iwor. En kame erubo pii i nam di eko mino ebuka mege mor; en nyinge obedo Rwot me jo yi.

³⁶En ewaco be en etieko moko kite kame piny miero bed kede pi kare lung. Bala kame gikame en etieko moko likame bino jik kede, kamanono da ateker me Isirael bino bedo tie nakanaka.

³⁷Rwot waco be, ka dano moro otwero pimo idoun kame tie malo, kede ka dano moro otwero ot mamano acakini me dud piny, manono en kame bino mino en edagi jo me Isirael pi gi dedede kame gin kitieko timo.

³⁸Rwot waco be, “Ateteni kare bino tuno kame kobino bobo gero kede bomba pira, cako ki gedo abor malo kame tie Kananel tuno i erute kame kolwongo be Erute me Kona.

³⁹Kobino pimo ikor mere yai ki kunono tuno i emukura me Gareb, di eko gonoro ot tuno Goa.

⁴⁰Aditot lung kakame oudo koyiko iye jo oto kede kame koonyo iye yugi, kiton poti dedede tuno i ecilet me Kideron, kede i bad tetu kide i kona kame kolwongo be Erute me Asigira, kobino mino buta. Likame bobo tie dano moro kame bino tuturo arabo muducaro bomba.”