Read kumam Koko ka Yeremia 2 Bible Online

Koko ka Yeremia 2 - kumam bible

Koko ka Yeremia 2

¹Rwot pi gero mere omio eko kelo i kom Sion kare alit me colo. En euco ki malo oko poto i wi lobo deyo kame Isirael oudo tie kede. I ceng me gero mere en eweko kiton tempulo mere.

²Rwot odudubo abongo kisa kabedere dedede kame ikwae ka Yakobo bedo iye. Kede twon gero en etuturo piny kagwokere atek me jo me Yuda, ekelo lewic i kom ajakanut kede i kom jopug mege.

³En etuturo teko me Isirael kede twon gero; edagi konyo gi kakame jokwor obino kede. En eliel i kom ikwae ka Yakobo bala mac obirano, di eko wango gi dedede.

⁴En ekudo tir me emal mere bala ngakwor, di cinge tetu cam otelo tol kede tong me emal iye. En etieko neneko jo kame wan oudo owakere pirgi i Yerusalem; en ebwoto gero mere bala mac aliel.

⁵Rwot otieko doko bala ngakwor, di eko dudubo Isirael. En edudubo ude mege dedede me abakai, di eko rereto kagwokere mege atek, eko medo ne jo me Yuda iturur kede koko.

⁶En etuturo tempulo mere bala kima atie i poto; edudubo taberenakol mere. Rwot ojiko i Sion kwero ceng adongo kede ceng Sabato; kede twon gero eko dagi abaka kede josaseredoti.

⁷Rwot otieko dagi alutari mere, etieko weko kabedo mere kacil. Ejalo jokwor orereto apamai mege. Gin kilelemo di kitaco i ot ka Rwot bala kame kotimo i ceng me ebaga.

⁸Rwot oudo omoko tam mere pi rereto apamai me Yerusalem; en erieo tol me pimo gi di likame eko mako asisa tuturo gi piny. En emio atukito me lobo koluko bomba otiatiaun; nan gin dedede kingingidun piny karacel.

⁹Irutei mege olwiny i atukit me apamai kopopoto, en etuturo lilime kobedo ipirin mege me erute. Abaka mere kede jotel ace komamako kotero i lobere me atekerin apat; likame doko kopwonyo Iswil, doko inabin da likame udo gianyuta kibut Rwot.

¹⁰Joadongo me Yerusalem bedo piny i lobo di kiling titi, di kiketo apua i wi gi kede di kingapo ipukoi. Anyira me Yerusalem oriondiko di kiko como nyim gi piny.

¹¹Wanga ool koko; yia onyote; atie kede cwercuny pi kite kame koneko kede jo na. Idwe kede imukerun tie gondao i gudi me bomba.

¹²Gin kikok but toti gi pi kec kede orio; gin kigondao i gudi me bomba bala jo kame kowawano, di do kuo gi ko yai momot di kitie i kor toti gi.

¹³Okwe Yerusalem, awac kop nyo? Apor can ni kede mene tetekeny akwei cunyi? Can ni opepetun atatai bala nam adwong; likame tie ngat kasobolo konyi.

¹⁴Inabin ni tie waco ni kope me gianyuta me abe; gin likame kinyuto dub wu kakaler pi koto mino wu dok i kuo wu kasek, do gin kibedo mino wu kope me abe kame rwenyo jo.

¹⁵Jo kame beo i ngeti, Yerusalem, kineni kede acae, kiyisiro in di kiyayango wi gi kede acae di kiwaco be, “Kom ateteni manoni en bomba koudo ber di cil? Kom manoni en bomba koudo yomo cuny jo dedede me wi lobo?”

¹⁶Jokwor ni dedede ngamo ni dog ngam me anywar; kiyisiro in di kijunye di kiwaco be, “Wan otieko dudubo en. Manoni en ceng kame wan oudo obedo kuro!”

¹⁷Rwot otieko timo ne Yerusalem gikame oudo engato pi timo. En edudubo en abongo cuny me kisa bala kame oudo eiko cako sek. Emio jokwor mege olelo i wie, di eko medo teko gi.

¹⁸Okwe apamai me Yerusalem, kokunu kitek but Rwot! Miunu pigewangu mol iwor kede iceng bala pii me ecilet. Kur iolunu kede koko kede bedo kede cwercuny!

¹⁹Yaunu iesawan apapat me iwor pi koko but Rwot; gonyunu ne kop dedede atie i cunyu pi kuo me idwe wu, idwe kame kec tie gondao i wi buli gudo me bomba.

²⁰Okwe Rwot, ngoloro di iko neno! Ngai kame in itieko timo ne kamanoni? Benyo, poore mon cam idwe gi kame gin kinywalo? Benyo, poore nek inabin kede josaseredoti i tempulo nin?

²¹Jo atino kede jo adongo buto piny kitotoun i gudi me bomba. Jokwor oneneko anyira kede awobe na. In ineneko gi abongo kisa i ceng me gero ni.

²²In ilwongo jokwor ki kabedere dedede ineno bala manono obedo ceng me ebaga; di likame tie ngatamoro oko bwot i ceng me gero ni nono. Idwe na kame ango anywalo di ako pito, jokwor na oneneko.