Read kumam Koko ka Yeremia 3 Bible Online

Koko ka Yeremia 3 - kumam bible

Koko ka Yeremia 3

¹Ango en ngat kotieko bilo neno can, di abeo i ebela me gero ka Rwot.

²En ekola adonyo kakacol cucucuc.

³Ateteni eko cako ruruco jujuto ango pi ceng alutu.

⁴En eweko ringo koma kede del koma di obalacar, di eko tuturo cogere na.

⁵En egoloro ango di eko luka kede can alit kede peko.

⁶En emia bedo kakacol bala jo ariki oto sek.

⁷En eluka kede apama tetekeny likame akaruno bwot; etwea kede eriko apek.

⁸Akadi alwongere di alongolongo koko pi mito kony, en edagi winyo kwac na.

⁹Eculo yote na kede apama me kide, di eko kukudo kabeo na.

¹⁰En oudo ecal bala edubu kobuto piny tie kura pi somo i koma, bala engu kopwono tie kura.

¹¹En eko wana tenge ki yongayo na di eko nyinyilo ango i adulion; di eko weka kena di kony na li.

¹²En etelo tol me emal mere di eko pimao ango bala gikame en epimao me pwonyo gweno emal.

¹³En eko gweno emal mere ocoba odonyo paka i engalur.

¹⁴Ango adoko do dano me anyera kibut jo na dedede, ngat kame jo golao kede were piny yuluyul.

¹⁵Emia ayeng kede can alit, amato pige me yat akec paka roma.

¹⁶Ereta laka okakao engaro di eko mina nywongo i buru.

¹⁷Etieko mina akei kuo me anapakin; wia da otieko wil kede yomcuny.

¹⁸Ango ako waco be, “Ango atieko kei kuo abor, kede da gi dedede kame oudo ageno udo kibut Rwot.”

¹⁹Par kame atie kede i kom can na alit, kede bedo abongo paco kec bala pige me yat akec, kede da bala epiu!

²⁰Abedo paro kop nono nakanaka di cunya oko dwono.

²¹Do gen na dwogo ka ayutuno be:

²²Amara kalikame lokere ka Rwot likame jik, cuny mere me kisa tie nakanaka.

²³Gin kinyen buli odiko acelacel, genere mere dwong.

²⁴Rwot en gi dedede kame ango amito, pi manono ango abino gene.

²⁵Rwot timo bero ne jo dedede agene, ne jo dedede kame lokere bute.

²⁶Pi manono eber ne dano daro eliling alako ka Rwot.

²⁷Eber ka dano opwonyere i dire noni di pwodi etitidi.

²⁸Ka Rwot omio dano alola, dano nono poore bedo kene di eko ling;

²⁹en epoore mwolere di eko luro wie piny, pien cengemogo gen moro pwodi tie;

³⁰akadi kobunge, amoto koyeyeto en, en epoore gamo gin dedede.

³¹Pien Rwot likame bino dagi wa nakanaka.

³²Akadi bed bala en ekel ne wa cwercuny, en ebino bedo kede cuny me kisa di lubere kede amara mere kalikame lokere.

³³Rwot likame cunye yom pi mino jo neno can.

³⁴Rwot ngeo kame kotie tero mabus kirac;

³⁵en engeo ka likame kotie mino jo twero gi;

³⁶en engeo ka likame kongolo ne jo kop kede ateni.

³⁷Ngai kame twero yamo gimoro di gi nono ko cobere ka Rwot likame oyei?

³⁸Gikaber amoto gikarac timere ka en emio cik mere.

³⁹Pinyo kamio dano ngunguro ka Rwot omie alola pi dub mege?

⁴⁰Ber kong ongingicunu yote wa di okounu dok but Rwot.

⁴¹Olegunu kede cuny wa dedede di otingunu cing wa malo but Rwot di owaco be,

⁴²“Wan odubo, doko da ojemo ni, di in, Okwe Rwot, likame iko sasiro wa.

⁴³“In ingapo gero di iko donyo wapo wa, di iko neneko wa abongo kisa.

⁴⁴In iumere kede edou tetekeny ilega moroni kur pelao tuno buti.

⁴⁵In imio wa odoko bala yugi i diere me atekerin.

⁴⁶“Jokwor wa dedede ngamo ne wa dog gi ngam me anywar;

⁴⁷obeo i can akelo lworo, opopoto i bure atut; kodudubo jamini wa, komuducaro wa.

⁴⁸Pigewanga mol bala ecilet pi kite kame komuducaro kede jo na.

⁴⁹“Pigewang wa bino mol cutucutu abongo jik,

⁵⁰paka tuno di Rwot ongoloro piny ki malo di eko neno wa.

⁵¹Cunya cwer kame aneno gikame otimere ne anyira me bomba.

⁵²“Jo kodoko jo ading na abongo tien kop moro obedo dwara bala winyo.

⁵³Gin kiuca i bur di akuo di kiko lwomolwomo kide i koma.

⁵⁴Pii oko cako mwonyo wia, di ango ako waco be, ‘Atiek do.’

⁵⁵“Ango ako lwongo nyingi, Okwe Rwot, di oudo atie piny i dud bur.

⁵⁶In iko winyo koko na be, ‘Kur icul yiti di iko dagi winyo koko na pi mito kony, do kony kora!’

⁵⁷In iko nyikino buta kakame alwongi kede, di iko waco na be, ‘Kur ibed kede lworo.’

⁵⁸“In ipido pira, Okwe Rwot, in ilako kuo na.

⁵⁹In itieko neno gikarac kame kotimo na, nan do ngol kop aganga.

⁶⁰In itieko neno mit gi me timo onyanga i koma, iik areco dedede kame kitie kede i koma.

⁶¹“In itieko winyo anywar gi i koma, Okwe Rwot, in ingeo iik gi dedede i koma.

⁶²Gin kiweweo di kiyamo ngurunguru kikwota piny yuluyul.

⁶³Akadi di kitie bedo amoto kitie cungo, neningo, ango en kame kigolao kede were.

⁶⁴“Okwe Rwot, mi gi alola pi tice gi, pi gikame cing gi otimo;

⁶⁵Ket ilam i kom gi di iko mino gi kibed kede cwercuny!

⁶⁶Wap yorgi di iko tieko gi pitipit ki wi lobo!”