Read kumam Yeremia 52 Bible Online

Yeremia 52 - kumam bible

Yeremia 52

¹Mwakini me dongo ka Esedekia oudo tie ot are kiwie acel i kare kame en edoko kede abaka me Yuda. En eko bedo i apugan i Yerusalem pi mwakini tomon kiwie acel. Nying toto mere oudo Kamutal, nyar ka Yeremia kame oudo bedo i bomba me Libina.

²Abaka Esedekia oko timo dub but Rwot bala kame bin Abaka Yekoyakim oudo otimo.

³Jo me Yerusalem kede Yuda oko wango cuny Rwot kitek di eko riamo gi tenge ki nyime. Aso, Esedekia oko jemo ne abaka me Babilon,

⁴di Abaka Nebukadunesa oko bino kede isirikalen mege dedede pi suro Yerusalem. Manono bin otimere i buto duwe tomon me duwe me tomon i mwaka me kanyangon me apugan ka Esedekia. Di gin kiko luko bomba di kiko kumemo kayito.

⁵Bomba me Yerusalem oko bedo di jokwor oluke tuno i mwaka me tomon kiwie acel me apugan ka Esedekia.

⁶I ceng me kanyangon me duwe me ongwon me mwaka nono, kec oko do dop i bomba kitek omio oudo likame tie gimoro kame jo romo camo.

⁷Di do oko tuco apama me cel me bomba di isirikalen dedede oko ringo. Gin kilwi ki bomba iwor di kibeo i erute kame oudo tie i dierediere me apamai are kame oudo iyapiyapi kede poto ka abaka, bed bala jo me Babilon oudo oluko bomba. Gin kiko ringo tetu Aditot me Yorodan.

⁸Do Isirikalen me Babilon oko wapo Abaka Esedekia di gin kiko make i elet me Jeriko, di isirikalen mege dedede oko sarakin ringo kiweke.

⁹Isirikalen me Babilon oko mako Esedekia di gin kiko tere Ribula i adul me Kamat, but Abaka Nebukadunesa, di en eko ngolo ne kop.

¹⁰Nebukadunesa oko neko awobe ka Esedekia i nyime di eneno kede wange, doko eko neko da jotic adongo me Yuda i Ribula.

¹¹Di do eko mino ogolo wang Esedekia di oko twene kede irikoi oko tere Babilon, kakame oko kete iye i otkol tuno i ceng me to mere.

¹²I buto duwe tomon me duwe me kany i mwaka me tomon kiwie kanyangon me apugan ka Abaka Nebukadunesa me Babilon, Nebusaradan, ngat kame oudo mio abaka tam, doko di en oudo ngadwong me isirikalen, oko donyo Yerusalem.

¹³En eko wango Tempulo, paco ka abaka, kede ude dedede me jo adongo dongo i Yerusalem. En eko wango da ude apat dedede me Yerusalem.

¹⁴Isirikalen dedede me Babilon kame oudo tie kede Nebusaradan oko rereto apama me cel me bomba me Yerusalem dedede piny.

¹⁵Nebusaradan oko tero Babilon jo mogo kame oudo obedo jocan twatwal kikom jo dedede, kede jo kame oudo oko dong i bomba, kede jo kame oudo ipirana i tic cing, karacel kede isirikalen kame bin oudo orieo cing gi but jo me Babilon.

¹⁶Do Nebusaradan oko weko jocan mogo odong Yuda pi timo tic i poti me olok kede puro poti.

¹⁷Jo me Babilon oko tuturo ipirin me nyonyo buronsi, icegeren me cibo kalayan kame oudo tie i tempulo, karacel kede epipa adwong me pii, di gin kiko tero nyonyo buronsi dedede Babilon.

¹⁸Gin kiko tero da gi me kikiso alutari kede agune me gano buru, jamini me kepo wi ausin me italan, kalayan me gano remo me giayala angola, bakulin me dunyo odok angwe kur, kede jamini apat dedede me nyonyo buronsi kame oudo kotio kede i tempulo.

¹⁹Gin kiko tero jamini dedede kame kotimo kede saabu arabo siliba: bakulin atino, atubai me mako itonge me mac, kalayan me gano remo me giayala angola, agune me gano buru, icegeren me cibo italan, bakulin me dunyo odok angwe kur, kede bakulin me mino giayala amata.

²⁰Jamini me nyonyo buronsi kame oudo Abaka Sulumani otimo pi tempulo oudo pek twatwal likame kotwero pimo gi; gin en ipirin are, icegeren, epipa alac me pii kede cal me twonin me nyonyo buronsi tomon kiwie are kame oudo kocibo i dud epipa nono.

²¹Ipirin are nogo acelacel oudo boro mere malo tie puti ot are kiwie kanyaare kede laco me kore rimaro oudo tie puti tomon kiwie kanyauni. Cuny gi oudo twolo di rom me peko me lak gi tie milimita ot kanyaare kiwie kany.

²²Wi epir acelacel oudo koropo iye nyonyo buronsi kame boro mere romo puti kanyaare kede dul, di kotubuso en kede cal me anyakini me pomagurunet me nyonyo buronsi rimaro.

²³Cal me anyakini me pomagurunet kame oudo tie i kom epir acelacel wel gin dedede oudo tie tol acel, do kikom gi ot kanyangon kiwie kanyape en kame oudo neeno ki piny.

²⁴Nebusaradan, ngadwong me isirikalen oko tero da bala mabus Seraya Ngatel me Josaseredoti, Sepania ngasaseredoti kame oudo lubo tiene, kede jo adek kame oudo obedo jodar ekeko me tempulo.

²⁵En eko tero bobo da ki bomba ngatic adwong kame oudo telo kop kame mako isirikalen, jo kanyaare kame oudo pwodi tie i bomba, jo kame bin mio tam but abaka, kalani ka ngadwong me isirikalen, ngat kame oudo mako itabu kame mako kop i kom isirikalen, kede cuo apat ot kanyape kame oudo obedo anywali me Yuda, kame gin kiudo tie i bomba.

²⁶Nebusaradan oko tero gi i bomba me Ribula but abaka me Babilon.

²⁷Abaka me Babilon oko mino koneko gi i Ribula kunono, i lobo me Kamat. Manono en kite kame bin kotero kede jo me Yuda ot bedo bala mabus i lobo apat.

²⁸Man en wel me jo kame bin Nebukadunesa oko tero ot bedo bala mabus: i mwaka me kanyaare me apugan mere bin etero jo tutumia adek kede ot are kiwie adek (3,023);

²⁹i mwaka me tomon kiwie kanyauni me apugan mere bin etero ki Yerusalem jo tol kanyauni kede ot adek kiwie are (832);

³⁰kede i mwaka me ot are kiwie adek me apugan mere, Nebusaradan ngadwong me isirikalen mege oko tero jo tol kanyaare kede ot ongwon kiwie kany (745). Jo dedede kame bin gin kiko tero oudo wel gi tie tutumia ongwon kede tol kanyape (4,600).

³¹I mwaka me ot adek kiwie kanyaare me kare kame oudo Abaka Yekoyakin otieko bala mabus, i buto duwe ot are kiwie kany me duwe me tomon kiwie are me mwaka nono, Abaka Ebilimerodak me Babilon oko bedo kede cuny me kisa but Yekoyakin di eko gonye ki otkol, manono en mwaka kame en egeo kede pug bala abaka.

³²Ebilimerodak oko tere kiber, di eko mine ruom me wor kame kalamo me abakai apat dedede kame bin tie Babilon bala mabus.

³³Pi manono, Yekoyakin oko gonyo igoen me mabus di eko ngapo apat, eko donyo cam i emesa me abaka ceng dedede pi kare me kuo mere lung.

³⁴Buli ceng, di en pwodi oudo etie ekuo, abaka me Babilon oudo mie sente me wilo gikame mitere ne.