Read kumam Yeremia 5 Bible Online

Yeremia 5 - kumam bible

Yeremia 5

¹Kong ringunu ririmo yote me bomba me Yerusalem! Ngiunu gi kiber! Mounu kabedo dedede me atalen mege di ikounu neno ka itwerunu udo dano acel kame timo ne jo gikame tie kakare, kede di egenere. Kame iudunu, Rwot bino sasiro Yerusalem.

²Bed bala gin kilairo kede nying Rwot, do ilair gi likame obedo me ateteni.

³Okwe Rwot, mam in imito kuo me ateni? In ibungo gi, do likame gin kiwinyo lito moro; in ibuco muducaro gi atwal atwala, do gin likame kiko pwonyere. Gin kimio wi gi obedo tek kalamo lela; gin kidagi lokere tenge ki dub gi.

⁴Ango ako waco be, “Magi obedo jocan, wi gi likame tamo; pien likame gin kingeo gikame Rwot mito negi timo, likame kingeo iswilia ka Rubanga gi.

⁵Ango abino ot but jo me ruom amalo di ako ber yamo kede gi. Ateteni gin kingeo gikame Rwot mito ne jo timo, kingeo iswilia ka Rubanga gi.” Do gida kical acala kamanono; kitieko jemo ne Rwot di kiko dagi lubo kop mere.

⁶Pi manono, engu kame owok ki abum bino neko gi, epee kame owok ki wi tim bino muducaro gi. Erisa tie kino bomban gi; ka ngatamoro owok ooko me bomban nogo, en ebino nyinyilo en; pien dub gi odoko tot, tim gi me weko Rubanga odoko dwong.

⁷Rwot penyere be, “Yerusalem, benyo benyo kame ango atwero sasiro in kede? Idwe nin otieko weka, di kiko donyo ilair i nying rubangan kalikame obedo me ateni. Ango apito jo na tuno gin yeng, do gin pwodi kiko ot timo adote, gin kidubo kare gi i ude me imalayan, i yore me woro rubangan.

⁸Oudo kical bala asigiran acuo kame kopito kiber, kame tie kede mit me ikwaran; ngat acelacel tie kede mit but dako ka ngawote.

⁹Mam ango apoore mino gi alola pi tim gi noni? Mam ango apoore culo kwor i kom ateker kacal kamanoni?

¹⁰Poore jokwor ot bebeo i diere me irotin me olok gi di kiko dudubo gi, do kur kidudubo gi atwal atwala; kipoore totongo jange gi pien jange nogo likame obedo mega.

¹¹Pien jo me Isirael kede Yuda obedo jo kalikame genere atwal atwala buta, ango Rwot en awaco.”

¹²Gin kiwaco kop me abe i kom Rwot di kiwaco be, “Likame en ebino timo gimoro. Likame tie can moro kame bino poto ne wa. Likame wan obino neno yi moro amoto kec.”

¹³Gin kiwaco be kope me inabin waco cal bala yamo abuko, be likame kope gi owok kibut Rwot, doko da manono bino timere ne gin inabin.

¹⁴Pi manono, Rwot Rubanga me jo yi owaco na be, “Pi kite kame gin kiwaco kede kope nogi, ango abino mino kope na kame wok ki dogi bedo bala mac, di gin kiko bedo bala yen otuo, di mac nono ko bino wango gi dopodop.”

¹⁵Rwot waco ne jo me Isirael be, “Wun jo me Isirael, ango abino kelo ateker me kakabor bino suro wu. En ebedo ateker atek kobedo anakacia; en ateker kalikame wun ingeunu leb mere, doko da likame itwerunu niang gikame kiyamo.

¹⁶Isaun gi me mako tongini me emal obedo gikame to wok kiye; gin dedede kibedo jo yi atek.

¹⁷Gin kibino camaro gikame ipurunu kede cam wu; gin kibino neneko awobe kede anyira wu; gin kibino camaro diegi, romini kede doke wu; gin kibino dudubo olok wu kede yen epigi; kibino dudubo kede epima bomban wu kame kocelo kede apama, gin bomban kame wun iketunu iye gen wu.

¹⁸“Akadi i kare nono da likame abino muducaro jo na atwal atwala.

¹⁹Kame gin kiko penyere be, ‘Pinyo komio Rwot Rubanga wa otimo ne wa gigi dedede?’ Yeremia in ibino waco negi be, bala kame gin kilokere kede tenge kibuta di kiko donyo tic ne rubangan me kumbor i lobo gi, kamanono da gin kibino donyo tic ne jokumbor i lobo kalikame mergi.”

²⁰Rwot waco be, “Wace ikwae ka Yakobo, wace jo me Yuda kaman.

²¹Winyunu, Okwe wun jomingo kalikame wi wu tio; itienu kede wangu do likame inenunu; itienu kede yitu do likame iwinyunu.

²²Ango Rwot, mam likame wun ilworanu? Mam likame komu miel i nyima? Ango acibo asinge pi bedo ikor ajiko nam adwong, en ebedo apokini abedo nakanaka kalikame nam twero ngolo; akadi bed bala ebuka tingere, do likame etwero kalamo en; akadi bed bala nam gunyao benyo, do likame etwero kate.

²³Do wun ibedunu joepali kede jojemo; wun itiekunu lokere tenge iwekanu.

²⁴Likame itwerunu waco i cunyu da be, ‘Ber kong obedunu kede lworo but Rwot Rubanga wa, en ngat kame cwao ne wa kot i kare mere kikokome, kot me iporo kede kot me oro, di eko mino obedo kede kare me kac buli mwaka.’

²⁵Do raco wu otieko gengo magonogi timere; dub wu otieko kwanyo tenge jamini abeco nogi kibutu.

²⁶“Pien jo kame timo tim areco tie i diere me jo na; gin ki kiire bala jo kociko arama me mako winy, do gin kiciko obek gi me mako jo.

²⁷Bala kame ebukit me ngacik winy pong culucul kede winy, kamanono da ude gida opong kede jamini kame kiudo i yore arac. Manono en omio gin kidoko jo me aura kede kobaro,

²⁸di kiko cwe di del me kom gi meny. Tim gi areco likame tie kede ajikini; likame gin kitimo gi me ateni pi konyo idwe kic, doko da likame kigwoko twero me jocan.

²⁹Mam ango apoore mino gi alola pi tim gi noni? Mam ango apoore culo kwor i kom ateker kacal kamanoni?

³⁰Gi me aura aneko kom jo otieko timere i lobo noni:

³¹Inabin murao kope me abe; josaseredoti pugo bala kame inabin ciko negi;[2] jo na da mito be ebed timere kamanono. Do ibinunu timo benyo ka magonogo ojik?”