Read kumam Esekeri 17 Bible Online

Esekeri 17 - kumam bible

Esekeri 17

¹Rwot oko yamo keda.

²En ewaco be, “Wot ka dano, tatamo ne jo Isirael agole noni

³tetekeny kingei gikame ango Rwot Rubanga atie waco negi: bin tie ekokom moro ati, di etie kede bwome adongodongo adikinicel, kede yer abocoboco di kicil twatwal. En bin eko por eoto Lebanon di eko turo amidi me wi yat seda.

⁴En eturo amidi me yat seda nono di eko tero i lobo me jocat wil, di eko cibe i bomba me jocat.

⁵Di do en eko kwanyo kodi moro acel di eko ot cibe i lobo kame tie kede bolia, kakame pii oudo likame rwenyo kiye pi mine dongo.

⁶Kodi nono bin oko tui di eko dongo edoko yat olok kojanyo, do di ececek. Jange bin oko dongo malo tetu kakame ekokom nono tie iye, do aliasin mege oko dongo odok piny i dude. En eko dongo edoko yat olok ati; etimo jange, di pote oko ume.

⁷“Ekokom ati ace bobo bin tie. En oudo etie kede bwome adongodongo di yer tot i kome. Neningo, olok noni bin oko rieno aliasin mege kede jange da tetu bute. En erieo jange tetu bute be amoto emie pii.

⁸Do olok nono bin oudo kotieko kobe i lobo aber kame pii oudo tie iye kiber, be tetekeny etim jange di eko nyak di eko doko olok aber twatwal.

⁹“Aso, ango Rwot Rubanga apenyere kaman: benyo, iparunu be olok nono bino kuo di eko dongo? Benyo, iparunu be ekokom me agege ca likame bino pute, di eko gwero anyakini mege tenge di pote mege kame oudo libaliba ko ner? Pute likame bino mito dano moro atek arabo jo atot.

¹⁰Ebo, en kotieko kobe di oko pite, do benyo, iparunu be ebino kuo di eko dongo? Benyo, iparunu be likame ebino ner ka yamo kame wok ki bad tetu kide obuko i kome? Iparunu be likame ebino ner i kakame etie dongo iye nono?”

¹¹Di Rwot oko waco na be,

¹²“Peny jojemo nogi ka kingeo dwong me agole noni. Wac negi kaman: abaka me Babilon bin obino Yerusalem di eko tero abaka kede jotic mege Babilon.

¹³En etero ngat acel kikom jo me ot abaka, di eko timo kede isikan. En emie ekwongere pi bedo kede wor bute. En etero bala mabus jo kame bin pirgi tek i ateker

¹⁴tetekeny ateker mwolere i dud apugan mere di likame kiko kelo elol, kede pi ka ateker oko gwoko isikan gi kede Babilon etwero cungo.

¹⁵Do abaka me Yuda bin oko jemo ne Babilon di eko cwano jo Misiri pi ot kelo asigiran kede isirikalen atot. Benyo, iparunu be en kom etwero turo isikan mere kede Babilon? Benyo, iparunu be en kom etwero timo kamanono di eko bwot? En likame ekaruno turo isikan nono di eko ot abongo udo alola!

¹⁶“Ango Rwot Rubanga akuo akwongere be, ateteni abaka noni bino to Babilon, piento en eturo kwongere mere kede isikan kame en oudo etimo kede abaka me Babilon, ngat kocibe bedo abaka.

¹⁷Parao kede twon isirikalen mege likame bino konye yi ka jo Babilon osure di kiko kumemo gi me yito i wi apama, kede di kiko kunyo pulejun me beo i dud apama pi ot neko jo atot.

¹⁸En ecao kwongere mere di eko turo isikan kame en oudo etimo. En eketo cinge i isikan noni di bobo en eko lokere timo gi nogi dedede, en likame ebino bwot.”

¹⁹Rwot Rubanga kwongere be, “Ateteni ango Rubanga akuo abino mine alola pi turo isikan kede kwongere kame en oudo etimo i nyinga.

²⁰Ango abino rieno bwoi na di ako make kede. Ango abino tere Babilon di ako mine alola ki kunono piento en likame eko bedo kede genere buta.

²¹Isirikalen mege dedede kame bino ringo ki yi kobino neneko, do kame bino bwot mege bino sasarun i bad tetu dedede. Di wun ikounu bino ngeno be ango Rwot en awaco kope nogi.”

²²Rwot Rubanga tie waco kaman: “Ango kikoma abino ot i wi yat seda moro abor malo di ako turo kakolibo me ajange mere; abino pite i wi moru moro abor malo.

²³Ango abino pite i wi moru me Isirael abor malo twatwal, tetekeny etim jange di eko nyak, di eko doko yat seda adwong. Winy me epone dedede bino bedo iye; gin kibino gwok i tipo me ajange mege.

²⁴Yen dedede me obar bino ngeno be ango en Rwot. Ango adwoko yen aboco piny, amio yen atino dongo doko boco malo; ango amio yen anumu tuo, di ako mino yen otuo libo di kiko dongo. Ango Rwot en awaco. Ango abino timo gikame atieko waco.”