Read kumam Yeremia 7 Bible Online

Yeremia 7 - kumam bible

Yeremia 7

¹Rwot oko waco na

²pi ot cungo i ekeko me tempulo di ako donyo rabo ne jo kop be, “Winyunu kop ka Rwot, wun jo dedede me Yuda, wun jo kame tie donyo ki ikekon nogi pi ot woro Rwot.

³Rwot me jo yi, Rubanga me Isirael waco kaman: Iikunu iponeso wu kede tice wu, di ango ako bino mino wu imeedenu bedo kanoni.

⁴Wekunu ngalere kenu kenu di iwacunu be, ‘Man en tempulo ka Rwot, man en tempulo ka Rwot, man en tempulo ka Rwot, likame tie gimoro kame bino timere ne wa.’

⁵“Pien ka ateteni wun iikunu iponeso wu kede tice wu, ka ateteni wun idonyunu timo ne jo icegun gikame poore;

⁶ka likame iterunu jokumbor, idwe kic kede apuserun kirac; ka likame inekunu dano moro ali kede kop moro i lobo noni, kede ka likame idonyunu woro rubangan apat kame twero kelo ne wu peko,

⁷ka likame itimunu magonogi dedede, ango abino bedo kede wu kanoni, en lobo kame bin sek ango amio joakwari wu pi bedo mergi me atwal.

⁸“Nenunu, wun iketunu gen wu i kom kope me abe kalikame twero konyo wu.

⁹Wun ikwalunu, inekunu, itimunu adote, ilairunu i kom kop me abe, imiunu rubanga Baal giayala, doko da iworunu rubangan mogo kalikame oudo ingeunu.

¹⁰Itimunu gikame cunya dagi nogi di ikounu bino cungo i nyima i tempulo noni, en ot kame kolwongo kede nyinga, di iwacunu be, ‘Likame gimoro arac bino timere ne wa!’

¹¹Benyo, mam wun iterunu be ot kame kolwongo kede nyinga noni otieko doko kapwono me jokuo? Ango da atie neno gikame wun itienu timo, ango Rwot en awaco.

¹²Kong nan otunu Silo, en kakame bin ango acako yero pi gero iye abila na, di ikounu bino neno gikame atimo iye pi dub me jo me Isirael.

¹³Nan wun itiekunu timo dub nogi dedede; doko da bed bala ango atieko yamo ne wu tien kede tien, do likame wun iyeunu winyo kop na; bed bala ango oudo alwongo wu, do wun idagunu gamo doga.

¹⁴Pi manono, ango abino timo ne ot kame kolwongo kede nyinga nono, en ot kame wun iketunu iye gen wu, kede ne lobo kame bin ango amio joakwari wu, abino timo negi gikame cal bala kame bin atimo Silo.

¹⁵Abino riamo wu ki nyima bala kame bin ariamo kede joawade wu, gin ikwae ka Epuraimu.”

¹⁶Rwot oko waco be, “Yeremia kur ileg ne jogi. Kur ikok buta arabo ileg buta pirgi, doko da kur ibak na dogi pirgi, pien likame ango abino yei winyo kop nin.

¹⁷Benyo, likame itie neno gikame gin kitie timo i bomban me Yuda kede i dier yote me Yerusalem?

¹⁸Idwe mwodo yen, papi gi moko mac, di mon nyongo alos me tedo mugati ne rubanga kobedo abaka adako me malo; doko da kionyo piny giayala me giamata but rubangan ace, pi wango cunya.

¹⁹Benyo, iparo be ango en kame kitie wango cunya? Mam gin kitie wango cuny gi ken gi, doko da kikelo lewic i kom gi ken gi?

²⁰Pi manono, ango Rwot Rubanga atie waco be: ango abino onyo lilo kede gero na i tempulo noni, kede i kom jo kede leini, i kom yen kede i kom kodere kame jo puro. Gero na bino bedo cal bala mac kalikame kotwero neko.

²¹“Tie giayala kame ipoorenu wango dedede, kede tie mogo kame itwerunu camo. Do nan ango awaco ne wu be camunu kiton giayala kame ipoorenu wango dedede da, likame abino paro. Ango Rwot me jo yi, Rubanga me Isirael en awaco.

²²Pien i kare kame ango akwanyo kede joakwari wu ki lobo me Misiri, likame bin ango ayamo kede gi arabo amio gi cik moro amako giayala kame kopoore wango dedede arabo giayala moro ace.

²³Do kenekene ango amio gi cik kame waco be, ‘Lubunu kop na di ango ako bino bedo Rubanga wu, di wun ikounu bino bedo jo na; doko da bedunu i ekite kuo kame ango aciko ne wu, tetekeny gi dedede bed ne wu kiber.’

²⁴Do gin likame kiko lubo kop na arabo ciko yit gi iye. Gin kiko lunyo timo gikame cuny gi mito pi epali kede tam areco kame kitie kede, di do kiko meede ameda doko reco akaka doko beco.

²⁵Cako i ceng kame joakwari wu owok kede ki lobo me Misiri tuno tin, ango abedo cwano jotic na inabin butu wie kiwie.

²⁶Do likame tie ngatamoro oko yei lubo kop na arabo ciko iye yite; jo dedede opongo na ngut gi di do ikounu doko reco kalamo bin joakwari wu.

²⁷“Aso, Yeremia, in ibino waco negi kope nogi dedede, do likame gin kibino yei winyo kop nin. In ibino lwongo gi, do likame gin kibino gamo dogi.

²⁸In ibino waco negi be ateker gi likame wora, ango Rwot Rubanga gi, doko da likame kipwonyere akadi bitaro gi. Ateni otieko doko li, doko da likame tie ngatamoro ayamo kop amake.” Rwot waco be,

²⁹“Wun jo me Yerusalem, tururunu; lielunu yer me wi wu di ikounu uco gi tenge. Werunu i wi imukuran wer me koko, pien ango Rwot atieko dagi wu, doko atieko weko wu, wun lwak kowango cunya.

³⁰“Pien jo me Yuda otimo gikarac i wanga. Gin kiketo caljwogi gi, gikame cunya dagi, i ot kame kolwongo kede nyinga, di kiko munao en.

³¹Gin kigero i aditot me Kinom alutari gi kame kolwongo be Topet, me wango awobe gi kede anyira gi i mac. Manoni obedo gikame ango likame aciko gi pi timo, doko da likame oudo etie i tam na.

³²Pi manono, kare tie bino kalikame kobino doko lwonge kede be Topet, arabo Aditot me Kinom, do kobino lwonge be Aditot me Nek; kobino yiko jo kunono paka alamar.

³³Liele me jo bino doko giacama me winy kede me leini me obar, doko da likame ngatamoro bino riamo gi tenge kiye.

³⁴Lobo nono bino doko ameje. I bomban dedede me Yuda kede i yote me Yerusalem, ango abino jiko woo me kilel, kede da yomcuny me ibagai me nyom.