Read kumam Yeremia 39 Bible Online

Yeremia 39 - kumam bible

Yeremia 39

¹I duwe me tomon me mwaka me kanyangon me apugan ka Esedekia abaka me Yuda, Abaka Nebukadunesa me Babilon oko bino kede isirikalen mege dedede di gin kiko luko Yerusalem.

²I ceng me kanyangon me duwe me ongwon i mwaka me tomon kiwie acel me apugan ka Esedekia, isirikalen me Babilon oko turo apama aluko bomba.

³(Kakame oudo jo me Babilon otieko mano kede Yerusalem, jotic adongo me abaka me Babilon oko ot di gin kiko bedo i Erute me Diere, jo nogo gin en Neregal Sareser, Samugar Nebo, Sarasekim ngat kobedo Rabasari, kede Neregal Sareser ngat kobedo Rabamag, karacel kede jotic adongo dedede me abaka me Babilon.)

⁴Kakame Abaka Esedekia kede isirikalen mege dedede oneno kede gikame oudo tie timere, gin kiko ringo kilwi ki bomba iwor. Gin kiringo kilubo yongayo me poto me abaka, di kiko donyo ki erute kame oudo tie i dierediere me apamai are, kiko ot tetu Aditot me Yorodan.

⁵Do isirikalen me Babilon oko wapo gi di kiko mako Esedekia i ebar me Jeriko. Gin kiko tere but Abaka Nebukadunesa me Babilon, ngat kame oudo tie Ribula i lobo me Kamat, di abaka oko ngolo ne kop.

⁶Abaka me Babilon oko neko awobe ka Esedekia i Ribula i nyime di eneno; eko neko da bobo jodongo me Yuda.

⁷Ingei manono, eko golo wang Esedekia di eko twene kede irikoi pi tere Babilon.

⁸Jo me Babilon oko wango ot ka abaka kede ude me jo apat, di kiko rereto apama me Yerusalem piny.

⁹Di Nebusaradan ngatel me isirikalen oko tero jo dedede kame bin odong i bomba kede jo kame oudo orieo cing gi bute. En etero gin Babilon bala mabus,

¹⁰di eko weko i lobo me Yuda jo kame oudo obedo jocan atwal atwala, jo kame oudo li kede gimoro akadi acel, di en eko mino gin poti me olok kede poti ace.

¹¹Abaka Nebukadunesa oko mino cik amako Yeremia but Nebusaradan, ngatel me isirikalen be,

¹²“Oti di iko mono Yeremia. Ka iko ude, gwoke kiber doko kur itim ne gimoro arac, do in tim ne gi dedede kame en ekwai.”

¹³Aso, Nebusaradan, karacel kede jotic adongo, Nebusasiban ngat koudo obedo Rabasari, kede Neregal Sareser ngat koudo obedo Rabamag, kede jotic apat dedede me abaka me Babilon,

¹⁴oko kwanya ki diakal me paco me abaka. Gin kiko mina i cing Gedalia, ngat kobedo wot ka Akikam kede akwar Sapan, pi gwoka. Gedalia oudo miero nen be ango atuno ture kiber. Aso, ango ako donyo bedo kede jo mege.

¹⁵Rwot oudo owaco na kop i kare kame oudo pwodi kotwea kede i diakal me paco me abaka be

¹⁶aoti awac ne Ebedemelek dano me Abisinia be Rwot me jo yi, Rubanga me jo me Isirael owaco be, “Ango ayaro mino kope na dedede kame awaco i kom bomba noni cobere. Ango abino timo gikarac i kome, likame gikame ber doko gi nogo bino timere di in itie.

¹⁷Do ango abino gwoki i ceng nono, di likame oko bino mini i cing jo kame in itie lworo nogo.

¹⁸Ango ateteni abino gwoki di likame oko bino neki. Kuo nin bino bwot pien in iketo gen nin buta. Ango Rwot en awaco.”