Read kumam Esekeri 11 Bible Online

Esekeri 11 - kumam bible

Esekeri 11

¹Tipo ka Rubanga oko tinga di eko tera i erute me bad tetu kide me tempulo. Ango ako neno cuo ot are kiwie kany kunono, di Yasania wot ka Asur kede Pelatia wot ka Benaya da tie i diere gi, gin jotel are me ateker.

²Rubanga oko waco na be, “Wot ka dano, cuo nogi en kame timo iik me timo gikareco, doko gin en kame kimio jo tam areco i bomba noni.

³Gin kiwaco be, ‘Kare pwodi bor me gero ude; bomba noni cal bala agulu me tedo, do wan ocal bala ringo kame tie iye.’

⁴Pi manono, Esekeri, murao kirac i kom gi.”

⁵Di tipo ka Rwot oko bino i koma, di Rwot oko waco na be awace jo be, “Wun jo me Isirael, ango angeo gikame wun itienu tamo.

⁶Wun itiekunu neko jo atot i bomba noni, doko itiekunu mino liele me jo orade i gudi mege.

⁷“Pi mano, ango Rwot Rubanga atie waco ne wu kaman: ateteni jo kame wun inekunu i bomba noni obedo ringo, kede bomba noni da obedo agulu; do kobino kwanyo wu tenge kiye.

⁸Wun ibedunu lworo epima, do ango abino kelo jo amako epima suro wu, ango Rwot Rubanga atieko waco.

⁹Ango abino kwanyo wu tenge ki bomba noni ako mino wu i cing jokumbor, di ako mino wu alola.

¹⁰Kobino neneko wu kede epima kiton i ikor me Isirael. Di wun ikounu bino ngeno be ango en Rwot.

¹¹Bomba noni likame bino gwoko wu bala kame agulu gwoko kede ringo kame tie i yie. Ango abino keto can i komu kiton i ikor me Isirael.

¹²Di wun ikounu bino ngeno be ango en Rwot ngat kame wun likame ilubunu iswilia kede cik mege, do ikounu donyo lubo cik me atekerin kame kio kede wu.”

¹³Aso, di pwodi oudo ango atie imurai, inonono di Pelatia wot ka Benaya to. Ango ako poto piny ariebacuny, di ako kok kede dwan amalo di awaco be, “Okwe Rwot Rubanga! Benyo, ibino do tieko donge me jo Isirael pitipit?”

¹⁴Di do Rwot oko yamo keda.

¹⁵En ewaco be, “Wot ka dano, jo kame bedo Yerusalem tie yamo i komi kede i kom jo Isirael wadu kame tie obukui be, ‘Gin kitie kakabor twatwal kede Rwot; Rwot otieko do mino wan lobo noni pi doko merwa.’ ”

¹⁶“Pi mano, wace jo wadu kame tie mabus obukui be ango Rwot Rubanga atie waco be, ‘Bed bala ango oudo atero wu kakabor i diere me atekerin apat, doko asasaro wu i pinye apat, do ango oudo atie kede wu i pinye kame iotunu iye nogo.’

¹⁷“Aso, wace gi gikame ango Rwot Rubanga atie waco. Ango abino coko gi ki atekerin kede pinye kame ango asasaro gi iye, di ako dwoko negi lobo me Isirael.

¹⁸Ka gin kiko dok kunono, gin kibino kwanyo tenge caljwogi dedede kame neno rac kede tim dedede areco.

¹⁹Ango abino mino gi kibedo kede cuny acel kede tam anyen. Abino kwanyo tenge cuny gi kalikame wor di ako mino gi cuny awor,

²⁰tetekeny kigwok iswilia na kede kiko lubo cik na. Di do gin kiko bino bedo jo na, di ada ako bedo Rubanga gin.

²¹Do jo kame cuny gi tie i kom gikame neno rac kede tim areco ango abino keto can i kom gi pi gikame gin kitimo.” Rwot en awaco.

²²Di do cerubim oko cako por kede namisigan i nget gi. Deyo me tie ka Rubanga me Isirael oudo tie malo i wi gi.

²³Di deyo me tie ka Rubanga oko yai ki dier bomba di eko ot cungo i wi moru kame oudo tie i bad tetu kide me bomba.

²⁴I gianyuta nono, tipo ka Rubanga oko tinga di eko dwoka Babilon but jo kame oudo tie mabus obukui. Di do gianyuta kame ango oudo aneno nono oko rwenyo na.

²⁵Ango ako tatamo ne jo kame oudo tie mabus obukui gi dedede kame oudo Rwot onyuto na.