Read kumam Esekeri 16 Bible Online

Esekeri 16 - kumam bible

Esekeri 16

²En ewaco be, “Wot ka dano, mi Yerusalem ngei gikareco mege.

³Wace be Rwot Rubanga tie waco ne kaman: “In bin onywali i lobo me jo Kanan. Papa ni oudo obedo dano kowok kibut jo Amor, kede toto ni oudo obedo dano kowok kibut jo Kiti.

⁴Kakame bin konywali kede, likame oko ngolo peni, arabo lwoki kede pii, amoto suti kede munyo, akadi boni kede igoen.

⁵Likame bin tie dano moro oko bedo kede cuny me kisa i komi, pi koto timo ni gi nogi; do in bin oko uci obar i ceng kame konywali kede, pien oudo likame komiti.

⁶“Ango ako beno i ngeti, di ako neni di itie gwegweun i remo ni. Ango ako waco nin di itie buto i remo ni be, ‘Bed kuo

⁷di iko dongo bala yat alibaliba me obar.’ In iko dongo bor malo, di iko doko cal bala atin nyako kotieko doko dako. Tune oudo otieko pong i kori, yer wi da oudo odongo, do in oudo itie nono abongo egoe moro i komi.

⁸“Ango bobo ako beo i ngeti di ako neni; in oudo do mwakini ni oromo me mito cuo. Ango ako yaro ekanso na di ako umi kede. Ango bin ako cikere kedi di ako timo kedi isikan me nyom, di do in iko doko mera.” Rwot Rubanga en owaco.

⁹“Di do ango bin ako lwoki kede pii di ako lwoko remo ki komi, di ako wiri kede mo.

¹⁰Ango bin ami ingapo igoen acil kede amukai aruwa me del aber. Ango ami iboo wii kede egoe ameny di epwot doko aumi kede egoe me wel amalo.

¹¹Ami ingapo mwolere: ami alung me bad, eriko me ngut,

¹²mwola me umi, mwolere me yit, kede ami ingapo ocoro acil me ajakanut.

¹³In oudo itie kede jamini me tubuso kom, kame kotimo kede saabu kede siliba, doko igoen kame in oudo ingapo meny, di gin me wel amalo, di kotubuso kuno gi. In oudo icamo kwon me alos kame konungo kiber, mokic kede moo me olibeti. In bin iko doko cil twatwal, di iko doko abaka adako.

¹⁴In bin nyingi oko doko iruo twatwal i diere me atekerin pi cilo ni, piento in oudo icil adikinicel, pi ango en oudo ami ibedo cil kamanono. Ango Rwot Rubanga en awaco.

¹⁵“Do in iko keto gen ni i cilo ni kede i iruo me nyingi, di iko timo adote kede ngatamoroni dedede kobeo i ngeti.

¹⁶In ikwanyo igoen ni mogo di iko tubuso kede abilan ni, di iko donyo timo malaya i abilan nogo. Likame pwodi tie gimoro kotimere kame cal kamanoni, doko likame bino bedo tie atwal.

¹⁷In bobo ikwanyo da mwolere acil kame kotimo kede saabu kede siliba kame ango oudo ami, di iko tic kede gi me timo caljwogi acuo, di in iko donyo timo adote kede gi.

¹⁸In ikwanyo igoen acil kame ango oudo ami di iko umo kede cal nogo, di iko cibo moo na kede odok na angwe kur i nyim gi.

¹⁹Ango oudo ami cam: alos kame konungo kiber, moo me olibeti, kede mokic; do in iko mino cam nogo bala giayala angwe kur but caljwogi.” Rwot Rubanga en owaco.

²⁰“Di do in iko kwanyo idwe ni awobe kede anyira, kame oudo in inywalo na, di iko mino gi bala giayala angola but caljwogi. Ineno bala tim ni me malaya oudo likame oromi!

²¹In bobo da iko ngongolo idwe na di iko mino gi bala giayala but caljwogi.

²²I kare kame in oudo itimo kede gikareco nogi kede tim ni me malaya, in oudo likame iko yutuno kare kame oudo in pwodi atin, kare kame oudo in itie kede nono abongo egoe moro, di igwegweun i remo kame konywali kede.”

²³Rwot Rubanga tie waco be, “Itie tin i can benyo! Medo i wi gikareco ni,

²⁴in itimo kakame imukurur kede abilan piri i kabedere dedede kame jo cokere iye;

²⁵igero kabedere nogo i nget gudi dedede di iko mino cilo ni odoko gi me timo malaya i kabedere nogo. In ibedo timo adote kede jo dedede koudo beo kabedere nogo, di iko meede ameda i tic ni me malaya.

²⁶In itimo malaya kede jo me Misiri, gin jokio ni kame oudo cuny gi mito twatwal buto kedi, di in iko meede ameda i tim ni me malaya pi wango cunya.

²⁷“Pi mano, ango nataman atieko tingo cinga pi keto can i komi. Ango ayaro dwoko piny rom me lobo ni, di ako mino jokwor ni timo kedi gikame cuny gin mito, gin en jo Pilistia, jo kame lewic mako gi pi tim me caro nin.

²⁸“In iko timo malaya kede jo me Asiria, pien jo apat noka likame oudo oromi. In bin iko timo malaya kede gi, do gida likame pwodi kiromi.

²⁹In iko meede kede tim ni me malaya but jo me Babilon, jo me piny kame tic gi en cato wil, do gida likame pwodi kiko romi.”

³⁰Rwot Rubanga waco be, “In tin wi tuwo benyo, en komio itimo gi nogi dedede, tim me malaya kalikame lewic mako.

³¹In igero kabedo ni kimukurur i nget gudi dedede, igero da abilan ni kabedere dedede me cokere! Do in likame iko bedo cal bala malaya, piento in likame iyei be culi.

³²In ical bala dako kame timo adote kede jo apat akaka buto kede cware.

³³Imalayan dedede koculo pi buto kede gi; do in iko mino giamia but jo komiti dedede. In iwilo gi pi gin bino ki kabedere dedede pi buto kedi.

³⁴Tim nin me malaya pat kede me imalayan icegun. Likame tie dano moro kopenyi be ibut kede; doko likame tie ngatamoro koculi; in en kame iculo gi! Ateteni in ipat kede imalayan icegun.”

³⁵Pi mano, Okwe Yerusalem, in malaya noni winy kop kame Rwot tie waco.

³⁶Manoni en kop kame Rwot tie waco: “In ibedo kede mit atek iko gonyo igoen ni di iko timo malaya kede jo kame oudo miti; ibedo da woro caljwogi gikame neno rac, di iko neko idwe ni iko mino but gi bala giayala.

³⁷Pi mano, ango abino coko karacel jo dedede kame bin omiti, jo kobedo yomo cunyi, jo kame in oudo imaro kede kame cunyi dagi. Ango abino coko gi i komi, di ako gonyo igoen tenge ki komi i nyim gi, tetekeny gin kineni di itie nono.

³⁸Ango abino mini alola kame komio mon kame timo adote kede kame neko jo. Abino bedo kede lilo kede nyeko di ako mini alola me to.

³⁹Ango abino mini i cing gi, di gin kiko bino rereto piny kabedere kame in oudo igero me timo malaya ni kede me woro caljwogi. Gin kibino gonyo igoen ni i komi di kiko tero, kede kiko tero da mwolere kame in itubuso kede komi, di gin kiko bino weki di idong nono.

⁴⁰“Gin kibino kelo ekodet me jo i komi, di gin kiko bino didipo in kede kide di kiko ngongolo in i adulion kede ipimai gi.

⁴¹Gin kibino wango ude ni piny di kiko mini alola di mon atot neno. Ango ayaro jiko tim ni me malaya no, di in likame bobo iko bino meede kede mino cul but jo amiti.

⁴²Di do gero na ko bino tiek, di koma ko kwei; likame bobo abino bedo kede gero arabo nyeko moro.

⁴³In wi owil kede kite kame ango bin agwoki kede i kare kame di in pwodi atin, en omio in iwango cunya kede gikame in itimo nogi dedede. Pi mano, ango atieko dwoko ni raco ni i wii. Pinyo komio imedo tim me caro i kom tim kingorijij kame oudo ibedo timo?” Rwot Rubanga en owaco.

⁴⁴Rwot oko waco be, “Yerusalem, neningo, jo bino tic kede yamo noni i komi be, ‘Bala toto kede nyare kame ekite gi acel.’

⁴⁵Ateteni in en nyar ka toto ni. En bin cunye oko dagi cware kede idwe mege da. In ical bala amiegu ni, jo kame bin oko dagi cwog gi kede idwe gi da. Toto ni oudo obedo dano kowok kibut jo Kiti kede papa ni oudo obedo dano kowok kibut jo Amor.

⁴⁶“Amini adwong en Samaria, kame tie i badi tetu malo, en kede calere mege. Amini atidi, kame tie i badi tetu piny, en Sodoma kede calere mege.

⁴⁷Wun likame ikounu lubo yote me kuo gi kede timo gikareco kame gin oudo kitimo kenekene; do pi kare katitidi wun ikounu timo gikareco kalamo kame gin oudo kitimo, i yote lung me kuo wu.

⁴⁸“Ango Rwot Rubanga akuo akwongere be amini Sodoma kede calere mege bin likame otimo gikareco bala kame in kede calere ni itiekunu timo.

⁴⁹Manoni en oudo obedo raco ka amini Sodoma: en kede anyira mege oudo kitie kede ewaka, oudo kitie kede cam kame bwono gi, kede oudo kilony kitie i kuo ajabajaba, do likame oudo kiparo pi konyo jocan kede jo kame piny oloo.

⁵⁰Gin oudo kitie kede tingere, di kiko timo tim areco i nyima, di manono oko mino ango amuducaro gi.

⁵¹“Samaria likame otimo dub kame romo akadi dul me megi. In itieko timo gikame reco kalamo kame gin oudo kitimo. Gikareco nin ka kopooro kede me amiegu ni, mio koneno gin do bala jo kopoore.

⁵²Aso, in poore ikany acae kame komii, in kikomi, pien dub nin rac kalamo me amiegu ni, omio ineno do bala gin likame kitimo dub moro. Poore lewic maki, in kikomi, doko poore ikany acae kame komii, pien in imio koneno do bala amiegu ni opoore.”

⁵³Rwot oko waco ne Yerusalem be, “Ango abino dwoko mulem gin, mulem me Sodoma kede calere mege, kede mulem me Samaria kede calere mege, di ango ako bino dwoko mulem nida karacel kede mergi.

⁵⁴Manono ango abino timo tetekeny in ikanyakino acae kame komii, di lewic ko bino maki pi gi dedede kame in itieko timo. Manono bino dwoko cuny gi be gin oudo kigwagwang.

⁵⁵I kom kop amako amiegu ni, ango abino dwoko Sodoma kede calere mege i kuo gi kasek, abino dwoko da Samaria kede calere mege i kuo gi kasek, di ako dwoko ida kede calere ni i ekite kuo kame bin itienu iye.

⁵⁶Benyo, mam bin Sodoma obedo gi me ayama nin i kare kame bin in iwakere kede,

⁵⁷di pwodi likame kodelelo gikareco ni? Nataman ida itieko doko gi me ayama but jo me Siria kede jokio mege dedede, kede but jo me Pilistia, karacel kede jokio ni dedede kame tie kede acae i komi.

⁵⁸In miero inen can pi tim ni me caro kede tim ace aneno rac kame in ibedo timo.” Rwot en owaco.

⁵⁹Rwot Rubanga waco be, “Ango abino teri iepone kame poore kede gikame in itimo, pien in itieko cano kwongere ni, di iko turo isikan.

⁶⁰Do ango abino bedo kede wor i kom isikan kame bin ango atimo kedi i kare kame di pwodi in atin, di ako bino moko kedi isikan kame bedo nakanaka.

⁶¹Di in iko bino yutuno gikame in oudo ibedo timo, di lewic ko bino maki iye ka ango akwanyo amini adwong kede atidi di ako mino gi buti bala anyira ni, do likame pi isikan kame ango oudo atimo kedi.

⁶²Ango abino moko isikan na kedi, di in iko bino ngeno be ango en Rwot.

⁶³Ango abino sasiro in i gi dedede kame in itieko timo, do in ibino yutuno gi di kiko neko komi, nek kalikame ikaruno ngamo kede dogi me yamo kop moro akadi acel pi lewic.” Rwot en owaco.