Read kumam Yeremia 42 Bible Online

Yeremia 42 - kumam bible

Yeremia 42

¹Di do jotel dedede me isirikalen, karacel kede Yokanan wot ka Karea kede Asaria wot ka Kosaya, oko bino kede jo me ruom dedede buta,

²di gin kiko waco na be, “Wan okwai itim ber iwiny kwac wa, di iko lego but Rwot Rubanga ni pirwa, wan jo kame do odong nogi. Pien wan bin otot, do odong do nonok bala kame ida nataman ineno.

³Kwai Rwot Rubanga ni wek enyut ne wa kakame wan opoore ot iye kede gikame poore otimi.”

⁴Ango ako dwoko negi be, “Manono ber. Ango ayaro lego but Rwot Rubanga wu bala kame wun ikwaunu, doko kope dedede kame Rwot bino dwoko ango abino waco ne wu; likame tie kop moro kame ango abino mungo ne wu.”

⁵Gida kiko waco na be, “Wan okwao Rwot pi en bedo mujura me ateni kede kame genere kame bino pido wa ka wan likame oko lubo timo gi dedede kame Rwot Rubanga nin omi pi waco ne wa.

⁶Akadi di en kop aber arabo arac, wan obino lubo kop kame Rwot Rubanga wa waco, en ngat kame wan otie kwani pi lego bute. Wan obino timo kamanono pien wan ongeo be gi dedede bino bedo ne wa kiber ka wan olubo kop mere.”

⁷I ngei ceng tomon Rwot oko yamo keda.

⁸Di do ango ako lwongo karacel Yokanan kede jotel me isirikalen dedede kame bin tie kede en, kede jo me ruom dedede,

⁹di ako waco negi be, “Rwot, Rubanga me Isirael, ngat kame wun ioranu bute pi tero kwac wu bute waco be,

¹⁰‘Ka kenekene wun iyeunu dong bedo i lobo noni, ango abino gero wu ikounu cungo di itekunu doko likame abino rereto wu piny; abino pito wu bala yat, di likame ako puputo wu; pien atie kede cwercuny pi can kame ango atieko kelo i komu.

¹¹Kur ibedunu kede lworo moro bobo i kom abaka me Babilon, piento ango atie kede wu pi lako wu ki cinge.

¹²Ango abino timo wu kisa, di eda eko bino bedo kede kisa i komu di eko weko wu idokunu i lobo me turu. Ango Rwot, atieko waco.’

¹³“Do ka wun imeedenu waco be, ‘Wan likame obino dong bedo i lobo noni,’ manono udo itiekunu dagi lubo kop ka Rwot Rubanga wu,

¹⁴kede ka wun iwacunu be, ‘Li ba, wan girwa obino ot bedo Misiri, kakame wan likame obino neno iye can me yi arabo winyo iye agwara me yi amoto kanyo kec iye,’

¹⁵ka wun iwacunu kamano, winyunu do kop kame Rwot tie waco ne wu, Okwe wun donge me jo me Yuda. Rwot me jo yi, Rubanga me jo me Isirael waco be, ‘Ka wun iketunu cunyu pi ot bedo Misiri,

¹⁶yi kame itienu lworo nono bino udo wu kunono, kede kec da kame itienu lworo nono bino lubo wu Misiri, di ikounu to kunono.

¹⁷Jo dedede kame otieko keto cuny gi pi ot bedo Misiri bino to, arabo i yi, amoto kec en kame bino neko gi arabo tuwo. Likame tie dano moro kikom gi kame bino dong kuo. Akadi dano moro acel kikom gi likame bino bwot ki can kame ango atie kelo i kom gi.’

¹⁸“Rwot me jo yi, Rubanga me jo me Isirael waco be, ‘Kite kame bin aketo kede lilo na kede gero na i kom jo me Yerusalem, kamanono da abino bedo kede gero i komu ka iotunu Misiri. Jo bino tic kede nyingu me ilam, ibinunu doko gikame jo neno di ko mino gi lworo, kede kame jo nyero kede acae. Likame bobo ibinunu neno kabedo noni atwal.’ ”

¹⁹Ango ako meede kede yamo be, “Okwe, wun jo odong me Yuda, Rwot otieko waco ne wun be kur iotunu Misiri. Mito ingeunu be ango atieko tin kwenyaro wu

²⁰be wun itiekunu timo gikarac akelo to. Pien wun kikomu ioranu but Rwot Rubanga wu di iwacunu be, ‘Leg pirwa but Rwot Rubanga wa, iko waco ne wa kope dedede kame en ebino waco, di wan oko bino timo kamanono.’

²¹Aso, nataman ango atieko waco ne wu kope mege, do wun ikounu dagi lubo kope dedede kame en eora pi waco ne wu.

²²Pi mano, poore ingeunu be, ibinunu to i yi, arabo to kec, amoto tuwo, i kabedo kame itienu mito ot bedo iye nono.”