Read kumam Yeremia 50 Bible Online

Yeremia 50 - kumam bible

Yeremia 50

¹Man en kop kame Rwot owaco na i kom bomba me Babilon kede jo me lobo nono. En ewaco be,

²“Tuc kop noni ne atekerin doko tatamo en! Sip imendera di iko tatamo kop noni! Kur imungi, do wac be, ‘Jokwor otieko mano Babilon! Kotieko mino lewic omako rubanga mere Bel, rubanga mere Maraduk cunye otieko dubere! Cal apaa me Babilon kotieko mino lewic omako, caljwogi mege cuny gi otieko dubere!’

³“Ateker moro otieko bino ki tetu malo pi suro Babilon; en ebino mino lobo me Babilon dong nono. Likame tie dano moro kame bino bedo iye; jo kede leini bino ringo tenge.”

⁴Rwot waco be, “Ka kare nono otuno jo me Isirael karacel kede jo me Yuda bino ot mona di kikok akoka, ango Rwot Rubanga gi.

⁵Gin kibino penyo yongayo aoto Sion di kiko lubo tetu nono. Gin kibino timo keda isikan kame bedo nakanaka di likame wi gi ko wil kede.

⁶“Jo na cal bala romini korwenyo; romini kame jokwat gi omio gi kiparao tenge di kiko rwenyo i wi mori. Gin kibedo wire bala romini kame kokobo i wi mori, di do wi gi oko wil kede kakame anok gi tie iye.

⁷Jo dedede kame udo gi suro gi, doko jokwor gi otieko waco be, ‘Gin kitimo dub but Rwot ngat kame pito gi, Rwot kame oudo joakwari gi oketo gen gi i kome, pi mano, wan oli kede raco moro.’

⁸“Wun jo me Isirael, ringunu tenge ki Babilon! Yaunu tenge ki piny nono! Bedunu cal bala ikoroi kame telo ne diegi icegun yongayo.

⁹Ango ayaro kelo ki tetu malo ekodet me atekerin atek di ako mino gin kisuro Babilon. Gin kibino teere di kiko yi kede jo me Babilon kiko bwono gi. Gin kigweo emal gin likame oto aise bala jo yi kipirana.

¹⁰Kobino yako Babilon, doko jo kame bino yake bino tero jamini dedede kame gin kimito. Ango Rwot en awaco.”

¹¹Rwot waco be, “Wun jo me Babilon, jo koyako jo na, bed bala itienu ilel di cuny wu yom isosomunu bala atakit kame tie camo lum arabo asigira kame tie unyo,

¹²do bomba wu adwong nono, kobino mino lewic mako. Lobo kame konywalo wu iye nono kobino mino lewic mako. Babilon bino doko bomba kame titidi twatwal kibut bomban icegun; en ebino doko wi tim, kakotuo kame pii li iye.

¹³Pien ango alilo ne bomba me Babilon, likame tie dano moro kame bino bedo iye; en ebino dong ameje. Jo dedede kame bino beo i nget Babilon bino nene di kom gi ko to; gin kibino yisiro en pi can kame opoto i kome nono.

¹⁴“Wun dedede jo gwei emal, teerenu ilukunu Babilon pi sure. Gweunu imalia dedede tiek i kome, piento en etieko timo dub buta.

¹⁵Wounu i kome ki bad dedede, ‘En etieko rieno cinge. Cel mere otieko poto, kotieko reto apama mere piny.’ Pien ango Rwot en kame atie timo onyanga i kom jo me Babilon. Pi mano, timunu onyanga i kome, timunu ne bala kame en oudo etimo ne jo icegun.

¹⁶Miunu jo kame cuwo kodi bed li i Babilon, kiton jo kame coko cam ki poti. Jokumbor dedede kame bedo kuno bino ringo kidok but joe gi, i lobere me turgi pi yi nono.”

¹⁷Rwot waco be, “Jo me Isirael cal bala romini kame inguon osasaro. Me agege abaka me Asiria en kogeo suro gi, di do me atiekini Abaka Nebukadunesa en oko koco cogere gi.

¹⁸Pi manono, ango Rwot me jo yi, Rubanga me jo me Isirael, ayaro mino abaka me Babilon kede lobo mere alola, bala kame atimo ne abaka me Asiria.

¹⁹Ango abino dwoko Isirael i lobo gi. Gin kibino camo cam kame dongo i wi moru me Kamel kame tie i adul me Basan. Cam kame dongo i adulion me Epuraimu kede Gilead gin kibino cam di kiko yeng.

²⁰Ka kare nono otuno kobino mono gikareco me jo me Isirael, do likame kobino udo moro; doko likame kobino udo dub moro i Yuda, pien ango abino sasiro jo kame ango aweko odong kuo. Ango Rwot en awaco.”

²¹Rwot waco be, “Ot isurunu jo me Marataim kede Pekod. Nekunu gi itiekunu gi pitipit. Timunu gi dedede kame ango atieko ciko ne wu.

²²Icelakin me yi ajoto tie winyere i lobo nono, doko kotieko cako dudubo en kitek.

²³Babilon oudo cal bala enyondo kame nyonyoto wi lobo lung. Do nan twer mere otiek, pien etieko tuturun. En etieko doko gikame atekerin neno di lworo ko mako gi.

²⁴Babilon, ango aciko ni obek me maki di in iko moko iye abongo ngeno. Ango audi di ako maki piento in oudo ipiemo keda.

²⁵Ango atieko yabo kakame akano iye jamini na me yi, di ako kwanyo jamini na me yi kede lilo, pien ango Rwot me jo yi, atie kede tic kame amito timo i Babilon.

²⁶Sure ki bad tetu dedede di iko tuturo dere mege. Cok jamini mege kame iyako bed ikumemei bala atukit me kal. Muducaro en atwal atwala; kur iwek gimoro dongi.

²⁷Nek isirikalen mege dedede. Ngongolo gi. Jo me Babilon tie i can! Kare me mino gin alola otieko tuno!”

²⁸(Winyunu! Jo kame oudo oringo ot gwokere Babilon otieko lwi di kiko bino Sion! Gin kitie tatamo kite kame Rwot Rubanga wa otimo kede onyanga i kom jo me Babilon pi dudubo tempulo mere.)

²⁹“Lwongunu jo kame gweo emal ot sur Babilon. Lwongunu jo dedede kame ngeo gweno emal. Lukunu bomba dedede; kur imiunu ngatamoro bwoti. Timunu ne gikame eda oudo etimo, doko terenu bala kame eda oudo etero kede jo icegun, piento en oudo ewakere di eko dagi winyo kop na, ango Rwot Ngat Kacil me Isirael.

³⁰Pi mano, kobino neko awobe mege i yote me bomba, doko isirikalen mege dedede kobino muducaro i ceng nono. Ango Rwot en awaco.”

³¹Rwot Rubanga me jo yi waco be, “Babilon, in ewaka dwong ni twatwal, pi mano, ango ayaro suri. Kare otieko tuno me ango mini alola.

³²In iwakere do iyaro gete di iko poto, abongo dano moro kame kiarao in malo. Ango abino cwinyo mac i bomba wu di eko muducaro jamini dedede korimaro en.”

³³Rwot me jo yi waco be, “Kotie tero jo me Isirael kede jo me Yuda kirac. Jo komako gi di oko tero gi tie daro gi odie odie; likame kiyei weko gi.

³⁴Do Ngalak gin tek; en nyinge Rwot me jo yi. En kikome ebino pido pirgi, tetekeny ekel mulem i lobo, do en ebino kelo peko i kom jo me Babilon.”

³⁵Rwot waco be, “Nekunu jo me Babilon! Nekunu jo kame bedo i bomba me Babilon, Nekunu jopug kede jorieko kame tie iye.

³⁶Nekunu inabin mege me angalo, tetekeny gin kidok jomingo. Nekunu isirikalen mege, tetekeny gin dedede kibed kede lworo adwong.

³⁷Nekunu asigiran mege, dudubunu da cabalan mege! Nekunu isirikalen kame gin kipango kame tie i diere gi, tetekeny kidok goro bala mon! Dudubunu abar kame en etie kede dedede; yakenu!

³⁸Kur kot cwei i lobo nono, tetekeny pie mege tui. Babilon obedo lobo kame caljwogi tot iye kirac, caljwogi kame omio jo otieko doko jomingo.”

³⁹Rwot waco be, “Pi mano, leini apat me obar kede idiekon en kame bino bedo Babilon, karacel kede winy me isirani. Jo likame bobo bino bedo kuno, pi kare lung me anyim.

⁴⁰Bala kame bin ango amuducaro kede Sodoma kede Gomora karacel kede bomban me kio gi, ango abino timo ne Babilon kamanono. Likame tie dano moro kame bino bedo kunono bobo. Ango Rwot en awaco.” Rwot waco be,

⁴¹“Neningo, tie jo atie wok ki lobo atie tetu malo, ateker me aura; abakai atot tie iikere ki kakabor kunono pi bino yi.

⁴²Gin kimako imalia kede tongini; gin kiger kili kede kisa. Buruburu gi winyere bala gunyao me nam, di gin kiringo kede asigiran. Gin kibino di kiteere bala jo kotieko iikere pi yi, gin kitie bino pi yi kede Babilon.

⁴³Abaka me Babilon otieko winyo kop amako gi, di bade oko doko lojolojo. Kop nono tie ramo cunye, etie kede lito kame cal bala me dako kame tie ramere me nywal.

⁴⁴“Ango ayaro bino ne jo me Babilon bala engu kame wok ki abum me Yorodan di ebino i elet me kwat, ayaro ngole riamo gin tenge ki lobo gi di ako keto ngatel kame ango en ayero pi pugo lobo nono. Ngai kame kokaruno poro keda? Ngai kame karuno piem keda? Ngatel mene kalikame karuno yei kede kop na?

⁴⁵Pi mano, winyunu iik kame ango atieko timo i kom bomba me Babilon, kede gikame ango amito timo i kom jo mege. Ateteni kobino pere kede idwe gi kotero di gin dedede kiko bedo kede lworo atek pi gi kotimere nono.

⁴⁶Mor me mako bomba me Babilon bino yayango piny; dwan me koko me jo mege bino winyere i pinye apat.”