Read kumam Yeremia 43 Bible Online

Yeremia 43 - kumam bible

Yeremia 43

¹Kakame ango atieko waco ne kede jo kope dedede kame Rwot Rubanga gi oudo oora kede but gi,

²Asaria wot ka Kosaya kede Yokanan wot ka Karea karacel kede jo icegun dedede kame joepali oko waco na be, “In itie waco kop me abe. Rwot Rubanga wa oudo likame oori pi waco ne wan be kur ooti bedo Misiri.

³Baruk wot ka Neria en kame tie supi i kom wa, be tetekeny in imi wa i cing jo me Babilon di gin kiko neko wa, arabo kiko tero wa Babilon bala mabus.”

⁴Aso, Yokanan kede jotel dedede me isirikalen karacel kede jo dedede likame oko lubo kop kame Rwot oudo owaco negi pi dong i lobo me Yuda.

⁵Di do Yokanan kede jotel dedede me isirikalen oko tero jo Misiri, kitero jo dedede me Yuda kame oudo oko dong, jo kame bin oko dok bedo i lobo me Yuda kakame bin kidwogo kede ki lobere dedede kame oudo kosasaro gi iye:

⁶cuo, mon, idwe, kede anyira ka abaka. Gin kitero jo dedede kame oudo Nebusaradan ngadwong me isirikalen oudo oweko i cing Gedalia, ribo kiton Baruk kede ada.

⁷Gin kidagi lubo kop kame Rwot oudo owaco di kiko ot Misiri. Gin kioto kabedo kame kolwongo be Tapankes.

⁸Di do Rwot oko waco na be,

⁹“Kwany kide mogo adongodongo iko mako i cingi di iko ot yiko gi i dud simit me yongayo kame kodonyo kede i paco ka Parao i Tapankes. Tim kamanono di jo me Yuda tie neni,

¹⁰di iko waco negi be Rwot me jo yi, Rubanga me jo me Isirael waco be, ‘Ango ayaro cwano jo oto omo ngatic na Abaka Nebukadunesa me Babilon, di en eko bino cibo kom mere me ajakanut i wi kide kame ango ayiko nogi, di eko yararo eema mere kame epugo kiye i wi gi.

¹¹En eyaro bino di eko suro lobo me Misiri eko bwono, eko mino jo kame kotieko iiko negi be kibino to tuwo, ko bino to tuwo, jo kame kotieko iiko negi be kobino mako gi di oko tero gi bala mabus, di gin oko bino mako gi kotero gi bala mabus da, kede jo kame kotieko iiko negi be kobino neko gi i yi, di oko bino neko gida i yi.

¹²Ango abino cwinyo mac i tempulo me rubangan me Misiri, di abaka me Babilon ko bino wango rubangan gi nogo arabo ekwanyo gi eko tero gi. En ebino depo jamini me Misiri pitipit bala kame jokwai romini depo kede onyogo ki igoen gi, di en gire eko yai eoto abongo gimoro kame kotimo ne.

¹³En ebino mumuko kide kame kosisipo me awora kame tie Keliopolis i lobo me Misiri, di eko wango tempulon me rubangan me Misiri.’ ”