Read kumam Koko ka Yeremia 5 Bible Online

Koko ka Yeremia 5 - kumam bible

Koko ka Yeremia 5

¹Okwe Rwot, yutuno gikame otimere ne wa; ngoloro wa iko neno lewic kame otie iye!

²Lobo wa do tie i cing jokumbor, gin en kame kitie do bedo i miere wa.

³Wan otieko doko idwe kic, pien oli kede papi wa; toti wa odoko do bala apuserun.

⁴Nan wan do miero owil awila pii me amata, doko da miero owil awila yen me tedo.

⁵Kokolo wa tetek kede ayokoi i ngut wa; ool do likame koyei mino wa wei.

⁶Wan oyei jalere i cing Misiri kede Asiria pi udo cam aromo mino wa bedo kuo.

⁷Joakwari wa bin odubo, do nan gin kitieko totoun; nan wan do otie neno can pi dub gin.

⁸Ipasoi en odoko jo kame pugo wa, likame tie dano moro koyaro lako wa ki cing gi.

⁹Ka wan ooto mono cam udo ocato kuo wa but jonek me wi tim.

¹⁰Lieto me kec owango kom wa oko dop bala keno.

¹¹Kobuto tetek kede mon i Sion, kede da anyira kalikame pwodi ongeo cuo i bomban me Yuda.

¹²Koliero jotel kede bad gi paka to, likame komio joadongo wa wor.

¹³Kodio awobe wa tetek riego bala ipasoi, kigete kede isikin adongo i ngut gi.

¹⁴Jo adongo likame bobo bedo i dog irutei me bomba, doko awobe da ojiko wero were.

¹⁵Kilel koudo tie i cuny wa ojik; miel kame oudo otie kede olokere odoko iturur.

¹⁶Angosibib wa otieko poto; otie i can, pien wan odubo.

¹⁷Cuny wa tie kede tuwo, wang wa da odoko mwadamwada.

¹⁸Pien moru me Sion odong kene abongo jo, ikween en kame do cede kiye.

¹⁹Do in, Okwe Rwot, in ipugo nakanaka; apugan ni tie pi jo me kare dedede.

²⁰Pinyo komio wi owil kede wa atwal atwala? Pinyo komio iweko wa pi kare alac kaman?

²¹Dwok wa buti, Okwe Rwot, me wek odwog buti; mi wa odok i kuo kangoce sek.

²²Kwanyo ka amoto itieko do dagi wa atwal atwala, arabo ka itieko do doko ger kede wa gero kalikame jik.