Read kumam Yeremia 41 Bible Online

Yeremia 41 - kumam bible

Yeremia 41

¹Kikano i mwaka nono i duwe me kanyaare, Isimael wot ka Netania, akwar Elisama, dano me i ot ka abaka, en bin ngat acel kikom jodongo me tic ka Abaka, oko ot Misipa but Gedalia kede cuo tomon. Di bin gin dedede oudo kitie cam karacel,

²Isimael karacel kede cuo tomon kame oudo tie kede en oko lepun yai malo di gin kiko neko Gedalia kede ipimai gi, pien abaka me Babilon oudo okete pi bedo ngapug me lobo me Yuda.

³Isimael oko neko da jo me Isirael dedede kame oudo tie Misipa kede Gedalia, kiton isirikalen me Babilon da kame oudo tie kunono.

⁴I ceng kame lubo mere, di pwodi ngatamoro likame oudo ongeo be koneko Gedalia,

⁵cuo ot kanyauni oko tuno di kiwok ki Sekem, Silo, kede Samaria. Gin oudo kilielo yer me tik gi, kinyinyilo igoen me kom gi, kede kiteteo kom gi pi nyuto be kitie iturur. Gin oudo kikelo giayala me alos kede odok angwe kur pi yalo i tempulo ka Rwot.

⁶Isimael oko yai ki Misipa pi ot riamo kede gi. En oudo eoto di ekok. Kakame en eko riamo kede gin, eko waco negi be, “Bia inenunu Gedalia.”

⁷Cucuto di gin kitieko tuno i dier bomba, Isimael kede cuo kame en oudo etie kede oko neko gi di kiko uco kom gi i bur me pii.

⁸Do tie oudo cuo tomon kikom gi kame oudo owaco ne Isimael be, “Okwai kur inek wa! Wan otie kede engano, mawele, mo me olibeti kede mokic kame okano obar. Manono oko mino en likame eko neko gin.”

⁹Bur me pii kame Isimael oudo ouco iye kom cuo kame en eneko nogo oudo lac twatwal. Manono en bur me pii kame bin Abaka Asa okunyo i kare kame Abaka Basa me Isirael osuro gi kede, tetekeny jo bed tie kede pii. Isimael oko pongo bur me pii nono kede kom jo kame en oudo eneko.

¹⁰Di do en eko mako jo apat dedede kame bin tie Misipa di eko tero gi bala mabus, anyira ka abaka kede jo dedede kame bin koweko odong Misipa, jo kame Nebusaradan ngadwong me isirikalen bin omio i cing Gedalia. Isimael bin omako gi bala mabus di eko tero gi eoto kede gi tetu adul me jo Amon.

¹¹Kakame Yokanan wot ka Karea karacel kede jotel me isirikalen kame bin tie kede en oko winyo kede gikarac kame Isimael oudo otimo,

¹²gin kiko tero isirikalen gi dedede di kiko ot pi yi kede Isimael. Gin bin kiko ude i nget atapar adwong me pii kame bin tie Gibeon.

¹³Kakame jo dedede kame Isimael oudo omako bala mabus oneno kede Yokanan karacel kede jotel me isirikalen kame bin tie kede en, cuny gi oko doko yom.

¹⁴Di gin dedede kiko lokere cen, di kiko ringo but Yokanan.

¹⁵Do Isimael karacel kede cuo kanyauni kame bin en etie kede oko lwi di kiko ot i lobo me jo Amon.

¹⁶Di do Yokanan karacel kede jotel me isirikalen kame bin tie kede en oko donyo gwoko jo kame bin Isimael omako di eko tero ki Misipa bala mabus ingei en neko Gedalia. Jo nogo oudo obedo isirikalen, mon, idwe kede jotic me paco me abaka.

¹⁷Aso, gin kiko yai ot. Di gin bin kitie i yongayo me ot, kiko kong bedo Gerut Kimkam kabedo kame oudo iyapiyapi kede Betelem, di oudo tam gin tie pi ot Misiri

¹⁸pi lworo jo me Babilon, pien Isimael oudo oneko Gedalia, ngat kame abaka me Babilon oudo oketo pi bedo ngapug me lobo me Yuda.