Read kumam Esekeri 1 Bible Online

Esekeri 1 - kumam bible

Esekeri 1

¹I buto duwe kany me duwe me ongwon i mwaka me ot adek, di oudo ango atie kede jo koudo tie obukui bala mabus, i nget ecilet me Kebar, malo oko yabere, di ango ako neno gianyuta ka Rubanga.

²Mwaka nono oudo obedo mwaka me kany cako i kare kame bin kotero kede Abaka Yekoyakin obukui bala mabus.

³Rwot bin oko mina kop mere i Babilon i nget ecilet me Kebar, ango Esekeri ngasaseredoti, wot ka Busi, di twer ka Rwot oko bino i koma i kunono.

⁴Ango ako ngoloro di ako neno yamo me kot tie bino ki bad tetu malo. Kot oudo tie memenyun kitek i edou ati di ecaro nget edou nono lung, di gimoro kame cal bala nyonyo ameny tie i diere me kakame kot memenyun iye nono.

⁵I diere me yamo me kot nono gimoro oudo tie iye kame cal bala giakuo ongwon. Gin oudo kitie i cal me jo.

⁶Acelacel kikom gi oudo tie kede nyime ongwon kede bwome da ongwon.

⁷Tien gi oudo oriere, di kitie kede abelekek kame cal bala me twon, doko oudo kimeny bala nyonyo buronsi kame kokiso kiber.

⁸I dud bwom gi ongwon nogo dedede, oudo acelacel tie kede cing dano. Giakuo ongwon nogo oudo tie kede nyim gi kede bwom gi kaman:

⁹bwom giakuo acelacel oudo riamo kede me giakuo are kame kio kede. Ka oudo kitie ot, ngat acelacel oudo tenaro ot anyim abongo lokere.

¹⁰Cal me nyim gi oudo tie kaman: gin ongwon nogo oudo nyim gi cal bala me dano i tetu nyime, nyim engu i bad tetu cam, nyim twon i bad tetu ngodal, kede nyim ekokom kicen ngei gi.

¹¹Nyim gi oudo tie kamano. Bwom gi oudo oyarere malo; bwom are me giakuo acelacel oudo riamo kede me ka ngawote, do are icegun oudo umo kom gi.

¹²Giakuo acelacel oudo nyime tie i bad ongwon dedede; oudo kitenaro ot anyim gin dedede karacel tetu moroni kenekene bala kame cuny gi mito, abongo lokere.

¹³I diere me giakuo nogo oudo tie iye gikame cal bala itonge arorano me mac, oudo eliel ineno bala mac me rau awire tuni tuni i diere me giakuo nogo. Mac nono oudo caro piny kiber, doko meny acal bala me kot oudo tie iye.

¹⁴Giakuo nogo oudo dwidwitun tunituni bala meny me kot.

¹⁵Di oudo ango atie neno giakuo nogo, ako neno namisigan ongwon di kitie cungo piny i nget giakuo nogo, namisiga acel i nget giakuo acelacel.

¹⁶Namisigan ongwon nogo oudo cacal, di kimeny bala kidi me wel kame kolwongo be beril, doko oudo kotimo gi di ineno bala namisiga acel orire donyo i yi ocelu.

¹⁷Ka gin oudo kitie ot, gin oudo kioto i bad tetu moroni kenekene abongo lokere.

¹⁸Lak namisigan nogo oudo icogoror malo cogoror kame kelo lworo, di wang tie i kom gi rimaro.

¹⁹Ka giakuo nogo oudo tie ot, namisigan nogo da oudo oto kede gi i nget gi; doko ka giakuo nogo oudo oko por malo, namisigan nogo da por kede gi.

²⁰Giakuo nogo oudo oto karamoroni kenekene kame gin kimito, di namisigan da ko ot karacel kede gin, pien giakuo nogo oudo tie kede twer i kom namisigan nogo.

²¹Aso, i kare dedede kame giakuo nogo oto kede arabo kicungo amoto kipor malo, namisigan da timo kamanono, pien giakuo nogo oudo tie kede twer i kom namisigan nogo.

²²Malo me wi giakuo nogo oudo tie iye gikame opetere di emilimili bala akako.

²³Giakuo nogo oudo tie cungo i dud gi kopetere nono di acelacel kikom gi oyararo bwome tetu but ngakio mere i ngete tuni tuni, di eumo kome kede bwome are icegun.

²⁴Kakame gin kitie por kede, ango ako winyo bwom gi mor bala pii me nam. Bwom gi oudo mor winyere bala woo me dwan twon ekodet me isirikalen arabo bala dwan Rubanga Won Twer. Kakame gin kicungo kede, gin kiko dwoko bwom gi piny.

²⁵Kakame gin kicungo kede di kiko dwoko bwom gi piny, dwan moro oko winyere ki gi kopetere kame oudo tie malo me wi gi.

²⁶I wi gi kopetere nono oudo tie iye gikame cal bala kom me ajakanut kame kotimo kede kidi me wel atie ebululu ebululu, di gimoro kame cal bala dano oudo tie bedo i wie.

²⁷Cako ki kakame cal bala piere dok malo ango aneno gimoro kame cal bala nyonyo ameny tie iye, gimoro kame cal bala mac, di erimaro en; doko cako ki piere dok piny ango aneno gimoro kame cal bala mac tie iye; rieny oudo oluke,

²⁸rieny kame erangi mere cal bala me etauloka. Manoni en kite kame deyo ka Rwot oudo oneno kede buta. Kakame ango anene kede, ango ako riebere piny, di ako winyo ngatamoro di tie yamo.