Read kumam Yeremia 40 Bible Online

Yeremia 40 - kumam bible

Yeremia 40

¹Rwot oko yamo keda ingei Nebusaradan ngatel me isirikalen gonya. Oudo kotera Rama di kotwea kede irikoi, ango karacel kede jo icegun dedede me Yerusalem kede Yuda, kame oudo jo me Babilon tie tero Babilon bala mabus.

²Nebusaradan oko tera tenge di eko waco na be, “Rwot Rubanga ni oudo omio ikwenyar be can noni bino poto i bomba noni,

³doko nataman en etieko timo gikame oudo ewaco be ebino timo. En etimo manoni pien wun itimunu dub bute di ikounu dagi lubo kop mere.

⁴Neningo, nataman ango atieko gonyo eriko ki cingi. Ka imito ot keda Babilon, bia ooti, di ango ako bino gwoki kiber. Do ka likame imito, kur ibin. Neningo, in itwero yero karamoroni kenekene kame cunyi mito i lobo noni di in iko ot iye.”

⁵Di pwodi likame adwoko kop moro, Nebusaradan oko medo waco be, “Dok but Gedalia wot ka Akikam akwar Sapan, ngat kame abaka me Babilon oketo pi bedo ngapug me bomban me Yuda, di in iko bedo kede en i dier jo, arabo in iromo ot karamoroni kenekene kame in ineno be poore ni.” Di do en eko mina giamia moro kede cam mogo, di eko weka aoto.

⁶Ango ako ot Misipa bedo kede Gedalia, di ako donyo bedo i dier jo kame bin oko dong i lobo nono.

⁷Jotel mogo me isirikalen me Yuda kede isirikalen gi oudo likame orieo cing gi. Gin kiko winyo be abaka me Babilon oudo otieko keto Gedalia pi bedo ngapug me lobo me Yuda, kede da be oudo kotieko mino i cinge cuo, mon, kede idwe, kede jo kame can odio adikinicel, gin jo kalikame oudo kotero gi Babilon bala mabus.

⁸Aso, Isimael wot ka Netania, Yokanan wot ka Karea, Seraya wot ka Tanumet, awobe ka Epai dano me Netopa, kede Yesania dano me Maka, gin karacel kede isirikalen gi kiko ot but Gedalia Misipa.

⁹Gedalia oko kwongere but gi karacel kede but isirikalen gi di ewaco negi be, “Kur ibedunu kede lworo moro pi rieno cing wu but jo me Babilon. Bedunu i lobo noni di ikounu timo tic ne abaka me Babilon, di gi dedede ko bino bedo ne wu kiber.

¹⁰Ango kikoma abino bedo Misipa pi cungo ne wu kame jo me Babilon obino but wa kan. Do wun ikarununu coko cam ki poti di ikounu keto bwini, anyakini me kare me iporo kede mo me olibeti i jamini me kano gi, di wun ikounu bedo i bomban kame wun itiekunu lunyo.”

¹¹Kamanono da, jo me Isirael dedede kame oudo tie Moab, Amon, Edom, kede i lobere ace, oko winyo be abaka me Babilon oudo oweko jo mogo me Isirael odong bedo Yuda kede da be oudo etieko keto Gedalia pi bedo ngapug gi.

¹²Manono oko mino gin dedede kiko yai ki kabedere kame oudo osasaro gi iye di kiko dok Yuda but Gedalia i Misipa. Gin kiko coko bwini kede anyakini me kare me iporo di tot twatwal.

¹³Aso, Yokanan wot ka Karea karacel kede jotel me isirikalen dedede kalikame oudo orieo cing gi oko ot Misipa but Gedalia

¹⁴di gin kiko waco ne be, “Benyo, in ingeo be Balis abaka me jo Amon otieko cwano Isimael wot ka Netania pi neki?” Do Gedalia likame oko yei kede kop gin nono.

¹⁵Di do Yokanan oko yamo kede Gedalia i mung be, “Ango akwai iyei nango ot neko Isimael, di likame tie dano moro ace kame ko bino ngeno ngat koneke. Pinyo kame mio poore en eneki? Pien manono bino mino jo me Yuda kame nataman ocokere buti nogi sasarun, di jo anonok kame odong nogi ko tiek.”

¹⁶Do Gedalia oko waco ne be, “Kur itim gikame cal kamano, pien in itie yamo kop me angalo i kom Isimael.”