Read kumam Yeremia 34 Bible Online

Yeremia 34 - kumam bible

Yeremia 34

¹Man en kop kame Rwot owaco na i kare kame Abaka Nebukadunesa me Babilon kede isirikalen mege, karacel kede isirikalen me pinye dedede kede jo dedede kame en epugo, oudo tie yi kede jo me Yerusalem kede bomban mege dedede.

²Rwot Rubanga me jo me Isirael owaco na pi ot waco ne Abaka Esedekia me Yuda be, “Ango Rwot, ayaro mino bomba noni i cing abaka me Babilon di en eko wange.

³Ida kikomi likame ibino bwot, do ateteni kobino maki di oko mini i cinge. In ibino neno abaka me Babilon kede wangi di iko yamo kede in kikomi, di iko ot Babilon.

⁴Akadi kamanono da, winy kop kame ango atie waco i komi, Okwe in Abaka Esedekia me Yuda! In likame kobino neki;

⁵in ibino to i mulem. Doko bala kame bin jo owango kede odok angwe kur ne joakwari ni, gin jo kogeo bedo abakai ne in, kamanono da jo bino wango odok angwe kur ne in di kiko koki di kiwaco be, ‘Okwe, abaka wa oto!’ Ango Rwot en awaco.”

⁶Di ango ako waco ne Esedekia abaka me Yuda kope nogi dedede i Yerusalem.

⁷Ango awaco ne kope nogi i kare kame oudo isirikalen ka abaka me Babilon tie yi kede jo me bomba me Yerusalem, karacel kede bomban me Yuda kame oudo odong dedede, gin bomban me Lakis kede Aseka. Magonogi en bomban me Yuda kame kocelo kede apama atek kame oudo odong.

⁸Rwot oko yamo keda ingei Abaka Esedekia timo isikan kede jo dedede i Yerusalem pi gin gonyo ipasoi.

⁹Jo dedede oudo miero gony ipasoi gi kobedo Joeburania, cuo kede mon; likame tie dano moro kame oudo miero mi dano me Isirael wad gi bed epasoit.

¹⁰Aso, jodongo dedede karacel kede jo dedede kame oudo otimo isikan noni oko yei be gin kibino gonyo ipasoi kede apasoi gi, di likame bobo kiko bino dwoko gi i ipasun. Gin kiko lubo kop me isikan nono di kiko gonyo gi.

¹¹Do i cen mere gin bobo kiko loko tam gi di kiko dwoko ipasoi kede apasoi kame oudo gin kigonyo, di kiko mino gi kibedo ipasoi gi bobo.

¹³Rubanga me Isirael oko waco na pi waco ne jo be, “Ango bin atimo isikan kede joakwari wu i kare kame akwanyo gi kede ki lobo me Misiri, ki kuo me ipasun di ako waco negi be,

¹⁴‘Buli mwaka me kanyaare poore dano acelacel gony Ngaeburania kame kocato ne di oko bedo timo ne tic pi mwakini kanyape; miero igonyunu gi ki tice kame gin kitimo ne wu.’ Do joakwari wu likame oko winyo kop na arabo lubo timo gikame ango oudo awaco negi.

¹⁵Wun i kare kokato kiyapiyapi iswilarunu di ikounu timo gikame opoore i nyima. Wun dedede oudo iyeunu pi gonyo jo me Isirael wadu, di ikounu timo isikan i nyima i ot kame kolwongo kede nyinga.

¹⁶Do ikounu bobo loko tam wu di ikounu kelo acae i nyinga. Wun dedede idwokunu ipasoi kede apasoi kame oudo itiekunu gonyo bala kame cuny gi oudo mito, di ikounu dino gi tetek bedo ipasoi wu bobo.

¹⁷Pi mano, ango awaco kaman: wun idagunu timo gikame ango awaco; likame igonyunu jo me Isirael wadu. Ango nataman do agonyo ne wu yi, tuwo, kede kec. Ango abino mino ibedunu jo kame atekerin me wi lobo dedede neno di lworo ko mako gi pi can kame ango abino timo ne wu.

¹⁸Jodongo me Yuda kede me Yerusalem, karacel kede jotic me paco ka abaka, josaseredoti, kede jotel dedede oudo otimo isikan keda di kibeo ki diere me twon kame oudo gin kibaro i diere. Do gin kiko turo isikan nono di likame kiko lubo kope mege. Pi mano, ango ayaro timo negi gikame gin oudo kitimo ne twon nono.

²⁰Ango ayaro mino gi i cing jokwor gi, jo kame tie mito kwanyo kuo gi. Liele gi bino doko cam me winy kede leini me obar.

²¹Ango abino mino Abaka Esedekia me Yuda kede jotic mege i cing jokwor gi, jo kame tie mito kwanyo kuo gi. Ango abino mino gi i cing isirikalen me Babilon, jo kotieko weko yi kede wu.

²²Ango ayaro mino gin cik di gin kiko dwogo i bomba noni. Gin kibino yi di kiko mane, kiko wange. Ango abino mino bomban me Yuda doko amejeko kalikame tie dano moro kame bedo i yi gi. Ango Rwot en awaco.”