Read kumam Koko ka Yeremia 1 Bible Online

Koko ka Yeremia 1 - kumam bible

Koko ka Yeremia 1

¹Auro kite kame Yerusalem odong kede nono, bomba kame jo oudo opong iye! Auro kite kame edoko do cal kede apuserut, bomba kame atekerin oudo neno be dwong otieko doko cal bala epasoit.

²En ekok iwor kiakia, di pigewange mol loiloi. Kikom jo kame oudo mare likame moro kikom gi bino pi dino cunye. Jowote dedede otieko kwine, gin kitieko doko jokwor mege.

³Kotieko tero jo me Yuda obukui kitie neno iye can di kipasuno kitek. Nan kitie bedo i diere me atekerin apat abongo kakame kitwero bedo iye kede kweicuny. Jokwor gi dedede otieko roikino gi kakadiding.

⁴Yote aoto Sion i tempulo odong nono, pien likame doko tie ngatamoro aoto ilega i ceng adongo. Irutei mege dedede odong nono, josaseredoti mege cur. Anyira mege jower tie neno can; Sion tie kede lito.

⁵Jokwor mege otieko bedo kede loc i kome, jokwor mege tie kede yoto. Pien Rwot otieko mine neno can pi twon dub kame en etimo; jokwor omako idwe mege di kiko tero gi tenge.

⁶Angosibib me Yerusalem otieko weke, jotel mege do cal bala atil kame kec ogondao, kame teko gi otiek kakame kitie ringo kede kibut ngadwar.

⁷Yerusalem nan yutuno, i kare kanataman etie kede i can, kede irim, jamini dedede abeco koudo obedo mege i kare kasek. Kakame jo mege opoto kede i cing jokwor, di ngat kame konyo gi oko bedo li, jokwor oko donyo nyero gi pi kite kame kipoto kede.

⁸Yerusalem odubo kirac adikinicel, omio nan edoko gi me anyera. Jo dedede koudo tie kede wor bute nan cae, pien kitieko ngine di etie nono. En do ecur, di eko loko nyime tenge.

⁹Tim mere kopwoke oudo do neno kakaler i egoe mere me yie kame mon ngapo, do en likame eko paro pi kuo mere me anyim. Kite kame epoto kede oudo neko kom dano, abongo ngatamoro kame romo kweno cunye. En ekok be, “Okwe Rwot, nen can kame atie iye, pien ngakwor otieko bwona!”

¹⁰Jokwor mege oyako jamini mege abeco dedede; en eneno di atekerin me kumbor donyo i kabedo mere kacil, kakame Rwot ogengo jo kalikame obedo Iyudayan donyo iye.

¹¹Jo mege dedede cur di kimoo gi me acama kiseso jamini gi abeco kede cam me acama pi udo teko moro. Bomba kok be, “Okwe Rwot nen kite kame kony na odoko li kede!”

¹²En ekok be, “Wun jo kame ibeunu i ngeta, mam likame iparunu? Kong ngolorunu di ikounu neno, ka tie can moro kotieko bedo rom kede mera, can kame Rwot okelo i koma i ceng kame edoko ger kede.

¹³“En ecwao mac ki malo di mac nono oko donyo ewango kiton diere me cogere na. En eciko tiena kede obek di eko dwoka cen; en eweka kena di atie kede aramo.

¹⁴“En etweo dub na bala ayoko di eko lido gi karacel. En eko rwako gi i nguta di teko na oko tiek pi peko gi. Rwot omia i cing jo kalikame ango asobolo yi kede gi.

¹⁵“Rwot odagi jo yi na dedede koudo tie i diere na, en ecwao isirikalen bino muducaro awobe na. Enyinyito jo na bala olok kame kotie biino.

¹⁶“Kope nogi en komia atie koko di pigewanga mol. Likame tie ngatamoro kame kweo cunya, likame tie ngatamoro kame dwoko cunya. Jo na odong nono abongo gimoro, pien jokwor ocere na.”

¹⁷Sion rieo bade, do likame tie ngatamoro kame kweo cunye; Rwot otieko mino cik i kom ikwae ka Yakobo, en emio cik be jokio gi poore dok jokwor gi. Kitie tero Yerusalem bala gi me kwer.

¹⁸Yerusalem waco be, “Rwot gire otimo gikame tie kakare, pien ango oudo ajemo ne. Winyunu, wun jo dedede, nenunu can kame atie iye; kotieko mako awobe kede anyira na di oko tero gi bala mabus obukui.

¹⁹“Alwongo jo kame oudo mara, do kiko ngala angala. Josaseredoti na kede joadongo ototoun i gudi me bomba, di oudo kitie mono cam me acama pi dong kuo.

²⁰“Okwe Rwot nen peko kopoto i koma; yia onyote. Cunya cwer pien ango oudo abedo ngajemo. Nek tie timere i gudi me bomba; akadi i yi ude da jo tie to iye.

²¹“Winy cur na, likame tie ngatamoro kame sobolo dino cunya. Jokwor na dedede owinyo peko na, gin cuny gi yom be in ikelo can i koma. Cwai ceng kame in icikere pire di iko mino jokwor na da neno can bala ango.

²²“Nen tim gi areco dedede di iko tero gi bala kame itera kede pi dub na dedede. Pien ango acur tien kede tien, doko cunya da onyote.”