Read kumam Esekeri 13 Bible Online

Esekeri 13 - kumam bible

Esekeri 13

¹Rwot oko yamo keda.

²En ewaco be, “Wot ka dano, murao kirac i kom inabino me Isirael kame murao gikame gin kipwakuno i wi gi ken gi. Wac negi kiwiny kop na.”

³Rwot Rubanga tie waco kaman: “Kitie i can gin inabino amiming kame lubo kop kame gin kipwakuno i wi gi ken gi, do di likame kineno gianyuta moro.

⁴Jo me Isirael, inabino wu rom aroma kede ikuwen kame bedo i amejeko.

⁵Gin likame kidaro kabedere kotutucun me apama, doko likame kiiko gi. Manono mio jo Isirael likame karuno cungo i yi i ceng ka Rwot.

⁶Gianyuta kame gin kiwaco be kineno obedo angalo, doko imurai gi obedo me angalo. Gin kiwaco be, ‘Rwot owaco be,’ do di Rwot likame ocwao gi, doko di gin kiko bedo kidaro cobere me kope gi nogo!

⁷Wac negi be gianyuta kame gin kineno obedo me angalo, doko da kibedo murao kope me abe. Gin kiwaco be, ‘Rwot owaco be,’ do di ango likame awaco negi kop moro.”

⁸Pi mano Rwot Rubanga tie waco kaman: “Pien wun iwacunu kope me angalo doko gianyuta kame iwacunu be inenunu da obedo angalo, ango atie kede kop i komu. Ango Rwot Rubanga en awaco.

⁹Ango abino mino alola but wun inabino kame neno gianyuta me angalo di itimunu imurai me angalo. Wun likame ibinunu bedo i kansulo ka jo na, doko likame kobino wandiko nyingu i kom jo me Isirael, arabo wun dok i lobo me Isirael. Di do wun ikounu bino ngeno be ango en Rwot Rubanga.

¹⁰“Inabino otieko rwenyo jo na kede yamo kame waco be mulem tie, do di mulem moro li. Gikame gin kitimo cal bala ka jo ogero apama ayagayaga, gin kioto di kiko sute kede erangi atar pi umo goro mere.

¹¹Wac ne inabino be apama gi nono bino rwacakin piny. Ango abino mino kot bololo, di twon akako ko cwei iye kede yamo ager.

¹²Apama nono bino rwacakin piny di jo ko bino penyo wu gikaber kame erangi wu nono oko timo.”

¹³Pi mano, Rwot Rubanga tie waco kaman: “Pi lilo na ango abino cwano yamo ager, kot abololo, kede akako di eko dudubo apama nono.

¹⁴Ango abino tuturo apama kame gin kisuto kede erangi atar nono, di ako rete piny di kide me acakini mere ko dong kakaler. En ebino poto di eko neko wun dedede. Di do wun ikounu bino ngeno be ango en Rwot.

¹⁵“Apama kede jo kosute kede erangi atar bino neno can pi lilo na. Di do ango ako bino waco ne wu be apama otieko doko li, akadi kiton jo kame oudo osute kede erangi atar da;

¹⁶gin en inabino me Isirael kame oudo murao kop i kom Yerusalem di kiwaco be kineno gikame nyuto mulem kame bino bedo iye, aso di mulem moro li.” Rwot en owaco.

¹⁷Rwot oko waco be, “Aso, in wot ka dano, lok wangi di iko neno mon kame tie i diere me jo ni, gin en jo kame pwakuno kop i wi gi ken gi. Murao kirac i kom gi

¹⁸di iko waco negi be ango Rwot atie waco negi kaman: “Itienu i can wun mon kame ikuunu ne jo dedede ilwitia i dele me ngut cing, kede itimunu negi igoen me rom dedede me umo wic, tetekeny kibed kede twer i kom kuo me jo icegun. Wun imitunu be ibedunu kede twer i kom kuo ka jo na di ikounu tic kede pi bero me kuo wu.

¹⁹Wun likame inyutunu na wor i nyim jo na pi mawele mogo anonok kede pi mugati mogo. Wun ikounu neko jo kalikame oudo poore to di ikounu weko jo kalikame oudo poore dong kuo, oko dong kuo. Manono wun itimunu pi kope wu me angalo but jo na kame gamo kope wu me angalo nogo.”

²⁰Pi mano, Rwot Rubanga tie waco kaman: “Ango cunya dagi ilwitia wu me ngut cing nogo, kame wun itiunu kede gi me gwoko kuo. Ango abino cocoto gi ki ngut cingu di ako mino kuo me jo na bedo abongo peko moro, kuo gi kame wun idwarunu bala dwaro winy.

²¹Ango abino nyinyilo igoen wu me umo wic di ako lako jo na ki cing wu. Gin likame bobo kibino bedo i twer wu. Di do wun ikounu bino ngeno be ango en Rwot.

²²“Wun itiekunu dubo cuny jo kopoore kede angalo wu, jo kalikame ango oudo amito dubo cuny gi, doko wun itiekunu mino nwangcuny but jo areco tetekeny kur kilokere tenge ki yote areco me kuo gi di kiko lako kuo gi.

²³Pi mano, likame bobo ibinunu neno gianyuta me angalo arabo imurai me angalo; ango abino lako jo na ki cingu. Di do wun ikounu bino ngeno be ango en Rwot.”