Read kumam Yeremia 4 Bible Online

Yeremia 4 - kumam bible

Yeremia 4

¹Rwot waco be, “Wun jo me Isirael, ka ateteni imitunu dwogo buta, kwanyunu tenge caljwogi gikame neno rac ki nyima, di likame ikounu parao weka.

²Doko da ka itienu lairo, lairunu kede ateni i nyinga, di atekerin apat dedede ko bino kwana pi mino gi winyo di gin kiko bino wakere pira.”

³Rwot waco ne jo me Yuda kede Yerusalem be, “Purunu poti wu koukaro, kur ipitunu kodere wu i dier okuto.

⁴Poore ikeperenu pira, ango Rwot, di ikounu mino cunyu buta, wun jo me Yuda kede jo kame bedo Yerusalem. Ka likame itimunu kamanono, abino bedo kede gero i komu bala mac aliel, pi gikareco kame itienu timo; gero kalikame ngatamoro twero kweno.”

⁵Kutunu agwara kabedere dedede! Lelemunu kitek! Wacenu jo me Yuda kede Yerusalem pi ringo donyo i bomban kame kocelo kede apama.

⁶Cimunu ne jo yongayo kame poore aluba me ot Sion! Ringunu ot gwokere, kur igalunu! Pien Rwot tie kelo ne wu can koyaro wok ki tetu malo; can kame dudubo lobo twatwal tie bino.

⁷Can kame bino dudubo atekerin tie bino, bala engu kame yai ki kapwono mere. En etieko yai ki kakame ebedo iye pi bino dudubo lobo me Yuda. Bomban me Yuda bino doko amejeko kame jo li iye.

⁸Pi manono, ngapunu ipukoi, di ikounu iturur kede koko, pien gero kame Rubanga tie kede i kom wa likame otiek.

⁹Rwot owaco be, “I ceng nono abakai kede jopug bino bedo abongo nwangcuny; josaseredoti kom gi bino to; kede inabin ko bino uro kitek.”

¹⁰Ango ako waco be, “Okwe Rwot Rubanga, kom in ingalo jo me Yerusalem atwal atwala di iwaco be, ‘Ibinunu bedo kede anapakin,’ do di koyapuno neko gi.”

¹¹I kare nono Rwot bino waco ne jo me Yerusalem be, “Yamo aliet tie buko wok kibuta ki wi tim, ebino butu jo na. Likame yamo nono obedo yamo apiupiu me kwororo kal,

¹²do en ebedo yamo apek kalamo manono. Ango Rwot en kame atie ngolo kop ne wun jo na.”

¹³Nenunu, ngakwor tie bino bala edou me kot; cabalan mege me yi tie bino bala apipiru. Asigiran mege dwir kalamo ekokom. Otienu tin i can benyo; wan onyonunu!

¹⁴Okwe wun jo me Yerusalem, lwokunu tenge tice areco ki cunyu, tetekeny Rwot ko bino lako wu. Ibinunu kara bedo kede tamu areco nogo tuno awene?

¹⁵Pien jo kame ooro tie yamo i bomba me Dan, kede da i moru me Epuraimu kop me can atie bino.

¹⁶Kitie waco ne atekerin kede ne Yerusalem be jokwor tie bino ki lobo abor. Jokwor nogo bino woo i kom bomban me Yuda.

¹⁷Gin kibino lukaro Yerusalem bala jo kame daro poti, pien jo mege ojemo ne Rwot. Manoni Rwot en owaco.

¹⁸Yuda, in en ikelo manoni i komi keni pi epone me kuo ni, kede pi gikame ibedo timo. Can noni obedo meri; elit tin benyo! Lito mere odonyo paka tuno i dier cunyi.

¹⁹Okwe lito! Atie kede lito kalikame atwero kanyo! Okwe cunya! Cunya tie gwere kirac! Likame atwero ling alinga; atie winyo koko me agwara kede woo me jo atie yi.

²⁰Can alit tie poto di lubere aluba; lobo me Isirael lung kotieko dudubo. Kodudubo iemai wa pi esawa atitidi, konyinyilo isukan apoko isengena gi pi dakika kenekene.

²¹Abino meede neno imendera me yi, kede winyo koko me agwara pi kare arom kamene?

²²Rwot waco be, “Jo na jomingo; likame kingea. Gin kical bala idwe amiming; likame kitie kede niang. Gin kitie kede diru me timo gikarac, do likame kitie kede ngec moro me timo gikame ber.”

²³Ango angoloro wi lobo, ako neno be en do etie lobo kodubere abongo gimoro akuo iye; ako ngoloro malo, di likame ako neno gimoro arieny pi kelo lero.

²⁴Angoloro mori, di ako neno gi di kitie yangere wukawuka, di imukuran dedede tie cecero.

²⁵Ako neno be likame oudo tie ngatamoro iye akadi acel, akadi winy da oudo otieko por oringo tenge.

²⁶Lobo koudo mio, oudo otieko doko wi tim, doko bomban mege dedede oudo otieko ngingidun pi gero agwai kame oudo Rubanga tie kede.

²⁷(Rwot owaco be en ebino mino wi lobo doko bala ameje, do likame ebino dudubo en atwal atwala.)

²⁸Manoni bino mino wi lobo tururo di malo ko doko col cucucuc. Rwot en owaco, doko likame ebino loko tam mere. En etieko moko tam mere, likame ebino lokere tenge kiye.

²⁹Jo dedede me bomban bino ringo, ka kiwinyo woo me isirikalen kame ringo kede asigiran kede kame yi kede emal. Jo mogo bino ringo ot pwono i abum, mogo bino yito i wi mori. Jo bino weko bomban dedede dong nono, di likame ngatamoro doko ko donyo bedo i yi gi.

³⁰Okwe, in bomba kodoko ameje, pinyo kara itie ngapo egoe akwar me wel, pinyo kara pwodi itie tubuso komi kede mwolere me saabu di icilo wangi? In itie tubuso komi me nono! Ipalon ni alem mari otieko dagi, gin kitie mito neki.

³¹Ango awinyo koko bala me dako atie ramere me nywal, dwilao bala me dako atie nywalo atin kao. Manono oudo obedo Yerusalem atie omo wei, di eyayaro bade di ewaco be, “Atie i can! Kom kitie bino neka!”