Read kumam Koko ka Yeremia 4 Bible Online

Koko ka Yeremia 4 - kumam bible

Koko ka Yeremia 4

¹Saabu koudo meny otieko doko cocol; kide kame kogero kede tempulo do opete i gudi me bomba.

²Awobe me Sion oudo beco ne wa bala saabu, do nan kotero gi bala agune kame kocweo kede elupe.

³Akadi ikween da doto idwe gi, do jo na tie kede gero but idwe gi bala ikululun atie i wi tim.

⁴Leb idwe gi moko i dan gi pi orio, idwe gi kwao cam, do likame tie ngatamoro amio gi.

⁵Jo koudo camo cam abeco tie to kec i gudi me bomba; jo koudo odongo i kuo ajabajaba tie kukuro oduru mono giacama.

⁶Alola kame komio jo na kalamo alola kame komio jo me Sodoma, bomba kame opoto atura abongo cing ngatamoro tuno iye.

⁷Jotel me Yerusalem oudo olony bala akako, oudo kitar bala cak. Kom gi oudo obokere kalamo kidi koral, di yer wi gi meny bala kidi sapir.

⁸Nan cal gi olokere odoko col kalamo atuk, likame doko kotwero ngeno gi i gudi me bomba. Del me kom gi ojung i kom cogere me kom gi; di kituo bala yen.

⁹Jo kame oudo koneko i yi can gi oudo beber kalamo jo kame nataman tie to kec, jo kame kuo gi yai momot pi li me cam.

¹⁰Cing mon atie kede cuny me kisa en kotedo idwe gi kikokome. Gin kidoko cam gi kakame komuducaro kede jo na.

¹¹Rwot ojalakino gero mere dedede, en ecwinyo mac i Sion kowange dopodop paka i dud apama.

¹²Abakai me wi lobo oudo likame romo yei, akadi jo dedede me wi lobo da oudo likame yei be joasura arabo jokwor oudo bino donyo i erute me Yerusalem.

¹³Manoni otimere pi dub me inabin mege kede pi dub me josaseredoti mege, gin jo kame kionyo remo me jo kopoore i dier bomba.

¹⁴Inabin kede josaseredoti nogo oko donyo awiratoi i gudi me bomba, di kipwokere kede remo, omio likame tie ngatamoro koudo twero mulo kiton igoen gida.

¹⁵Jo oko donyo lelemo negi be, “Irwaunu! Wun jo kopwokere! Kur imulanu!” Aso, gin kiko donyo awiratoi i diere me atekerin, di jo waco negi ki kugonogo be, “Likame ibinunu bedo kan.”

¹⁶Rwot kikome en oko sasaro gi, en likame doko ebino paro pirgi. Jo likame onyuto wor kede cuny me kisa but josaseredoti kede joadongo.

¹⁷Wang wa okuro neno kony kwekwe. Obedo kuro kony kibut ateker kalikame oko bino konyo wa.

¹⁸Jokwor obedo wapo yorwa, omio likame oudo otwero ot ki gudi me bomba wa. Ceng wa oudo onoko, ajikini wa oudo otuno.

¹⁹Jokwor awapo wa oudo dwir kalamo ekokom apor i malo, kiriamere kede wa i wi mori, kibuto piny kino wa i wi tim.

²⁰Gin kiko mako atan me kuo wa, en abaka kame Rwot oyero. En ngat kame wan oudo owaco be bino gwoko wa kibut atekerin apat.

²¹Lelunu kede yomcuny, wun jo me Edom, kede wun jo kame bedo i lobo me Us. Do wuda ibinunu mato ikopo me akodi can nono; ibinunu mer kede, di ikounu gonyo igoen idongunu nono.

²²Sion otieko udo alola pi dub mege; Rwot likame doko bino weko wa omeede bedo obukui. Do in Edom, Rwot bino mini alola pi dub ni; en ebino woto tice ni areco kakaler.