Read kumam Esekeri 2 Bible Online

Esekeri 2 - kumam bible

Esekeri 2

¹En ewaco na be, “Wot ka dano, yai malo iko cungo, di ango ako bino yamo kedi.”

²Di en oudo etie yamo, tipo ka Rubanga oko donyo i koma di eko mina acungo, di ango ako winyo di en emeede kede yamo be,

³“Wot ka dano, ango atie cwani but jo Isirael. Ango atie cwani but ateker me jojemo kame otieko jemo na. Gin karacel kede joakwari gi kibedo turo cik na tuno tin.

⁴Gin jo kame li kede wor doko wi gi tek. Ango atie cwani but gi pi ot waco negi gikame ango Rwot Rubanga atie waco negi.

⁵Akadi gin kiwinyi arabo kidagi winyi (pien gin kibedo jojemo), gin kibino ngeno be enabi oudo obedo i diere gi.

⁶“Do in wot ka dano, kur ilwor gi, doko kur ilwor kope kame gin kiwaco, bed bala ebino bedo ni ineno bala okuto kede ocokocok oluki, kede bala itie i diere me ekilitona; kur ilwor kope gi, doko kur cunyi nyote pi ekite me neeno gi, pien gin kibedo jojemo.

⁷In ibino waco negi kop kame ango awaco, akadi gin kiwinyi arabo kidagi winyo; pien gin kibedo jojemo.

⁸“Do in, wot ka dano, poore iwiny gikame ango awaco ni; kur ibed ngajemo bala gin. Ngam dogi di iko camo gikame ango atie mini.”

⁹Ango ako ngoloro, di ako neno cing moro di korie buta, di emako itabu adola kame kowandiko.

¹⁰En eko yabo itabu adola nono i nyima; oudo kowandiko yie kede ngee, kope nogo oudo obedo me iturur, koko, kede can.